UKgothatso Montjane, iNdlovukazi yeTenese
Glanice Masilo
Sibusiso Khumalo
isiNdebele
Longer paragraphs

——


Indatjana esencwadini le ikhuluma ngoKgothatso Montjane.
-
Wabelethwa ngomnyaka we-1986 ePolokwane, edorojaneni elibizwa ngokuthiwa yi-Seshego.
-
Umntazanyana lo wabelethwa anobulwele obarholophaza izandla neenyawo zakhe.
-
Ekukhuleni kwakhe wakhula waba yikwekwezana yetenese eyaduma ephasini mazombe!
1
Ubulwele bakhe babangela bona abodorhodera bamqunte inyawo ngehla kwedolo. Sekasebenzisa inyawo leplastiki.
-
Abanye abantwana bebangafuni ukudlala naye ngesimanga sokuba nokukhubazeka kwakhe.
-
Unina yena akhange ambandlulule bekamthatha njengomntwanakhe. Bekamnikela nemisetjenzana yangendlini efana nokuthi ahlanze izitja.
2
Unina kaKgothatso wamthatha wamusa esikolweni i-Helen Franz Special Needs School. Lesi sikolo sabantwana abanokukhubazeka.
-
Kulapha afika watjengisa ukuba nesiphiwo sezemidlalo.
-
Esikolweni, wafika wangenela umdanso weBallroom nomdanso we-Latin American.
3
Omunye wabotitjhere bakaKgothatso wamkhetha ukobana ayokujamela isikolo sabo ekampeni yetenese e-Johannesburg.
-
UKgothatso wabe angakhange ayidlale itenese!
-
UKgothatso wathi, “Kufanele ngiyidlale ngombana ngafundiswa bonyana ngibahloniphe abantu abadala.”
4
UKgothatso wadlala kuhle khulu ekampeni yetenese. Lokhu kwaba kuthoma kwekhambo lakhe lokuba mdlali ophambili wetenese okhamba ngesitulo samavilo eentjhabatjhabeni.
-
Waphiwa umnikelo wesitulo samavilo kanye neentlabagelo zokudlala itenese.
-
Bekasendleleni yokuba ngomunye umSewula Afrika ophezulu emdlalweni wabanokukhubazeka.
5
UKgothatso wathoma ngokungenela amaphaliswano wetenese yalabo abadlala bahlezi esitulweni samavilo ephasini mazombe.
-
Wathumba amaphaliswano e-Belgium neSwitzerland. Iphaliswano letenese ye-Swiss kwabe kuliphaliswano ebekalithanda tle!
-
ESewula Afrika watlonyeliswa kathathu njengomma waloyo mnyaka onokukhubazeka kwezemidlalo.
6
Ngomnyaka we-2013 newe-2014, uKgothatso wangenela amaphaliswano alilungelunge wetenese e-Australia, eFrance ne-America.
-
Wadlala itenese yabadlala ngamunye, njengomdlali oyedwa. Wadlala netenese yabadlala ngababili, okumdlalo odlalwa babantu ababili ngapha nangapha.
7
Okhunye godu uKgothatso wangenela iphaliswano lemiDlalo yama-Olimphiki wabaNokukhubazeka angenelwa babantu abadlala zemidlalo abanokukhubazeka.
-
Ukuzibandulela amaphaliswano la kwakubudisi tle, kodwana uKgothatso akhange aphelelwe mamandla.
-
Nanje usaphalisana eenqhemeni zama-oliMphiki wabaNokukhubazeka eSewula Afrika.
8
UKgothatso wasebenza ngamandla neemfundweni zakhe. Wafunda eYunivesithi yeVenda lapha afike wafundela ukuba neziqu kwezokuZithabisa nakuSayensi yezemiDlalo.
-
Eyunivesithi, umdlalo wetenese yabakhamba ngeentulo zamavilo kwakungiwo kwaphela umdlalo owawukhona wabantu abanokukhubazeka.
9
IWimbledon ise- England. Lapho kulapho amaphaliswano amanengi adumileko wakade wetenese abe abanjelwa khona qobe mnyaka.
-
Ngomnyaka we-2018, uKgothatso waba ngumma wokuthoma onzima weSewula Afrika ukwamukelwa emidlalweni yeenkutani eWimbledon.
10
Kwafuneka bona uKgothatso akhambe aye e-England ayokungenela iphaliswano lomdlalo elimlandelande leWimbledon.
-
Kodwana kwakunganamali yokumbhadalela isiphaphamtjhini neendawo zamalalo.
-
UKgothatso wakhathazeka khulu ngombana wabe angeze akghone ukukhamba ngebanga lokutlhoga iimali.
-
Ngetjhudu, wathola isizo esiqhemeni sabomma abanamarhwebo!
11
IWimbledon yabe iyithonamende yesine yeGrand Slam uKgothatso ayingenelako ngomnyaka we-2018.
-
AmaGrand Slams maphaliswano wetenese amakhulu begodu aqakathekileko eentjhabatjhabeni.
-
Waba mAfrika wokuthoma ohlezi esitulweni samavilo odlala itenese ukuphalisana emidlalweni emilandelande emine ye-Grand Slam ngomnyaka owodwa.
12
UKgothatso umdlali wetenese ohlezi esitulweni samavilo okhamba phambili e-Sewula Afrika ne-Afrika yokana. Ungomunye wabadlali betenese abahlanu abasezingeni eliphezulu ephasini mazombe!
-
Ukwengeza epumelelwanakhe, uKgothatso usiza ngokusekela abanye abadlali abanokukhubazeka.
-
Utjengisa abantu bona nawumumuntu ungaba yinanyana yini ofuna ukuba ngiyo, nalokha unokukhubazeka.
13

——Imibuzo


  1. Ngubani uKgothatso Montjane? Hlathulula.
  2. Kweza njani bona uKgothatso athome ukudlala itenese?
  3. Yini ibizo lesikolo sakaKgothatso, lapha afunda khona umdanso weBallroom newe Latin American?
  4. Waphalisana nini uKgothatso emidlalweni emilandelande emine yama-Grand Slam? Kubayini lokhu kuqakathekile?
14

——


Indatjana esencwadini le yabunjwa begodu yatlolwa ngelimi leSetswana, njengengcenye yephrojekthi yamamatheriyali wokufunda we-Zenex Ulwazi Lwethu we-2021.
15
16
Attribution CC BY
Your attribution should include the following:
Title: UKgothatso Montjane, iNdlovukazi yeTenese
Author/s: Glanice Masilo
Translator/s: Sponono Mahlangu
Illustrator/s: Sibusiso Khumalo
Assurer/s: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator