Charlotte Maxeke sishoshovu selichawe
Glanice Masilo
Vusi Malindi
Siswati
Longer paragraphs

——


Lendzaba ikhuluma ngaCharlotte Maxeke.
-
Nga-1901, waba ngulomsikati wekucala longumuntfu lomnyama waseNingizimu Afrika lowatfola ticu tasenyuvesi.
-
Charlotte Maxeke bekasishoshovu, ahlakaniphile futsi angumholi kutenkholo.
-
Lencwadzi yetindzaba ihlonipha kuphila kwakhe.
1
BoKhanyisa naNthuseng babuya esikolweni baya ekhaya.
-
Libalele futsi njengobe bengca esibhedlela, bancuma kuphumula kancane ngephansi kwempheme wesiteshi semabhasi ngasegedeni lekungena.
-
Lesibhedlela yiCharlotte Maxeke Johannesburg Academic Hospital.
2
“Yemngani, uyati yini kutsi bekangubani Charlotte Maxeke, nekutsi yini leyenta betsa lesibhedlela ngelibito lakhe?” Khanyisa abuta umngani wakhe.
-
Nthuseng uyaphendvula, “Uyati ngihlale ngengca lapha, kepha angikaze ngacabanga ngaloko ngaphambili ngiyacala namuhla.”
3
Kwengca sitjudeni njengobe lamantfombatane acoca. Sifundzela iSayensi Yetemphilo eNyuvesi yaseWitwatersrand.
-
“Mine nginganitjela kutsi bekangubani Charlotte!” kusho Busisiwe, sitjudeni.
4
“Charlotte Makgomo Mannya watalwa ngabo-1870,” kucalisa Busisiwe.
-
“Hawu, cishe eminyakeni le-150 leyengcile!” kumangala Khanyisa.
-
“Yebo, futsi kunyenti lokushiwoko ngekutsi watalwa nini nekutsi watalelwaphi Charlotte. Labanye batsi watalelwa eMpumalanga Kapa, labanye batsi watalelwa eLimpopo,” kuchubeka Busisiwe.
5
“Charlotte wafundza esikolweni lesiyimishini, lapho lafike waphasa kahle kakhulu khona. Bekaphasa kakhulu tifundvo telulwimi netibalo. Bekakwati kubhala siXhosa, siDashi kanye nesiNgisi.”
-
“Charlotte washeshe wasicedza sikolwa kwengca labanye bantfwana,” Busi utsi kuma kancane. “Maye uyajabula Charlotte!” kusho Nthuseng. “Bekahlakaniphile Charlotte,” kusho Khanyisa.
6
“Charlotte bekahlakaniphe kakhulu. Bekaphindze abe nelivi lelihle nakahlabelela,” kusho Busisiwe.
-
“Ngemuva kwekutfolakala kwemadayimane eNingizimu Afrika, umndeni wakhaboCharlotte watfutsela eKimberley, eNshonalanga Kapa.
-
Charlotte wabanguthishela futsi wacula nekwaya i-African Jubilee Choir.”
7
“Charlotte waya eNgilandi nekwaya i-African Jubilee. Baculela tibukeli letikhetsekile eLondon, babese bayahamba bayovakasha eMelika,” kuchubeka Busisiwe.
-
“Charlotte watfola umfundzate wekuyofundza eWilberforce University eMelika. Bekuyinyuvesi yekucala leyakhiwa Bantfu Labamnyama BaseMelika.”
8
“Ngesikhatsi asafundza, Charlotte wangenela ipolitiki. Bekaya emihlanganweni lekhuluma ngemalungelo abomake. Wafundza nesishoshovu sepan-Africanist lokutsiwa ngu W.E. Du Bois. Bekakhutsele nasesontfweni lakhe.
-
ENyuvesi yaseWilberforce, Charlotte waphindze wahlangana nemyeni wakhe, Marshall Maxeke.”
9
“Charlotte naMarshall babuyela eNingizimu Afrika basebenta njengebafundisi. Bebafuna kucinisekisa kutsi bonkhe bantfwana batfola imfundvo lesezingeni lelisetulu.
-
Lisontfo labasita bakha sikolwa eJozi, lesentelwa bantfwana labamnyama baseNingizimu Afrika. Betsa lesikolwa lesiphumelelako ngekutsi yiWilberforce Institute.”
10
“Charlotte wanaka kakhulu tinkinga tenhlalakahle letihlupha bafati labamnyama. Kepha bekaphindze ahlanganyele nasemacenjini abomake betinhlanga letingafani. Wasita ekuhlelweni kwemibhikisho lemelene nemitsetfo yemakoloni. Bekahlanganyela nasemibhikishweni yetisebenti.
-
Bekangumholi esontfweni, anguthishela, angumlobi, aphindze abe sishoshovu. Bekamangalisa kakhulu!”
11
Busisiwe uyaphetsa, “Ngafundza ngaCharlotte Maxeke ngobe bengite kulesibhedlela! Ekucaleni besibitwa ngekutsi yi-Johannesburg Hospital, kepha nga-2008 kwatsiwa yiCharlotteMaxeke.”
-
“Ungumake lobalulekile emlandvweni!” kusho Khanyisa.
-
“Kufanele basifundzise ngaye esikolweni!” kusho Nthuseng.
12
Busisiwe wavumelana naloko lokushiwo ngulamantfombatane wase utsi, “Nisale kahle, sekufanele ngiye ekilasini manje.”
-
“Siyabonga ngekusicocela lendzaba! Sitohlale simkhumbula Make Charlotte, Dkt Maxeke,” kusho Khanyisa.
-
“Ningakhohlwa, bantfu labasikati labamnyama banemandla lamakhulu! Ngitonibona enyuvesi!” kusho Busisiwe.
13

——Imibuto


  1. Watalelwa kuphi Charlotte?
  2. Besiyini sikolwa lafundza kuso?
  3. Bekaculela yiphi ikwaya?
  4. Bekutsiwa yini libito lesibhedlela nyalo lesesibitwa ngelibito lakhe?
  5. Charlotte Makgomo Mannya washada nabani?
  6. Yini lebangela kutsi Charlotte Maxeke abaluleke emlandvweni?
14

——Tincwadzi letikuloluchungechunge


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Lendzaba icanjwe yaphindze yabhalwa ngeSetswana, njengencenye yephrojekthi yetintfo tekufundza te-Zenex Ulwazi Lwethu nga-2020.
16
Attribution CC BY
Your attribution should include the following:
Title: Charlotte Maxeke sishoshovu selichawe
Author/s: Glanice Masilo
Translator/s: Simangele Khoza
Illustrator/s: Vusi Malindi
Assurer/s: Mduduzi Benjie Shongwe
Language: Siswati

© Zenex Foundation - Saide 2024

CC BY includes the following elements:
 BY   – Credit must be given to the creator