Phumelele e ne e le mosadi yo monnye go tswa mo lelapeng le le humanegileng.O ne a nna le balelapa la gagwe mo motseng o o bidiwang Celani.Go ne go le tsela e le nngwe fela ya go tsena le go tswa mo Celani.

Fa thoko ga tsela ya motse go ne go le setlhare.Go ne go le noga e kgolo e e neng e nna mo setlhareng seo.Batho ba ne ba tshwanela go feta fa setlhareng se, fa ba ya tleliniking, marekelong kgotsa sekolong.

Noga e ne e itigela mo tseleng go tswa mo dikaleng fa e utlwa dikgato.Noga e ne e kgoreletsa mongwe le mongwe go feta.Baagi ba lekile go tshwara noga, fela ba palelwa.

Go ne go se ope yo o kgonang go tshwara noga.Kgosi e ne ya beela kabo ya yo o ka kgonang go tshwara noga.E ne e le banna fela bao ba neng ba dumelelwa go tsaya karolo mo kgaisanong eno.

Banna ba dingwaga tsotlhe ba lekile go tshwara noga, mme ba palelwa.Ba ne ba leka ka go dira ka ditlhopha mme fela ba palelwa ke go tshwara noga.Go ne go le kotsi go tsena le go tswa ka motse.

Phumelele o ne a ya kwa go kgosi mme a re, “Ntumelele go tsaya karolo mo kgaisanong.”Batho ba ne ba mo tshega ka gore e le mosadi.“O tshwanetse a bo a tshameka,” ba bua jalo.Kgosi e ne ya nagana ka kopo ya ga Phumelele.

Kwa bofelong, kgosi e ne ya ipolelela ya re, “Banna ba motse ba paletswe ke go tshwara noga. Nka se latlhegelwe ke sepe.”O ne a naya Phumelele tšhono mme o ne a sa dumele gore o tla tswelela fa banna ba paletsweng teng.

Phumelele o ne a na le leano le le botlhale.O ne a loga tlatlana e kgolo. O ne a e tsenya megala gore tlatlana e tswalege.O ne a rwala tlatlana mo tlhogong mme a leba kwa setlhareng.

Ka tlwaelo, noga ya utlwa dikgato. Ya ipaakanyetsa go wa le go parega tsela.Phumelele le ene o ne a emetse motsotso o mogolo!“Gompieno ke lone letsatsi,” a nagana jalo fa a atamela setlhare.

Fa noga e wa mo setlhareng, e ne ya wela mo tlatlaneng e e logilweng.Phumelele ka bonako o ne a goga megala go tswala tlatlana. Noga e ne e gaeletswe ka mo teng.

Phumelele o ne a rwalela noga ka tlatlana kwa motseng.Mongwe le mongwe o ne a mo duduetsa fa a tsena ka dikgoro tsa lesaka la kgosi.“Phumelele o botlhale e bile o pelokgale. Kgosi e tshwanetse go diragatsa tshepiso ya gagwe,” batho ba rialo.

Kgosi e ne ya abela Phumelele karolo e kgolo ya naga le lesaka le tletse dikgomo.O ne a nna moeteledipele wa naga eo. Batho ba ya kwa go ene go bona kgakololo.Noga e ne ya isiwa kwa serapeng sa dinoga, mme baagi ba simolola go tsamaya ka phuthologo.