Ilanga lokuBuyisana
Refilwe Ramagoshi
Tebogo Matshana
isiNdebele
Longer paragraphs

——


ESewula Afrika, iLanga lokuBuyisana liyiholideyi yomphakathi eba ngomhlaka-16 kuNobayeni.
-
Incwadi le ikhuluma ngeLanga lokuBuyisana.
-
Uzakuzwa ngomlando walo, nokobana kubayini liqakathekile.
1
Ubamkhulu ubukele umabonakude ekhaya ngeLanga lokuBuyisana.
-
“Bamkhulu, uyini Umkhonto weSizwe? Begodu khuyini ukubuyisana?” kubuza uPuseletso.
-
“Ubuza imibuzo eminengi ngesikhathi esisodwa. Lalela, akhese ngikufundise!” kutjho ubamkhulu.
2
“I-MK bekumasotja we-ANC. Balwa nombuso we-aparteyidi. I-aparteyidi mthethokambiso owawuhlukanisa abantu bemihlobo nemibala engafaniko,” kuhlathulula ubamkhulu.
-
“Namhlanjesi abantu bathabile ngombana kulilanga lokucolelana nokubuyisana,” kutjho yena.
3
“Uyakhumbula lokha nakhange ukhulumise uDikeledi iveke yoke?” kubuza ubamkhulu.
-
UPuseletso uvuma ngehloko.
-
“Begodu kancazana nabuye naba bangani godu?” uPuseletso uvuma godu ngehloko.
-
“Lokho kukucolelana nokubuyisana,” kutjho ubamkhulu amomotheka.
4
“Umhlaka-16 kuNobayeni lilanga lokucolelana nokubuyisana,” kusaraga ubamkhulu.
-
“Ilanga leli linomlando omude. Umlando uthoma ngepi eyaba khona eminyakeni yakade, ngomhlaka-16 kuNobayeni ngomnyaka we-1838.”
5
“Ngelanga lelo emlandweni, amabutho weKosi yamaZulu uDingane namaVoortrekere balwa ipi ekulu eduze komlambo iNcome.”
-
“Ngubani owathumbako?” kubuza uPuseletso.
6
Ubamkhulu waphendula, “AmaVoortrekere athumba. Kwaba sikhathi eside bagidinga ukuthumba kwabo ngomhlaka-16 kuNobayeni. Ilangeli balibiza ngokuthi liLanga leemFungo.
7
Ngemva kwalokho, ngomnyaka we-1962 ngomhlaka-16 kuNobayeni, kwabunjwa Umkhonto weSizwe.
-
La bekumasotja we-ANC ebekazimisele ukulwa nombuso webandlululo.
8
“Bamkhulu, kuhlekuhle yini eyenza Umkhonto weSizwe ngemuva kweminyaka eminengi kangaka yebandlululo?” kubuza uPuseletso.
-
“Kuneenzathu ezimbalwa. Lokho okwenzeka emtjhagalweni wokulwela amaDompas kwaba ngesinye isizathu esikhulu,” kutjho ubamkhulu.
-
“Alo khuyini iDompas?” kubuza uPuseletso.
9
Ubamkhulu waphendula wathi, “Idompas ngumazisi wakade. Boke abantu abanzima babebakatelelwa ukobana baphathe iincwadi zikamazisi.”
-
“Ngomnyaka we-1960, emtjhagalweni onokuthula owabe umayelana nokwala ukuphatha iincwadi zikamazisi, amapholisa asahlela labo ebebatjhagala. Amapholisa webandlululo abulala abe alimaza nabantu e-Sharpeville nge- Gauteng.”
10
“Imiraro yakade ihlukanise abantu abaNzima nabantu abaMhlophe,” kutjho ubamkhulu adosa ummoya.
-
Ubungani bungakhelwa phezu kweqiniso kwaphela. Kufanele kwaziwe bona kwenzekani phakathi kwabantu abaNzima nabantu abaMhlophe ngebanga lebandlululo,” kutjho ubamkhulu.
11
“Alo kulula ukucolelana ngemuva kwezipikazi ezingaka?” kubuza uPuseletso.
-
“Awa khona akusilula. Kodwana ukobana sitjhinge phambili, ukucolelana nokubuyisana kuqakathekile hlangana nabantu,” kuphendula ubamkhulu.
-
“Ukubuyisana akuzi msinya. Ukubuyisana kuthatha isikhathi eside,” kuzaliselela ubamkhulu.
12
“Lokha omunye umuntu nakenze iphoso, kufanele akhulume iqiniso bese ubawa ukulitjalelwa kiloyomuntu amonileko. Ngemva kwalokho, bangathoma balungise ubudlelwano babo,” kuhlathulula ubamkhulu.
-
“Bewulalelisise kuhle. Asibukele lokho ofuna ukukubukela kumabonakude!” kumomotheka ubamkhulu.
13

——Imibuzo


  1. Ligidingwa nini iLanga lokuBuyisana? Kubayini liyiholideyi yomphakathi?
  2. Bekubobani Umkhonto weSizwe?
  3. Bekubobani ama-Voortrekere?
  4. Bekuyini ibandlululo?
  5. Ngamagama wakho hlathulula bona ‘ibandlululo’ litjho ukuthini.
  6. Abantu bangakuzuza njani ukubuyisana?
14

——Iincwadi eziselungelungeni leli


  • Ilanga lokuBuyisana
  • Ilanga leKululeko
  • Ilanga lamaGugu
  • Ilanga lamaLungelo wobuNtu
  • Ilanga laboMma
  • Ilanga labaSebenzi
  • Ilanga leLutjha
15

——


Indatjana le yatlhanywa begodu yatlolwa ngelimi leSetswana, njengengcenye yephrojekthi yeZenex Ulwazi Lwethu ye-2020 yeencwadi ezingafundwa.
16
Attribution CC BY
Your attribution should include the following:
Title: Ilanga lokuBuyisana
Author/s: Refilwe Ramagoshi
Translator/s: Sponono Mahlangu
Illustrator/s: Tebogo Matshana
Assurer/s: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator