Emakhompuyutha lahlakaniphile aTshilidzi Marwala
Ndivhuho Mutsila
Thulisile Shongwe
Siswati
Longer paragraphs

——


Lencwadzi yetindzaba ikhuluma ngaTshilidzi Marwala.
-
UnguSosayensi wemaKhompuyutha naNjiniyela weMishini waseNingizimu Afrika.
-
Lendzaba ikhuluma ngendlela Tshilidzi waseDuthuni laba ngayo nguchwepheshe lowatiwa emhlabeni wonkhe kuSayensi nakuThekhnoloji.
1
Tshilidzi Marwala watalelwa endzaweni yasemakhaya esigodzini saseDuthuni, eLimpopo. Wakhuliswa batali bakhe kanye nagogo wakhe, Tshianeo.
-
Gogo Tshianeo bekenta tindziwo ngelubumba. Indlela labehlobisa ngayo tindziwo takhe beyifana nebunjinyela bemvelo.
2
BuNjiniyela buyiSayensi yekuhlela tintfo nekutakha, njengemishini netakhiwo.
-
Gogo Tshianeo bekabati buNjiniyela bekwenta tindziwo tesintfu.
-
Tshilidzi bekakutsandza kubukela gogo wakhe enta tindziwo, aphindze amsite.
3
Bekacale ente indingilizi lesicaba letawuba sisekelo seludziwo lwakhe.
-
Ngemva kwaloko, bekabese wenta tinhlangotsi teludziwo ngelubumba lolwengetiwe.
-
Gogo bekomisa tindziwo takhe ngekutibeka elangeni bese utifaka emlilweni.
4
Lomlilo bewushisa ngalokwenele kute ubhake lubumba.
-
Kubhaka lubumba ngemlilo loshisa bhe komisa onkhe emanti lasuke akulolubumba. Loku kwenta kutsi lubumba lucine kakhulu.
-
Tindziwo tagogo beticina futsi tihlale sikhatsi lesidze.
5
Lutsandvo lwaTshilidzi lweSayensi nebuNjiniyela lwaphindze lwakhiwa ngubabe wakhe.
-
UMnu Marwala bekanguthishela weTibalo esikolweni sendzawo.
-
Asengakafundzi kubala ngekuphindzaphindza esikolweni, Tshilidzi wafundza kuphindza tinombolo ngekufundza tincwadzi tababe wakhe.
6
Tshilidzi bekahlala anelilukuluku lekwati tintfo. Ebusuku, bekatsatsa lithoshi lababe wakhe alikhanyise bese ulibhekisa etulu kuze abone lakugcina khona sibhakabhaka!
-
Ngemva kwekucedza sikolo semabanga laphansi, Tshilidzi wahamba esigodzini sakubo wayohlala esikolweni sasedolobheni lekutsiwa yiShayandima.
7
Kuhlala esikolweni bekumnandzi ngobe bekahlangana nebantfu lacala kubabona. Wafundza kwetayela bantfu labekuhlukahlukene.
-
Tshilidzi wabese uyofundza Esikolweni Semabanga Laphakeme saseMbilwi.
-
Tshilidzi bekatsandza thishela weTibalo nathishela weSayensi. Bebamkhutsata kutsi afundze futsi asebente ngekutimisela.
8
Emnyakeni wakhe wekugcina esikolweni, Tshilidzi wawina umncintsiswano we National Youth Science Olympiad.
-
Wawina neluhambo lwekuya ‘Emhlanganweni Wemhlaba Wonkhe Walabasha Labenta iSayensi’ eNgilandi.
-
Tshilidzi wafundzela buNjiniyela beMishini eNyuvesi yasePitoli. Wachubekisela embili tifundvo takhe eNyuvesi yaseCambridge.
9
Tshilidzi bekatsandza indlela iThekhnoloji lengatigucula ngayo timphilo tetfu. Wafundzela iSayensi yemaKhompuyutha eNgilandi.
-
Ngemva kwaloko, wafundzela iThekhnoloji nebuNjiniyela eMelika.
-
Nasekwedlule iminyaka leminyenti afundza, Tshilidzi wancuma kuletsa lwati lwakhe ekhaya, eNingizimu Afrika.
10
Wacala kusebenta njengemsunguli we-software yemakhompuyutha, wasebenta ngebuciko lobentiwa ngemakhompuyutha.
-
Buciko lobentiwa ngemakhompuyutha ngulapho imishini yenta khona imisebenti levame kudzinga kuhlakanipha kwebantfu.
-
Tshilidzi wasungula luhlelo lwe-software lolwenta emakhompuyutha akhone kusebenta ngetintfo!
11
Lamuhla, Tshilidzi unguchwepheshe wemhlaba wonkhe webuNjiniyela beMishini kanye neSayensi yemaKhompuyutha. Phrofesa Marwala umatasatasa ngetindlela tekwenta kutsi emakhompuyutha akwati kwentela bantfu tintfo letinyenti.
-
Nasi sibonelo, buciko lobentiwa ngemakhompuyutha bungakhona kusita bantfu emabhange, etibhedlela kanye nasetikolweni.
12
Umsebenti waTshilidzi unake kakhulu indlela iThekhnoloji lengasita ngayo ekwakheni ematfuba emsebenti nekutsi isisite siphile timphilo letincono.
-
Ufaka sandla elwatini lolumayelana neSayensi kanye neThekhnoloji.
-
Kuphila kwakhe kuveta kubaluleka kwemfundvo nekusebenta ngekutikhandla. Kanye nemandla ekuba nelilukuluku!
13

——Imibuto


  1. Bobani labenta Tshilidzi wafuna kuba nguSosayensi? Yini lekwenta usho njalo?
  2. Yini Tshilidzi layifundza esikolweni labefundza kuso?
  3. Iyini ‘iSayensi yemaKhompuyutha’? Tfola lokwengetiwe ngayo.
  4. Uyini umsebenti ‘waboNjiniyela beMishini’? Fundza ngemsebenti wabo.
  5. Yini leyenta umsebenti wagogo Tshianeo wekwenta titja telubumba kutsiwa ngumsebenti webuNjiniyela?
  6. Chaza kutsi Isayensi neThekhnoloji kusita njani ekusunguleni imisebenti kanye nekwenta imphilo ibe ncono kubo bonkhe bantfu.
  7. Fundza kabanti ngekutsi buhlakani bekwenta (i-AI) buyini.
14

——Tincwadzi letikuloluchungechunge


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Lendzaba icanjwe yaphindze yabhalwa ngesiVenda, njengencenye yephrojekthi yetintfo tekufundza te-Zenex Ulwazi Lwethu nga-2020.
16
Attribution CC BY
Your attribution should include the following:
Title: Emakhompuyutha lahlakaniphile aTshilidzi Marwala
Author/s: Ndivhuho Mutsila
Translator/s: Simangele Khoza
Illustrator/s: Thulisile Shongwe
Assurer/s: Mduduzi Benjie Shongwe
Language: Siswati

© Zenex Foundation - Saide 2025

CC BY includes the following elements:
 BY   – Credit must be given to the creator