Go be go na le mosetsana yo a bego a bitšwa Maṱodzi.Maṱodzi o be a dula motseng wa gabo le mmagwe le koko wa gagwe.

Ka letšatši le lengwe mmagwe o ile a mo roma motseng wo mongwe gore a fihliše molaetša go rakgadi wa gagwe.“O latele tsela ye re tlwaetšego go e šomiša,” Mmagwe a mo gopotša.

Maṱodzi o ile a latela tsela ye a e tlwaetšego go ya motseng wa rakgadi wa gagwe gomme a fihliša molaetša.Ge a le tseleng ya go boela gae, a kwa lentšu la go fokola le re, “Anke o nthuše hle.”

Maṱodzi a lebelela ka mathoko gomme a bona mosadi a robetše ka thoko ga tsela.O ile a mo dumediša gomme a botšiša a re: “Goreng o robetše mo?”

“Ke kgole le gae, ke a lwala ebile ga ke na maatla,” mosadi a mo araba.Maṱodzi a mo kwela bohloko.

A re go mosadi yola, “Ke tla go iša ga gešo ka ge e le kgauswi.”Maṱodzi a thuša mosadi yola go emelela. Ba ile ba sepela ka go nanya go fihlela ba tsena.

Maṱodzi, mmagwe le koko wa gagwe ba ile ba thuša go hlokomela mosadi go fihlela a eba kaone.

Mosadi a ba leboga kudu ge ba mo hlokometše. A tumiša Maṱodzi ka go ba le sebete le tlhokomelo.

Mosadi o ile a botša Maṱodzi le ba gabo a re: “Nka se tsoge ke lebetše seo le ntiretšego sona.Ka morago ga matšatši a mararo, ke nyaka gore le bolele dikganyogo tša lena tše pedi.”

Ka nnete, ka morago ga matšatši a mararo, Maṱodzi, mmagwe le koko wa gagwe ba bolela dikganyogo tša bona tše pedi.Kganyogo ya bona ya mathomo e be e le ya go re ba be le ntlo ye botse.

Kganyogo ya bobedi e be e le go re ba be le sethokgwa kgauswi le ntlo ya bona gore ba kgone go hwetša dikgong.Dikganyogo tša bona di ile tša phethagala, bjale ka ge mosadi a boletše.

Maṱodzi le ba gabo ba ile ba phela ka lethabo ntlong ya bona kgauswi le sethokgwa.