Yebo le batswadi ba hae ba ne ba dula morung.Hona sebakeng seo, ho ne ho dula ledimo le bitswang Zim-zim.Zim-zim o ne a tsejwa ka ho ja bana.

Ntate wa Yebo Sikwebu, e ne e le setsomi. Kamehla ha a kgutla hae o ne a hweletsa a re, “Yebo! Yebo! Tloho o nkgahlanyetse mora ka.”Yebo o ne a ye a re ho mmae, “Ntate o a mpitsa, ke tshwanetse ho mo kgahlanyetsa.”Zim-zim a elelletswe hona.

Zim-zim a leka ho etsisa Sikwebu, “Yebo! Yebo! Tloho o nkgahlenyetse mora ka.”O ne a tseba hore ha a bue jwaloka Sikwebu.“Nka kgona jwang ho fetola lentswe la ka?” a ipotsa.

Zim-zim a ya batla thuso ho moloi.“Nka kgona jwang ho fetola lentswe la ka hore le tshwane le la batho?” ho botsa ledimo.“Tjhesa selepe ho fihlela se e ba sekgubedu e be o se kwenya se felletse,” ke moloi a mo eletsa.

Zim-zim a ya hae a kwenya selepe se tjhesang.Yaba o a hweletsa, Yebo, “Yebo! Yebo! Tloho o nkgahlanyetse mora ka.”Tjhe! Lentswe la hae le ne le sa tshwane le la Sikwebu, le ne le tebile haholo.

Zim-zim a kgutlela ho moloi a sa thaba.“Ke lokela ho etsang hore lentswe la ka le be lesesane jwaloka la batho?” a botsa.“Kgetlong lena, tjhesa selepe bosiu bohle ebe hoseng o a se kwenya,” ho araba moloi.

Kamora ho phethisa ditaelo, Zim-zim a ya hweletsa, “Yebo! Yebo! Tloho o nkgahlanyetse mora ka.”Lentswe la hae le ne le tshwana hantle le la Sikwebu. Yebo a phakisa a ya kantle.Empa e ne e se ntatae.

Yebo a elellwa phoso ya hae ho se ho le lata.A leka ho baleha ka tlung empa Zim-zim a mo tshwara ha bonojwana feela.O ne a jere Yebo jwaloka ka kutui mme a ya le yena harehare morung.

E se kgale, Sikwebu a fihla hae a hweletsa,“Yebo! Yebo! Tloho o nkgahlanyetse mora ka.”Yebo a se ke a hlaha. Mme wa Yebo a araba, “O se o mmitsitse.”Ba hlokomela hore ngwana bona o nkuwe ke Zim-zim.

Sikwebu a nka molamu wa hae wa ho tsoma a ya morung ho ya batla mora hae.A sa le hole, a bona Zim-zim a robetse lebopong la noka. Ho ne ho ena le mokotlahadi pela hae.

Sikwebu a nanarela Zim-zim. Ha a se a le haufi, a mo otla ka molamu.Zim-zim a tshoha, a tlola a ferekane a baleha.Sikwebu a tlamolla mokotla a ntsha mora hae.

Sikwebu a haka mora wa hae, a thabetse ho kopana le yena hape. Yebo le yena o ne na thabetse ho bona ntatae.Ba lebala ka Zim-zim ba kgutlela hae.