UKgothatso Montjane uKumkanikazi weNtenetya
Glanice Masilo
Sibusiso Khumalo
isiXhosa
Longer paragraphs

——


Eli bali lisencwadini lingoKgothatso Montjane.
-
Wazalwa ngo-1986 ePolokwane, elokishini eyiSeshego.
-
Wazalwa enesigulo esasichaphazela izandla neenyawo zakhe.
-
Nangona kunjalo wakhula wada wangumdlali wentenetya odumileyo!
1
Ngenxa yale ngulo kaKgothatso, oogqirha banyanzeleka ukuba omnye umlenze wakhe mabawunqumle phantsi kwedolo. Usebenzisa umlenze ofakelweyo.
-
Eselula abanye abantwana babengafuni ukudlala naye ngenxa yokuba wayekhubazekile. Noxa kwakunjalo umama wakhe akazange athande ukumphatha ngokwahlukileyo, kwakukho imisebenzi yendlu ekwakufuneka eyenzile.
2
UKgothatso wathunyelwa ngumama wakhe esikolweni sabo baneeMfuno eziKhethekileyo esiyiHelen Franz Special Needs School. Esi sisikolo sabafundi abakhubazekileyo ngandlela ithile.
-
Ekweso sikolo uKgothatso wasibonakalisa isiphiwo anaso kwezemidlalo.
-
Eselapho walinikwa nethuba lokubandakanyeka emdanisweni oyiBallroom nakwiLatin American.
3
Omnye wootitshala besikolo awayekuso uKgothatso yamnyula ukuba makamele esi sikolo kwindawo ekwakudlalelwa kuyo intenetya eRhawutini.
-
Wayengazange wayidlala intenetya uKgothatso!
-
4
Wadlala kakuhle uKgothatso apho kwakudlalelwa khona. Eso yaba sisiqalo sohambo lwakhe ukuze ade abe ngumdlali wentenetya osesitulweni esinamavili nodlala kumazwe ngamazwe.
-
Waphiwa isitulo esinamavili nezinto zonke zokudlala intenetya.
-
Le ntombi yayikuhambo lwayo lokuba ngomnye wabantu boMzantsi Afrika abakudidi oluphezulu kwezemidlalo nangona bekhubazekile.
5
UKgothatso waqalisa ukulungenela ukhuphiswa lwabadlali bentenetya abadlala besezitulweni ezinamavili ehlabathini jikelele. Waphumelela ukhuphiswano eBelgium naseSwitzerland.
-
Itumente yentenetya yaseSwitzerland yaba lolona khuphiswano aluthandayo. EMzantsi Afrika wawongwa izihlandlo ezithathu njengomntu obhinqileyo wonyaka okwezemidlalo nokhubazekileyo.
6
Ngo2013 nango2014 uKgothatso wathatha inxaxheba kwiitumente zentenetya zabadlala besezitulweni ezinamavili eFransi, eAustralia naseMerika.
-
Eyedwa wakhuphisana nomnye umdlali wentenetya okhubazekileyo. Kwakhona wabandakanyeka emdlalweni wababini becala elinye bekhuphisana nesibini esikhubazekileyo naso selinye icala.
7
Kwakhona uKgothatso wangenela ukhuphiswano lweMidlalo yeeParalympic, leyo yiMidlalo yeeOlympic yabantu bezemidlalo abakhubazekileyo.
-
Yayingumsebenzi onzima ukuziqeqeshela olo khuphiswano, noxa kunjalo akazange anikezele uKgothatso.
8
UKgothatso wasebenza nzima ezimisele nasezifundweni zakhe. KwiYunivesithi yaseVenda wafundela isidanga seNzululwazi kwezoLonwabo nakwezeMidlalo.
-
Apho eyunivesithi intenetya yabo basezitulweni ezinamavili yayikukuphela komdlalo owawulungiselelwe abantu abakhubazekileyo bezemidlalo.
9
EWimbledon eNgilane kulapho qho ngonyaka kubanjelwa khona olunye ukhuphiswano lwentenetya oludumileyo nekukudala lwabakhona.
-
Ngo2018 uKgothatso waba ngumntu wokuqala obhinqileyo oNtsundu waseMzantsi Afrika owabonwa ekufanele ukudlalela ubuntshatsheli eWimbledon.
10
Kwafuneka ukuba uKgothatso makahambe aye eNgilane kwitumente yaseWimbledon. Nangona kwakunjalo kwakungekho mali yokuluhlawulela uhambo nendawo awayeza kuhlala kuyo uKgothatso.
-
Yakhathazeka le ntombi kukungabi nandlela yokuya apho kuba yayingekho imali. Ngethamsanqa wafumana uncedo kwiqela labantu ababhinqileyo abangoosomashishini!
11
Ngo2018 iWimbledon yaba yitumente yesine yeGrand Slam kaKgothatso.
-
Ezona zibalulekileyo izihlandlo ezine zokhuphiswano lwamazwe ngamazwe kwintenetya zaziwa njengeGrand Slam.
-
UKgothatso waba ngowokuqala waseAfrika odlala intenetya esesitulweni esinamavili, owangenela ukhuphiswano nowayekwiitumente ezine zeGrand Slam kwakuloo nyaka mnye.
12
UKgothatso ungumdlali wentenetya okudidi oluphezulu eMzantsi Afrika nakwizwekazi iAfrika. Ungomnye wabahlanu abakudidi oluphezulu bengabadlali bentenetya abadlala besezitulweni ezinamavili ehlabathini!
-
Ukongeza kwimpumelelo yakhe, uKgothatso uyanceda ekuxhaseni abanye abadlali abakhubazekileyo. Yena uyasibonisa ukuba umntu angayiyo nantoni na, akukhathaliseki nokuba ukhubazekile.
13

——Imibuzo


  1. Ngubani uKgothatso Montjane? Khawusichazele.
  2. Waqalisa njani uKgothatso ukudlala intenetya?
  3. Lithini igama lesikolo awafunda kuso uKgothatso, umdaniso oyiBallroom nalowo uyiLatin American?
  4. Kungeliphi ixesha xa uKgothatso wayengenele ukhuphiswano lweetumente ezine zeGrand Slam? Kutheni le nto ibalulekileyo?
  5. Uyakholelwa ekubeni ungafikelela kuyo nantoni na, nokuba ukhubazekile? Chaza
  6. Bobuphi ubunzima angadibana nabo umntu osebenzisa isitulo esiqhutywayo?
  7. Kutheni lento ucinga ukuba umama kaKgothatso wakhetha ukungamphathi ngokwahlukileyo uKgothatso?
  8. Zeziphi izinto ezenza abantu baphathe abanye ngendlela eyahlukileyo?
14

——


Le ncwadi yamabali yenziwa yaza yabhalwa ngeSetswana njengenxalenye eyiprojekhthi yokufundwayo yeZenex Ulwazi Lwethu ngo-2021.
15
16
Attribution CC BY
Your attribution should include the following:
Title: UKgothatso Montjane uKumkanikazi weNtenetya
Author/s: Glanice Masilo
Translator/s: Angelinah Dazela
Illustrator/s: Sibusiso Khumalo
Assurer/s: Bukeka Mahlangabeza
Language: isiXhosa

© Zenex Foundation - Saide 2025 (Updated Edition)

CC BY includes the following elements:
 BY   – Credit must be given to the creator