Yebo le batswadi ba gagwe ba be ba dula sethokgweng.Gona tikologong yeo, go be go dula lekgema la go bitšwa Zim-zim.Zim-zim o be a tumile ka go ja bana.

Tatago Yebo, Sikwebu e be e le motsomi. Ge a boa gae, o be a bitša a re, “Yebo! Yebo! Etla o ntlhakanetše ngwanaka.”Ke moka Yebo o tla re go mmagwe, “Tate o fihlile, o a mpitša. Ke swanetše go yo mo hlakanetša.”Zim-zim o be a di lebeletše tše ka moka.

Zim-zim o ile a leka go ekiša Sikwebu, “Yebo! Yebo! Etla o ntlhakanetše ngwanaka.”O ile a lemoga gore lentšu la gagwe le be le sa swane le la Sikwebu.“Na nka fetoša bjang lentšu la ka?” a ipotšiša.

Zim-zim a ya go kgopela thušo go ramahlale.“Na nka fetoša bjang lentšu la ka gore le swane le la motho?” a botšiša.“Fiša selepe ka mollo go fihlela se eba se se khubedu gomme o se metše ka moka ga sona,” ramahlale a mo eletša bjalo.

Zim-zim a ya gae gomme a metša selepe sa go fiša.Ke moka a bitša, “Yebo! Yebo! Etla o ntlhakanetše ngwanaka.”Aowa! Lentšu la gagwe le be le sa swane le la Sikwebu. Le be le na le makgwakgwa.

Zim-zim o be a nyamile gomme a boela go ramahlale.“Na nka dira eng gore ke be le lentšu le le sesane la motho?” a botšiša.“Bjale o swanelwa ke go fiša selepe bošego ka moka gomme o se metše ka moka ga sona mesong,” ramahlale a araba.

Ka morago ga go dira seo a boditšwego, Zim-zim a ya a bitša, “Yebo! Yebo! Etla o ntlhakanetše ngwanaka.”Lentšu la gagwe le be le swana gabotse le la Sikwebu. Yebo a kitimela ka ntle.Efela e be e se tatagwe.

Yebo o lemogile phošo ya gagwe morago ga nako!O ile a leka go kitimela morago efela Zim-zim a mo swara gabonolo.A kuka Yebo go swana le legong gomme a ya le yena kua sethokgweng.

Go se go ye kae, Sikwebu a boa gae gomme a bitša, “Yebo! Yebo! Etla o ntlhakanetše ngwanaka.”Efela Yebo a se tšwelele. Mmagwe a mo araba a re, “O šetše o mmiditše.”Ba ile ba lemoga gore ngwana wa bona o tšerwe ke Zim-zim.

Sikwebu o ile a tšea molamo wa gagwe wa go tsoma gomme a tsena sethokgweng go yo nyaka morwa wa gagwe.Ge a sa le kgojana, a bona Zim-zim a ikotlolla, a robetše lebopong la noka. Go be go na le mokotla wo mogolo kgauswi le yena.

Sikwebu a khukhunetša Zim-zim. Ge a le kgauswi, a hwidinya molamo wo motelele a betha Zim-zim.Zim-zim a fofa go tšwa moo a bego a robetše, a gakanegile gomme a tšhaba.Sikwebu a bofolla mokotla gomme a lokolla morwa wa gagwe.

Sikwebu o ile a gokarela morwa wa gagwe, a thabetše go mo hwetša a sa phela. Yebo le yena o be a thabetše go bona tatagwe.Ba ile ba lebala ka Zim-zim gomme ba boela gae.