Dikolo di ne di tswetswe dikgwedi tse dintsi ka lebaka la paka ya bosetšhaba ya thibelonakwana ya go se tswele kwa ntle. Paka ya thibelonakwana ya go se tswele kwa ntle e ne e le go diegisa go anama ga Covid-19.Dikolo di butswe gape beke e e fetileng. Barutwana ba bangwe ba sa ntse ba dutse kwa gae.Kwa sekolong sa poraemari sa Maxeke, ke nako ya thuto ya Dikgono tsa Botshelo.

Morutabana Piti o batla go itse gore barutwana ba samagane jang le matsapa a mo pakeng ya thibelonakwana ya go se tswele kwa ntle.“Ke batla go utlwa ka maikutlo a lona ka nako ya paka ya thibelonakwana ya go se tswele kwa ntle,” o ne a bolelela barutwana jalo.Sello a simolola, “Rre o dumela gore mongwe le mongwe o tshwanetse go nna le tema e e rulaganeng.”

“Ka jalo, o re tsosa moso le moso go tloga Mosupologo go fitlha Labotlhano, a batla gore re dire sengwe se se mosola go tloga 8 mesong go ya 2 thapama,” Sello a tlhalosa.Munya a botsa, “Go kaya eng, ‘sengwe se se mosola’?”“Ke go dira se se tlhokegang se le botlhokwa,” Sello a araba.

“Ee Sello, o nepile,” ga bua Morutabana Piti.Ausi wa ga Sello a tlaleletsa, “Rre o netefaditse gore paka ya thibelonakwana ya go se tswele kwa ntle e nna fela jaaka nako ya sekolo!”Neo a re, “Selo se le sengwe fela se ke se ratileng thata ka paka ya thibelonakwana ya go se tswele kwa ntle ke gore re dirile ditirwana tse dintsi mmogo re le balelapa.”

Munya a re, “Ke dumela gore ke dirisitse nako ya me sentle. Ke ithutile Dipalo gore ke tle ke tokafatse maduo a me.Ke bogetse ditshwantsho tsa thelebišene, ka tshameka metshamekonyana ya go iketla ka kwa ntle. Gape ke buisitse, go tsamaisa nako.Ke itshidilotse go nna itekanetse.”

Basani a re, “Malebana le paka ya thibelonakwana ya go se tswele kwa ntle, ke nagana gore go ne go na le molemo le bosula.”“Bonnete ba molemo ke gore ke nnile le nako ya go ikhutsa, le nako e ntle le balelapa. Ke dirisitse nako go buisa dibuka le go boeletsa tiro ya sekolo,” a tlhalosa.

A tswelela, “Ke ne ke tshwenyegile gore a bathusi ba magae ba tla amogela tuelo ya bona.Ke nnile le go tshwenyega ka balelapa le ka batho ba ba tswelelang go tlola molao.”Morutabana Piti a koba. O itse gore ka nako ya paka ya thibelonakwana ya go se tswele kwa ntle, go ne go le bonolo go ikutlwa o etseetsega e bile o tlhobaela.

Yash a re, “Re barataro mo lelapeng la rona. Le fa ke rata balelapa la me, fa ke ntse le bona gantsi, ke tlhakana tlhogo.Go rarabolola mathata a, mme o ntheketse motshameko wa Monopoly. E ne e le motshameko o ke o ratang thata wa boto fa ke le monnye.”

Yash a konosetsa, “Ke ntse ke tshameka Monopoly thata mo dibekeng di le mmalwa tse di fetileng, ebile ke nagana tiro ya thekiso ya matlo!”Amanda a tshega ka gore, “Se ke dirileng go samagana le matsapa a mo pakeng ya thibelonakwana ya go se tswele kwa ntle e ne e le go apaya le go baka. Tota ke ne ke tlhoafaletse sekolo!”Barutwana ba bantsi ba a dumela.

Morutabana Piti a re, “Go a thusa go bua le mongwe yo o mo tshepang ka moo o ikutlwang ka teng.Gompieno ke utlwile ka dintlha tse di siameng tsa gore o ka samagana jang le matsapa fa botshelo bo na le dikgwetlho.A re tsweleleng go bua ka se kamoso,” Morutabana Piti a bua jalo fa tshipi e lela.