Bogologolotala, diphologolo tsa naga di ne tsa tlhoka metsi.Di ne di lebelela gotlhe mme go sena sepe.

Di ne tsa kopana go rarabolola bothata jwa tsona. Diphologolo tsotlhe di ne tsa tsenela kopano kwa ntle ga phokoje.Phokoje a re, “Nka tsenela kopano jang le khudu e e nkgang?”Se, se ne sa galefisa diphologolo tse dingwe.

Kwa kopanong, diphologolo tsa dumalana ka go epa sediba.Tshepe, moetapele a re, “Sediba sa rona se tla nna boteng le bophara. Fa se tletse, re ka se tlhoke metsi gape.”

Di ne di opela mme di bina fa di ntse di epa sediba ka go neeletsana.Bofelong, metsi a phunyega mme a tlatsa sediba.Di ne di itumetse. Di ne di ise di nne le tatso ya metsi a a botshe a le monate go tshwana le a.

Jaanong, letsatsi lengwe, diphologolo tsa lemoga fa mongwe a tlatsa metsi a tsona leswe.Tsa refosana ka go disa sediba.

E rile fa mmutla a le mo tirong a disitse sediba, phokoje a tlhaga a tshwere kgati.“O batla eng fa?” ga botsa phokoje.“Ke disitse metsi a rona,” ga araba mmutla.

Phokoje a kopa mmutla gore a tshameke le ena. Ba refosana ka go gokelana.Motshameko o ne o tsenyeletsa go tswala matlho, fa o gokelelwa mo kgating, go balwa go fitlha ka sekete mme o bule matlho.Mmutla a dumela.

Mmutla a gokelela phokoje, yo o neng a bala go fitlha ka sekete. Mmutla a mo golola.Jaanong, phokoje a gokelela mmutla, yo o neng a tswetse matlho mme a simolola go bala.Phokoje a nwa go tswa mo sedibeng, a thuma morago ga moo, phokoje a gelela metsi a tsamaya.

Mmutla a fetsa go bala go fitlha go sekete mme a bula matlho.Phokoje o ne a timeletse, a sa bonwe.Mmutla a goeletsa diphologolo tse dingwe gore di tle go mmofolola.

Diphologolo di ne tsa tswelela ka go refosana ka go disa sediba, mme tsotlhe tsa palelwa ke go tshwara phokoje.Khudu a re, “E re ke nne ke disitse.”“Khudu ga e botlhale le e seng. Ke phologolo ya go siana,” ga nagana tse dingwe. Khudu a thobuela mo sedibeng a emela phokoje.

Fa phokoje a fitlha, a nagana, “Ga go ope fa.”Fa a ntse a nwa a utlwa a lomiwa mo nkong. Jaanong, a gogelwa kwa tlase ga metsi.Phokoje o ne a leka go tswela kwa ntle, fela khudu a mo tshwarelela. “Tlayang, ke mo tshwere,” ga goeletsa khudu.

Diphologolo tsa fitlha tsa bofelela phokoje. Khudu a re go phokoje, “O re senyeditse rotlhe. Kotlhao ya gago ke go phepafatsa maroo a rona.”Diphologolo tsotlhe tsa tlotlomatsa khudu gore ke mogaka wa tsona.Go tloga letsatsi leo, tsa itumelela go nwa metsi a a phepa kwa ntle ga go tshwenngwa.