Ho ne ho ena le ngwanana ya bitswang Maṱodzi.Maṱodzi o ne a dula motseng le mmae le nkgonae.

Ka tsatsi le leng, mmae a mo roma ho isa molaetsa ho rakgadiae ya neng a dula motseng o mong.“Latela tsela yeo re e sebedisang ka nako tsohle,” ke mmae yeo a mohopotsa.

Maṱodzi a latela tsela yeo a e tlwaetseng ho ya ha rakgadiae ho isa molaetsa.Ha a le tseleng a kgutlela hae, a utlwa lentswe le fokolang haufi le yena le reng, “A ko nthuse hle.”

Maṱodzi a thalatsa, a bona mosadi ya robetseng ka thoko ho tsela.A dumedisa mosadi yeo mme a mmotsa, “Ke hobaneng ha o robetse moo?”

“Ke a fokola, ke a kula, hape ke hole le lehae la ka,” ho araba mosadi.Maṱodzi a utlwela mosadi yeo bohloko.

A re ho mosadi, “Ke tla ho isa heso hobane ho haufinyana.”Maṱodzi a thusa mosadi ho ema. Ba tsamaya butle ho fihlela ba fihla hae.

Maṱodzi le mmae le nkgonae ba hlokomela mosadi yeo ho fihlela a eba betere.

Mosadi a ba leboha haholo ka tlhokomelo yeo ba mo neileng yona.A thoholetsa Maṱodzi ka botho ba hae le sebete seo a nang le sona.

Mosadi a re ho Maṱodzi le ba lelapa la hae, “Ha nkake ka lebala molemo oo le nketseditseng ona.Ka mora matsatsi a mararo, ke batla hore le etse ditabatabelo tse pedi."

Ka mora matsatsi a mararo, Maṱodzi, mmae le nkgonae ba etsa ditabatabelo tse pedi.Tabatabelo ya pele e ne e le ho ba le ntlo e ntle.

Tabatabelo ya bobedi ya eba hore ntlo ya bona e be haufi le moru hore ba seke ba sokola ho rwalla patsi.Ditabatabelo tsa bona tsa phethahala jwalo feela ka ha mosadi a ne a ba bolelletse.

Maṱodzi le ba lelapa labo ba phela ha monate ntlong ya bona e ntle e haufi le moru.