E rile ge Kgothatso a sa le ngwana, dingaka tša kgaola leoto le tee ka lebaka la bolwetši bja gagwe. O šomiša leoto la maitirelo.Bana ba bangwe ba be ba sa nyake go raloka le yena ka lebaka la bogolofadi bja gagwe.Fela mmagwe o be a mo tšea bjalo ka ngwana yo a swanago le ba bangwe ka go mo fa mešomo ya ka gae bjalo ka mang le mang.

Mmago Kgothatso o ile a mo romela sekolong sa Helen Franz Special Needs School. Se ke sekolo sa bana ba bagolofadi.Ke gona mo sekolong se, moo Kgothatso a ilego a laetša ditalente tša gagwe tša dipapadi.O ile a tsenela metantsho ya Ballroom le Latin American gona mo sekolong se.

Yo mongwe wa barutiši ba Kgothatso o ile a mo kgetha gore a yo emela sekolo sa bona kampeng ya thenise go la Johannesburg.Kgothatso o be a se nke a raloka thenise.Kgothatso o ile a re: “Ke swanetše go yo raloka ka gore ke rutilwe go hlompha batho ba bagolo.”

Kgothatso o ralokile gabotse kampeng ya thenise. Se e bile mathomo a leeto la gagwe la go ba moraloki wa thenise wa boditšhabatšhaba wa setulo sa bogolofadi.O ile a amogela kabelo ya setulo sa bogolofadi le ditlabakelo tša go raloka thenise.O be a le tseleng ya go ba yo mongwe wa baraloki ba maemo a godimo mo Afrika Borwa ba bagolofadi.

Kgothatso o ile a thoma go tsenela diphadišano tša thenise tša setulo sa bogolofadi lefase ka bophara.O thopile sefoka sa diphadišano go la Belgium le Switzerland. Thonamente ya thenise ya Swiss e be e le mmamoratwa wa gagwe.Ka Afrika Borwa, o hlomphilwe gararo ka go abelwa sefoka sa mosadi wa dipapadi wa bogolofadi wa ngwaga.

Kgothatso o ile a tsenela dithonamente tša thenise tša batho ba bogolofadi ka 2013 le 2014 go la Australia, France le Amerika.O ralokile thenise ya botee a nnoši. A buša a raloka ya bobedi, mo a bego a na le moraloki yo mongwe.

Kgothatso o ralokile gape dipapading tša diparalimpiki, tšeo e lego dipapadi tša diolimpiki tša baraloki ba bogolofadi.Go be go se bonolo go itokišetša diphadišano tše, efela Kgothatso ga se a ka a lahlegelwa ke tshepo.O ile a tšwela pele ka go phadišana e le leloko la sehlopha sa Afrika Borwa sa diparalimpiki.

Kgothatso o šomile ka maatla dithutong tša gagwe. O tsene Yunibesithing ya Venda mo a ithutetšego tikrii ya Tlhabologo, Dipapadi le Saense.Gona moo Yunibesithi, papadi ya thenise ya batho ba bogolofadi e be e le yona e nnoši ye e ralokwago ke batho ba bogolofadi.

Wimbledon go la Engelane ke lefelo la go tsebega kudu go tloga kgale mo go swarelwago diphadišano tša thenise ngwaga ka ngwaga.Ka 2018, Kgothatso o ile a ba mosadi wa mathomo wa mothomoso wa go kgona go fihlelela makgaolakgang go la Wimbledon.

Kgothatso o ile a swanela ke go tšea leeto la go ya thonamenteng ya Wimbledon, go la Engelane.Go be go se na tšhelete ya go lefela sefofane le marobalo.Kgothatso o be a tshwenyegile gore o tlo palelwa ke go ya ka lebaka la tlhokego ya mašeleng.Ka mahlatse, a hwetša thušo go tšwa sehlopheng sa basadi ba go ba le dikgwebo.

Wimbledon e be e le thonamente ya Grand Slam ya bone ya Kgothatso mo ngwageng wa 2018.Diphadišano tša thenise tše nne, tše bohlokwa tša boditšhabatšhaba ke Grand Slams.O bile mosadi wa mathomo wa mothomoso dipapading tša thenise ya batho ba bogolofadi yoo a ralokilego dithonamente tše nne tša Grand Slam ka ngwaga o tee.

Kgothatso ke moraloki wa maemo a godimo wa thenise ya batho ba bogolofadi mo Afrika Borwa le Afrika. Ke yo mongwe wa baraloki ba bahlano ba maemo a godimo ka thenise lefaseng ka bophara.Godimo ga dikatlego tša gagwe, Kgothatso o tšwela pele ka go thuša baraloki ba bangwe ba bagolofadi.O laetša gore le ge o na le bogolofadi, o ka kgona go fihlelela se sengwe le se sengwe.