Yebo na vatswari va yena a va tshama enhoveni.Eka ndhawu yaleyo, a ku tshama Vhimbamukwama wa xihontlovila.Vhimbamukwama a dumile hi ku dya swihlangi.

Sikwebu, tatana wa Yebo a ri muhloti. Loko a vuya ekaya, a huwelela a ku, “Yebo! Yebo! Tana u ndzi hlanganisa n’wananga.”Yebo a ta ku eka mana wa yena, “Tatana wa ndzi vitana. Ndzi fanele ndzi ya n’wi hlanganisa.”Vhimbamukwama u swi vonile leswi hinkwaswo.

Vhimbamukwama u ringetile ku encisela Sikwebu,“Yebo! Yebo! Tana u ndzi hlanganisa n’wananga.”A swi tiva ku ri a nga twali ku fana na Sikwebu.“Xana ndzi nga cinca njhani rito ra mina?” a tivutisa.

Vhimbamukwama u yile a ya lava ku pfuniwa eka xingomatanda.“Xana ndzi nga cinca njhani rito ra mina ri fana ni ra vanhu?” a vutisa.“Hisa xihloka ku fikela xi tshwukuluka, kutani u xi mita hinkwaxo,” ku tsundzuxa xingomatanda.

Vhimbamukwama u yile ekaya a mita xihloka xo hisa.Kutani a huwelela, “Yebo! Yebo! Tana u ndzi hlanganisa n’wananga.”E-e! Rito ra yena a ri nga fani na ra Sikwebu. A ri bonga.

Vhimbamukwama a nga tsakangi kutani a tlhelela eka xingomatanda.“Xana ndzi nga endla yini ku kuma rito ro lala, ro fana ni ra vanhu?” a vutisa.“Sweswi, hisa xihloka vusiku hinkwabyo kutani na mixo, u xi mita hinkwaxo,” ku hlamula xingomatanda.

Endzhaku ka loko a endlile leswi a byeriweke, Vhimbamukwama u yile a ya huwelela, “Yebo! Yebo! Tana u ndzi hlanganisa n’wananga.”Rito ra yena a ri fana ni ra Sikwebu.Yebo u tsutsumerile ehandle.Kambe a ku nga ri tatana wa yena.

U lemuke xihoxo xa yena nkarhi wu fambile!U ringetile ku tlhelela endzeni, kambeVhimbamukwama a n’wi khomile.U rhwarile Yebo ku fana na xigodo a famba na yena endzeni ka nhova.

Ku nga si hela nkarhi, Sikwebu u fikile a huwelela, “Yebo! Yebo! Tana u ndzi hlanganisa n’wananga.”Kambe Yebo a nga fikangi. Manana wa yena a hlamula, “U n’wi huwelerile khale.”Va lemukile leswaku n’wana wa vona u tekiwile hi Vhimbamukwama.

Sikwebu u tekile nhonga ya yena yo hlota kutani a ya enhoveni ku ya lava jaha ra yena.Hi le kulenyana u vonile u a pavalarile eribuweni ra nambu. A ri na nkwama wukulu ekusuhi na yena.

Sikwebu nyandlamerile ekusuhi na Vhimbamukwama. Loko a ri ekusuhi, u jikijekele nhonga liya a ba Vhimbamukwama.Vhimbamukwama u tlurile kusuka evurhongweni a baleka.Sikwebu u chuchile nkwama a humesa jaha ra yena.

Sikwebu u vukarhile jaha ra yena. A tsakile ku va a vuyelelanile na yena. Yebo a tsakile ku vona tatana wa yena.Va rivarile hi Vhimbamukwama kutani va tlhelela ekaya.