Kadzeni, tilwane taphelelwa ngemanti.Tafuna yonkhe indzawo kepha atizange tiwatfole.

Tahlangana kute titfole sisombululo salenkinga. Tonkhe tilwane teta emhlanganweni, ngaphandle kwaJakalasi.Jakalasi watsi, “Ngitawuya njani emhlanganweni lonetimfudvu letinukako?”Loko kwatitfukutselisa leletinye tilwane.

Emhlanganweni, tilwane tavumelana kutsi kufanele timbe umtfombo wemanti.Inyamatane, umholi watsi, “Lomtfombo wetfu utawujula futsi ube banti. Nasewugcwele, ngeke siphindze siphelelwe ngemanti.”

Tahlabela futsi tadansa njengobe betishintjana ngekumba umtfombo.Masinyane, emanti abhoboka emhlabatsini futsi agcwala umtfombo.Tajabula kakhulu tilwane. Betingakaze setiweve emanti lamnandzi nalahlobe kangaka.

Kwatsi ngalelinye lilanga, tilwane tabona kutsi kunalotsite lobekangcolisa emanti ato.Betishintjana ngekugadza umtfombo.

Ngesikhatsi Logwaja kunguye logadze umtfombo, Jakalasi weta aphetse ingcatfu.“Wentani lapha?” kubuta Jakalasi.“Ngigadze emanti etfu,” kuphendvula Logwaja.

Jakalasi wacela Logwaja kutsi ete atodlala naye. Bebashintjana ngekubophana ngentsambo.Lomdlalo bewufuna lodlalako kutsi avale emehlo, aboshwe ngentsambo, bese abala kufike enkhulungwaneni bese uvula emehlo akhe.Logwaja wavuma.

Logwaja wabopha Jakalasi, yena wabala waze wafika enkhulungwaneni. Logwaja wase uyamkhumula.Jakalasi wabese ubopha Logwaja, wavala emehlo wacala kubala. Jakalasi wanatsa emanti emtfonjeni, futsi wabhukusha. Nakacedza, Jakalasi wakha emanti wase uyahamba.

Logwaja wacedza kubala afike enkhulungwaneni wabese uvula emehlo akhe.Jakalasi besekanyamalele.Logwaja wamemeta letinye tilwane kutsi tite titomkhumula.

Tilwane tachubeka nekugadza umtfombo ngekuntjintjana, kepha tonkhe betehluleka kubamba Jakalasi. Fudvu watsi, “Ngisacela kube ngimi logadzako.”“Fudvu akakahlakaniphi kangako futsi akakwati nekugijima,” kwacabanga leti letinye tilwane. Fudvu wangena ekhatsi emtfonjeni walindza Jakalasi.

Nakefika Jakalasi, wacabanga, “Kute lokhona lapha!”Njengobe anatsa, weva intfo imluma emphumulweni. Ngemva kwaloko wadvonselwa ngephansi kwemanti!Jakalasi wetama kubaleka, kepha Fudvu wambamba wamcinisa. “Wotani, ngimbambile!” kwamemeta Fudvu.

Tilwane teta tafike tambopha Jakalasi. Fudvu watsi kuJakalasi, “Usiphatse kabi sonkhe. Sijeziso sakho sikutsi ugeze tidladla tetfu.”Tonkhe tilwane tahalalisa tatsi Fudvu lichawe lato.Kusukela ngalelolanga, tajabulela kunatsa emanti lahlobile kungekho lokutihluphako.