Yebo na vhabebi vhawe vha dzula ḓakani.Tsini na hune vha dzula hone, hu dzula Zim zim, ḽidyavhathu.Zim zim u ḓivhelwa u ḽa vhana.

Vho Sikwebu, khotsi a Yebo vho vha vhe muzwimi. Musi vha tshi vhuya hayani, vho vha vha tshi vhidzelela vha ri, “Yebo! Yebo! Kha ḓe ṅwananga.”Yebo o vha a tshi ri kha mme awe, “Baba vha khou mmbidza. Ndi fanela u ya khavho.”Zim zim a vhona hezwi zwithu zwoṱhe.

Zim zim a lingedza u edzisa Vho Sikwebu, “Yebo! Yebo! Kha ḓe ṅwananga.”O vha a tshi zwi ḓivha uri ha pfali sa Vho Sikwebu.“Ndi nga shandukisa hani ipfi ḽanga?” ndi musi a tshi khou humbula.

Zim zim a ṱoḓa thuso kha muloi.Ndi nga shandukisa hani ipfi ḽanga uri ḽi nge ḽa muthu?” ndi Zim zim a tshi vhudzisa.“Fhisa mbaḓo u swikela i tshi vha tswukutswuku, nahone u i mile yoṱhe,” muloi a tshi eletshedza.

Zim zim a ya hayani a mila mbaḓo i fhisaho.Nga murahu a vhidzelela, “Yebo! Yebo! Kha ḓe ṅwananga.”Hai! Ipfi ḽawe ḽo vha ḽi sa fani na ḽa Vho Sikwebu. Ḽo vha ḽi ḽidenya nga maanḓa.

Zim zim a so ngo takalaho a vhuyelela kha muloi.“Ndi fanela u ita mini uri ndi vhe na ipfi ḽo sekenaho ḽa muthu?” ndi Zim zim a tshi vhudzisa.“Zwino, fhisa mbaḓo vhusiku hoṱhe nahone nga matsheloni u i mile yoṱhe,” ndi muloi a tshi fhindula.

Nga murahu ha uri a ite zwe a vhudzwa zwone, Zim zim a ya a vhidzelela, “Yebo! Yebo! Kha ḓe ṅwananga.”Ipfi ḽawe ḽo vha ḽi tshi fana kokotolo na ḽa Vho Sikwebu. Yebo a gidimela nnḓa.Fhedzi ho vha hu si khotsi awe.

Yebo o ṱhogomela vhukhakhi hawe fhedzi, o vha o no lenga.O lingedza u gidimela nga ngomu, fhedzi Zim zim a mu fara nga hu leluwaho.O fara Yebo sa danda nahone a mu isa ngomungomu ḓakani.

Nga u ṱavhanya, Vho Sikwebu vha vhuya hayani nahone vha vhidzelela, “Yebo! Yebo! Kha ḓe ṅwananga.”Fhedzi Yebo a sa ḓe. Mme awe vha fhindula, “Vho no ḓi mu vhidza.”Vha zwi ṱhogomela uri ṅwana wavho o dzhiiwa nga Zim zim.

Vho Sikwebu vha dzhia thanda yavho ya u zwima nahone vha ya ḓakani uri vha ṱoḓe murwa wavho.Vhe kule, vha vhona Zim zim o eḓela philiphilini ya mulambo. O vha e na saga ḽihulwane tsini nae.

Vho Sikwebu vha ṋenga vha tshi ya kha Zim zim. Musi vho no vha tsini, vha dzhia thanda ndapfu vha rwa Zim zim.Zim zim e vukuluku, a fhufhela nṱha o ḓaḓa a shavha.Vho Sikwebu vha vhofholola saga nahone vha bvisa murwa wavho.

Vho Sikwebu vha kuvhatedza murwa wavho, vho takalela u dovha vha ṱangana nae. Yebo o vha o takala u vhona khotsi awe.Vha hangwa nga ha Zim zim nahone vha humela hayani.