Document

Go lebeletšana le seemo sa Covid

African Storybook

Tawanda Mhandu

Dikolo di ile tša tswalelwa dikgwedi tše mmalwa ka lebaka la kiletšo ya mosepelo nageng ka moka. Kiletšo ya mosepelo e be e nepiša go fokotša khuetšano ya Covid-19.

Ge dikolo di bulwa, barutwana ba bangwe ba be ba sa dutše gae.

Sekolong sa poraemari sa Maxeke, ke nako ya thutišo ya Mabokgoni a Bophelo gonabjale.

Morutabana Piti o nyaka go tseba gore barutwana ba be ba phela bjang ka nako ya kiletšo ya mosepelo.

“Ke nyaka go kwa ka maitemogelo a lena ka nako ya kiletšo ya mosepelo,” a realo go barutwana.

Sello o ile a thoma, “Tate o dumela gore yo mongwe le yo mongwe o swanetše go ba le mokgwa wa tlwaelo wo o beakantšwego.”

“Ka gona, o be a re tsoša mesong ye mengwe le ye mengwe go tloga ka Mošupologo go fihla Labohlano. O be a nepiša gore re dira mošomo wo bohlokwa go tloga ka iri ya 8 mesong go fihla ka iri ya 2 mathapama,” Sello a realo.

Munya a botšiša, “Na mošomo wo bohlokwa ke ofe?”

“Ke mošomo wa go ba le setšweletšwa,” Sello a fetola.

“Ee Sello, go bjalo,” morutiši Piti a realo.

Sesi wa Sello, Neo a tlaleletša, “Tate o ile a netefatša gore nako yela ya kiletšo ya mosepelo e no swana le nako ya go ya sekolong!”

Neo a re, “Selo se tee fela seo ke ipshinnego ka sona ka nako ya kiletšo ya mosepelo ke gore re be re šoma mmogo ka lapa ge re dira mešongwana ye mentši.”

Munya a re, “Ke nagana gore ke šomišitše nako ya ka gabotse. Ke be ke dira poeletšo ya mošomo wa ka wa Mmetse gobane ke nyaka go kaonafatša meputso ya ka.

Ke be ke bogela difilimi le go ithabiša ka go raloka dipapadi tša ka ntle. Gape ke be ke itloša bodutu ka go bala.

Ke be ke itšhidulla gore ke dule ke phetše gabotse.”

Basani a re, “Mabapi le kiletšo ya mosepelo, ke nagana gore go bile le tše di botse le tše mpe.

Tše di botse e bile gore ke kgonne go hwetša nako ya go khutša, ka kgona le go fetša nako ye ntši le ba lapa la gešo. Ke šomišitše nako ye go bala dipuku le go ikgopotša mošomo wa sekolo,” a hlaloša bjalo.

A iša pele ka go re, “Ke be ke tshwenyegile ka bašomi ba ka magaeng gore ba tla hwetša megolo ya bona na.

Ke be ke tšhogetše lapa la gešo ka ge batho ba sa kgaotše go tshela molao.”

Morutiši Piti a dumela ka hlogo. O a tseba gore ka nako ya kiletšo ya mosepelo, go be go le bonolo go dula o tšhogile le go belaela.

Yash a re, “Ka lapeng la gešo, re ba ba tshelelago. Le ge ke ba rata kudu, go ba ka gae ka mehla go be go ntlhakantšha hlogo.

Mma o ile a rarolla bothata bjo ka go nthekela papadi ya Monopoly. E be e le papadi ya ka ya mmamoratwa ge ke sa le ngwana.”

Yash a fetša ka go re, “Ke be ke raloka Monopoly kudu ka nako yeo. Ke ile ka ba ka nagana go šoma mošomo wa go rekiša dintlo!”

Amanda a sega gomme a re, “Seo nna ke se dirilego ka nako ya kiletšo ya mosepelo e be e le go apea le go paka dikuku. Ke be ke hlologetše sekolong e le ruri!”

Barutwana ba bantši ba dumelelana le yena.

Morutiši Piti a re, “Go bohlokwa go bolela le motho yoo re mo tshepago mabapi le maikutlo a rena.

Lehono ke kwele dikakanyo tše di botse tša go kgona go lebeletšana le mathata a bophelo.

A re tšweleng pele go bolela ka ditaba tše gosasa,” morutiši Piti a realo ge tshipi ya sekolo e lla.

——Dipotšišo

Ngwala ditlhalošo tša mebolelwana ye: go lebeletšana le, go fa mathata, go tshwenyega, tlwaelo.
Ngwala mantšu ao a ganetšanago go tšwa kanegelong.
Hlaloša motlae wa Yash.
Ke dife dikgopolo tše tharo tša go thuša go phela le ge bophelo bo na le mathata?
Na o dumelelana le kgopolo ya Basani ka kiletšo ya mosepelo? Hlaloša karabo ya gago.

——

Pukukanegelo ye e theilwe godimo ga dipego tša bana tša Radio RX. Radio RX ke seteišene sa seyalemoya sa inthanete sa bana seo se tšweletšwago le go diragatšwa ke bana, ba direla bana.

Seteišene se, se gašwa go tšwa Bookelong bja Bana bja Red Cross War Memorial go la Kapa.

Radio RX e thuša bana go anega dikanegelo mabapi le ditaba tšeo di lego bohlokwa mo go bona.

Etela RX Radio

Your attribution should include the following:
Title: Go lebeletšana le seemo sa Covid
Author/s: African Storybook
Translator/s: Dikeledi Queen Shai
Illustrator/s: Tawanda Mhandu
Assurer/s: Connie Makgabo
Language: Sepedi

© Zenex Foundation - Saide 2024

CC BY includes the following elements:
BY

– Credit must be given to the creator