Ukuqalana ne-Covid
African Storybook
Tawanda Mhandu
isiNdebele
Longer paragraphs
Iinkolo zavalwa iinyanga ezimbalwa ngesimanga sokuqinteliswa kwamakhambo kwelizwe loke. Ukuqinteliswa kwamakhambo kwabe kwenzelwe ukurhobhisa ukurhatjheka kwe-Covid-19.
-
Iinkolo zavulwa godu ngeveke egadungileko. Abanye abafundi nanje basahlezi emakhaya.
-
Esikolweni samabanga aphasi iMaxeke Primary School, sekusikhathi sesifundo samakghonofundwa wePilo.
1
UTitjhere uPiti ufuna ukutholisisa ngendlela abantwana abaphatheke ngakhona ngokuqinteliswa kwamakhambo.
-
“Ngithanda ukuzwa ngamalemuko wenu ngesikhathi sokuqinteliswa kwamakhambo,” kutjho utitjhere ebafundini bakhe etlasini.
-
“Ubaba wami ukholwa bona woke umuntu kufanele abe nehlelo elilandelwako,” kuthoma uSello.
2
“Yeke, bekasivusa woke malanga ukusukela ngoMvulo ukuyokufika ngeLesihlanu, begodu bekafuna senze nemisebenzi ebonakalako ukusukela nge-iri lobu-8 ekuseni ukuyokufikela nge-iri lesi-2 ntambama,” kutjho uSello.
-
“Ingabe kutjho ukuthini lokho, ‘into ebonakalako’?” kubuza uMunya.
-
“Kukwenza into ehle nenepumelelo,” kuphendula uSello.
3
“Iye Sello, kunjalo,” kutjho uTitjhere uPiti.
-
“Ubaba wethu wenza isiqiniseko sokobana ukuqinteliswa kwamakhambo bekufana nokuthi sikhathi sesikolo!” kungezelela udadwabo likaNeo.
-
“Into eyodwa engiyithanda ngokuqinteliswa kwamakhambo kukobana senze imisebenzi eminengi sisoke simndeni,” kutjho uNeo.
4
“Ngicabanga bona ngisebenzise isikhathi sami sokuphumula ngokuhlakanipha. Ngenze iiMbalo zami ngombana ngifuna ukwenza ngcono amamaksi wami, kutjho uMunya.
-
Ngibukele amamuvi begodu ngidlale imidlalo ngaphandle ukobana ngizithabise. Ngifunde nokobana ngibe matasatasa.
-
Ngizithabulule umzimba ukobana ngihlale nginepilo.”
5
“Mayelana nokuqinteliswa kwamakhambo, ngicabanga bona kukhona okuhle nokumbi,” kutjho uBasani.
-
“Okuhle kukobana ngibe nesikhathi sokuphumula, begodu ngithethe isikhathi sami ngahlala nomndeni wami. Ngisebenzise isikhathi lesi ukobana ngifunde iincwadi ngibuyekeze nomsebenzi wesikolo,” utjho uyahlathulula.
6
“Ngangitshwenyeke khulu ngokuthi ingabe abasebenzi bezindlini ababonomakhwitjhi bazawuthola umrholo.
-
Bengisabela umndeni wami nabantu abaragela phambili nokwephula umthetho,” utjho asaraga.
-
UTitjhere uPiti uvuma ngehloko. Uyazi bona ngesikhathi sokuqinteliswa kwamakhambo bekulula ukuzizwa ungazazi begodu nokobana usabe.
7
“Emndenini wami sisithandathu nasi soke. Ukobana ngithanda ukunande sihlangana nomndeni wami kungenza ngirhaphe,” kutjho uYash.
-
Ukurarulula umraro lo umma wathenga umdlalo we-Monopoly. Kwabe kumdlalo webhodi engangiwuthanda khulu ngisesemncani,”
8
“Bengidlala khulu umdlalo we-Monopoly eemvekeni ezigadungileko bengacabanga nokuthola umsebenzi wokuthengisa izindlu!” kuswaphelisa uYash.
-
U-Amanda uyahleka nakaqedako uthi, “Engikwenzileko ukuqalana nokuqinteliswa kwamakhambo kwabe kukupheka nokubhaga. Yo! Ngangisikhumbulile isikolo!”
-
Abafundi abanengi bavuma.
9
“Kuhle ukukhuluma nomuntu esimthembako simtjele bona sizizwa njani.
-
Namhlanjesi ngizwe imibono emihle mayelana nendlela yokuqalana nepilo lokha nakunamatjhuguluko,” kutjho uTitjhere uPiti.
-
“Asirageleni phambili nokukhuluma ngalokhu kusasa,” kutjho uTitjhere uPiti nakulila isimbi.
10

——Imibuzo


  1. Tlola ihlathululo yamabizo la: ukuqalana, iintjhijilo, ukwesaba, kwangamalanga.
  2. Tlola amagama aphikisana nalawa angehla.
  3. Hlathulula ihlaya lakaYash.
  4. Ngimiphi imibono emithathu yendlela yokuqalana nepilo lokha nayitjhugulukako?
  5. Ingabe uyavumelana noBasani?Hlathulula ipendulo yakho.
11

——

-
Indatjana esencwadini le imayelana nemibiko yomRhatjho i-RX. Umrhatjho i-RX kusitetjhi somrhatjho wethungelelwano, wenzelwe abantwana bewusetjenziswa bantwana.
-
UmRhatjho i-RX usebenza ukusuka esibhedlela i-the Red Cross War Memorial Children’s Hospital e-Cape Town.
-
UmRhatjho i-RX usiza abantwana ukobana bacoce iindatjana ngezinto eziqakathekileko kibo.
-
Vakatjhela umRhatjho i-RX
12
Attribution CC BY
Your attribution should include the following:
Title: Ukuqalana ne-Covid
Author/s: African Storybook
Translator/s: Sponono Mahlangu
Illustrator/s: Tawanda Mhandu
Assurer/s: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator