Kiletšo ya mesepelo motseng
African Storybook
Tammi Mbambo
Sepedi
Longer paragraphs
Langa o a sepela o ya sekolong. O tlogile gae e sa le mesong kudu.
-
O dula kgole le sekolo sa gagwe.
-
O thabetše go boela sekolong ka lebaka la gore dikolo di be di tswaletšwe dikgwedi tše ntši.
1
Mo tseleng, a tsena gaboMandla.
-
E šetše e le kgale Langa a sa bone mogwera wa gagwe. Ba be ba sa dumelelwa go raloka mmogo.
-
Bašemane ba thabelane gomme ba dumedišana ka ditšu le menwana ya maoto.
2
Bašemane ba tšwela pele ka go sepela. Ba thabetše go fihla sekolong.
-
Ba thabetše go bolela ka kiletšo ya mesepelo.
-
“Na le be le dira eng go netefatša gore le dula le bolokegile twatšing ye?” Langa a botšiša.
3
“Re tsoga e sa le mesong ra hlapa matsogo. Re hlapa matsogo gape pele re eja,” Mandla a fetola.
-
“Ee, re hlapa matsogo ka mehla!” Langa a dumela.
-
“Re kga meetse ka dinako tšohle,” a tlaleletša.
4
“Ke be ke tlwaetše go dula le bagwera ba ka efela gabjale ga ke sa kgona ka lebaka la gore ga se ra swanela go dula le batho ba bantši,” Mandla a realo.
-
“Go na le melao ye meswa ye mentši,” Langa a buša moya.
5
“O swanetše go khupetša nko le molomo ge o etšwa ka gae. Ge o gohlola, o swanetše go khupetša molomo wa gago ka gare ga setšu. Ge o fetša go gohlola, o swanetše go hlapa matsogo a gago,” Langa a fa maele ka go latelelana ga wona.
6
“Mo ke dulago, ga re sa kgona go raloka kgwele ya maoto,” Mandla a realo.
-
“Mo ke dulago, batšofadi ga ba sa kgona go hwetša dihlare tša bona go tšwa tliniking,” Langa a realo.
7
“Twatši le kiletšo ya mesepelo di amile maphelo a batho bao ba dulago mo motseng,” Langa a realo.
-
“Ga re sa kgona go ya toropong ka ge dinamelwa tša bohle di se sa sepela,” Mandla a realo.
8
“Batho ba bantši bao ba hwetšago tšhelete ka go rekiša ga ba sa kgona go rekiša,” Mandla a tšwela pele.
-
Bašemane ba a homola bjale. Ba rile ge ba batamela sekolo, ba thoma go sepediša.
9
Langa a re, “Ke be be thuša ka go hlatswa le go apea gore ke se lewe ke bodutu. Gape ke be ke bogela thelebišene ebile ke bala.”
-
“Nna ke be ke raloka kgwele ya ka ya maoto. Ke thuša mma, ke bala dipukukanegelo tša ka,” Mandla a realo.
-
Bašemane ba fihllile sekolong ka nako.
10

——Dipotšišo


  1. Na o be o dira eng gore o phele o bolokegile twatšing ya Corona? Hlaloša.
  2. Mo letlakaleng la 10, bašemane ba bolela ka maitemogelo a bona a dilo tšeo di fetilego. Ngwala mantšu a bona a bonagale eke ba bolela lehono (ka lebjale).
  3. Ngwala mantšu a bona a bonagale eke ba bolela gosasa (ka letlago).
11

——


Pukukanegelo ye e theilwe godimo ga dipego tša bana tša Radio RX. Radio RX ke seteišene sa seyalemoya sa inthanete sa bana seo se tšweletšwago le go diragatšwa ke bana, ba direla bana.
-
Seteišene se, se gašwa go tšwa Bookelong bja Bana bja Red Cross War Memorial go la Kapa.
-
Radio RX e thuša bana go anega dikanegelo mabapi le ditaba tšeo di lego bohlokwa mo go bona.
-
Etela RX Radio
12
Attribution CC BY
Your attribution should include the following:
Title: Kiletšo ya mesepelo motseng
Author/s: African Storybook
Translator/s: Dikeledi Queen Shai
Illustrator/s: Tammi Mbambo
Assurer/s: Connie Makgabo
Language: Sepedi

© Zenex Foundation - Saide 2024

CC BY includes the following elements:
 BY   – Credit must be given to the creator