Kgalekgale diphoofolo tša naga di ile tša felelwa ke meetse.Tša nyaka gohle efela tša palelwa ke go hwetša meetse.

Di ile tša kgobokana gore di hwetše tharollo ya bothata bja tšona. Diphoofolo ka moka di be di tlile kopanong ka ntle le Phukubje.Phukubje ya re, “Nka ya bjang kopanong mo go nago le dikhudu tša go nkga?”Taba ye e ile ya befediša diphoofolo tše dingwe.

Kopanong, diphoofolo tša kwana gore di epe sediba.Kgama, moetapele wa tšona a re, “Sediba sa rena se tla išetša fase, sa ba sa bulega ka bophara. Ge se tletše, re ka se ke ra hlwa re felelwa ke meetse.”

Di be di opela, di bina ge di le gare di šielana ka go epa sediba.Mafelelong, meetse a thunya go tšwa fase gomme sediba sa tlala.Di be di thabile kudu. E be e le la mathomo di enwa meetse a bosana, a go hlaboša bjalo ka a.

Ka letšatši le lengwe, diphoofolo tša lemoga gore go na le yo mongwe yo a šilafatšago meetse a tšona.Di ile tša šielana ka go šala gae le go hlokomela sediba.

Ge Mmutla o be o šetše o hlokometše sediba, Phukubje ya tla e swere thapo ya go tshela kgati.“Na o dira eng mo?” Phukubje ya botšiša.“Ke hlokometše sediba sa rena,” Mmutla wa fetola.

Phukubje ya kgopela Mmutla gore o raloke le yona.Di ile tša šielana ka go bofana.Moraloki o swanetše go raloka a tswaletše mahlo, a bofilwe ka thapo, gomme a balela go fihla ga sekete ke moka a bula mahlo.Mmutla o ile wa dumela.

Mmutla o ile wa bofa Phukubje, yeo e baletšego go fihla ga sekete. Mmutla wa e bofolla.Ke moka Phukubje ya bofa Mmutla, woo o ilego wa tswalela mahlo gomme wa thoma go balela.Phukubje e ile ya nwa meetse ka sedibeng, ya ba ya rutha.Ka morago ga moo, Phukubje ya rwala meetse gomme ya tloga.

Mmutla o ile wa fetša go balela go fihla ga sekete gomme wa bula mahlo.Phukubje e be e timeletše.Mmutla wa goeletša diphoofolo tše dingwe gore di tle di o bofolle.

Diphoofolo tša tšwela pele ka go šielana go hlokomela sediba efela ka moka di be di palelwa go swara Phukubje.Khudu ya re, “E reng ke tšwele pele ka go lebelela.”“Khudu ga se phoofolo ye bohlale goba ya go ba le lebelo,” diphoofolo tše dingwe tša nagana bjalo.Khudu ya sobelela ka gare ga sediba gomme ya emela Phukubje.

Ge Phukubje e fihla, e be e gopola go re, “Ga go na motho mo sedibeng!”Ge e le gare e enwa meetse, ya kwa e longwa mo nkong. Ke moka ya gogelwa ka gare ga meetse go iša fase ga sediba!Phukubje e ile ya leka go phonyokga, efela Khudu ya e swara ka maatla. “Etlang, ke mo swere!” Khudu ya goeletša.

Diphoofolo tša tla gomme tša bofa Phukubje.Khudu ya re go Phukubje, “O re diretše phošo ka moka ga rena. Kotlo ya gago ke go re hlapiša marofa ka moka ga rena.”Diphoofolo ka moka tša tumiša bogale bja Khudu.Go tloga lona letšatšing leo, diphoofolo tša ipshina ka go nwa meetse a go hlweka ntle le mathata.