Charlotte Maxeke, muhaga wa pfaneleo dza vhathu
Glanice Mmantshabi Masilo
Vusi Malindi
Tshivenḓa
Longer paragraphs

——


Heyi nganea i malugana na Charlotte Maxeke.
-
Nga 1901, o vha mufumakadzi wa u thoma wa Afurika Tshipembe wa u wana digirii ya yunivesithi.
-
Charlotte Maxeke o vha e mulwela pfaneleo, muthu o ṱalifhaho, na murangaphanḓa wa vhurereli.
-
Heyi bugu ya nganea i pembelela vhutshilo hawe.
1
Khanyisa na Nthuseng vha khou ya hayani vha tshi bva tshikoloni.
-
Ḓuvha ḽi khou gotsha ḓula nahone musi vha tshi fhira vhuongeloni, vha khetha u dzula murunzini wa tshitoponi tsha bisi nnḓanyana na hune ha dzhenwa hone.
-
Honovhu vhuongelo vhu vhidzwa Charlotte Maxeke Johannesburg Academic Hospital.
2
“Heeḽa, ni a ḓivha uri Charlotte Maxeke ndi nnyi, na uri ndi ngani vho vhidza vhuongelo nga dzina ḽawe?” Khanyisa u vhudzisa khonani yawe.
-
Nthuseng a fhindula, “Naho ndi tshi fhira hafha lunzhi, a thi athu ḓivhudzisa u swikela zwino.”
3
Hu fhira mutshudeni tsini na vhasidzana musi vha tshi khou amba. U khou guda Saintsi dza Mutakalo ngei Yunivesithi ya Witwatersrand.
-
“Ndi nga ni vhudza uri Charlotte o vha e nnyi!” hu amba Busisiwe, mutshudeni.
4
“Charlotte Makgomo Mannya o bebwa nga vho 1870,” hu thoma Busisiwe.
-
“Iyoo, miṅwaha i ṱoḓaho u vha 150 yo fhiraho!” hu amba Khanyisa o mangala.
-
“Ee, hu na mafhungo o fhambanaho a uri Charlotte o bebwa lini nahone ngafhi. Vhaṅwe vha ri o bebelwa Eastern Cape, ngeno vhaṅwe vha tshi ri o bebelwa Limpopo,” Busisiwe u bvela phanḓa.
5
“Charlotte o dzhena tshikolo tsha vharumiwa, he a phasa zwavhuḓi. O vha a tshi ḓivha dzinyambo na Dzimbalo. O vha a tshi kona u ṅwala Tshithosa, Tshidatshi na Tshiisimane.”
-
“Charlotte o fhedza tshikolo tsha murole wa nṱha nga u ṱavhanya u fhira vhaṅwe vhana,” Busi u imanyana.
-
“U na mashudu Charlotte!” hu amba Nthuseng.
-
“O ṱalifha Charlotte!” hu amba Khanyisa.
6
“Charlotte o vha o thanya nga maanḓa. O vha e nambi,” hu amba Busisiwe.
-
“Nga murahu ha uri daimane dzi wanale Afrika Tshipembe, muṱa wa ha Charlotte wo pfulutshela Kimberley, Northern Cape.
-
O shuma sa mudededzi nahone o vha a tshi imba na tshigwada tsha African Jubilee Choir.”
7
“Charlotte o ya England na tshigwada tsha African Jubilee Choir. Vho vha vha tshi imbela vhathu vha ndeme ngei London, nahone vha bvela phanḓa vha tshi enda vha tshi imba na ngei Amerika.”
-
“Charlotte o wana thikhedzo ya masheleni uri a gude ngei Yunivesithi ya Wilberforce kha ḽa Amerika. Yo vha i Yunivesithi ya u thoma ye ya thomiwa nga vhathu vharema vha ngei Amerika.”
8
“Musi a tshi khou guda, Charlotte o thoma u futelela kha zwa politiki. O vha a tshi ya kha maguvhangano a pfaneleo dza vhafumakadzi. O guda na muḓivhi wa Pan-Africanist a vhidzwaho W.E. Du Bois, we a vha a tshi fhisea kerekeni yawe.
-
Ngei Yunivesithi ya Wilberforce, ndi henefho he Charlotte a ṱangana hone na munna wawe, Marshall Maxeke.”
9
“Charlotte na Marshall vho vhuya Afrika Tshipembe uri vha shume sa vharumiwa. Vho vha vha tshi ṱoḓa u ita vhungoho ha uri vhana vhoṱhe vha wana pfunzo ya vhuimo ha nṱha.
-
Kereke yo vha thusa uri vha thome tshikolo ngei Johannesburg tsha vhana vha vhathu vhatswu vha Afrika Tshipembe. Vho rina tshenetshi tshikolo dzina, Wilberforce Institute.”
10
“Charlotte o ṱhogomela nga maanḓa mafhungo a matshilisano ane a kwama vhafumakadzi vha vhathu vhatswu. O vha a tshi dovha a vha muraḓo wa dzangano ḽa vhafumakadzi vha tshaka dzoṱhe.
-
O thusa u dzudzanya migwalabo i lwisanaho na milayo ya vhukoḽoni. O dzhenelela kha migwalabo ya vhashumi.
-
O vha e murangaphanḓa wa kereke, mudededzi, muṅwali na mulwela pfaneleo. O vha e muthu a mangadzaho!”
11
Busisiwe u a phetha, “Ndo guda nga ha Charlotte Maxeke ngauri ndo ḓa kha hovhu vhuongelo! Ho vha vhu tshi vhidzwa Johannesburg Hospital, fhedzi ha rinwa dzina Charlotte Maxeke nga 2008.”
-
“Ndi mufumakadzi wa ndeme kha ḓivhazwakale!” hu amba Khanyisa.
-
“Vha fanela u ri funza nga hae tshikoloni!” hu amba Nthuseng.
12
“Ndi fanela u ya kiḽasini zwino, ni sale zwavhuḓi,” hu amba Busisiwe.
-
“Ro livhuwa nge na ri ṋea nḓivho! Ri ḓo dzula ri tshi humbula nga Vhomme Charlotte, Dokotela Charlotte Maxeke,” hu amba Khanyisa.
-
“Ni songo hangwa, vhafumakadzi vha vhathu vhatswu vha na maanḓa! Ri ḓo vhonana Yunivesithi!” hu amba Busisiwe.
13

——Dzimbudziso


  1. Charlotte o bebelwa ngafhi?
  2. O dzhena ngafhi tshikolo?
  3. O vha a tshi imba na tshigwada tshifhio?
  4. Ndi dzina ḽifhio ḽa vhuongelo ḽine zwino ḽa vhidzwa nga dzina ḽawe?
  5. Charlotte Makgomo Mannya o vhingwa nga nnyi?
  6. Ndi ngani Charlotte Maxeke e wa ndeme kha ḓivhazwakale?
14

——Bugu dza tsielano iyi


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Heyi bugu ya nganea yo itwa na u ṅwalwa nga Lutswana, sa tshipiḓa tsha phurodzhekthe ya Zenex Ulwazi Lwethu ya bugu dza u vhala ya 2020.
16
Attribution CC BY
Your attribution should include the following:
Title: Charlotte Maxeke, muhaga wa pfaneleo dza vhathu
Author/s: Glanice Mmantshabi Masilo
Translator/s: Tshedza Tlhako
Illustrator/s: Vusi Malindi
Assurer/s: Doris Manyamalala
Language: Tshivenḓa

© Zenex Foundation - Saide 2024

CC BY includes the following elements:
 BY   – Credit must be given to the creator