Phumelele e ne e le morwetsana ya tswang lapeng le futsanehileng.O ne a dula le lelapa labo motseng o bitswang Celani.Ho ne ho ena le tsela e le nngwe feela e kenang le ho tswa Celani.

Pela tsela ho ne ho ena le sefate.Noha e kgolo e ne e dula sefateng seo.Batho ba ne ba tlameha ho feta sefateng seo ha ba eya tleliniking, lebenkeleng le sekolong.

Kamehla ha e utlwa diqi, noha e ne e theoha lekaleng e botha ka tseleng.Ene e etsa ho be boima ho feta moo.Baahi ba motseng ba lekile ho e tshwara feela ba hlotswe.

Ha ho motho ya neng a kgona ho tshwara noha.Morena o ile tshepisa moputso ho motho ya ka tshwarang noha.Ke banna feela ba neng ba dumelletswe ho tobana le phephetso yeo.

Banna ba dilemo tse fapaneng ba leka ho tshwara noha, feela ba hloleha.Ba leka le ho sebetsa ka dihlopha.Le ha ho le jwalo ba hloleha ho e tshwara.Ho ne ho le kotsi ho kena le ho tswa motseng.

Phumelele a ya ho morena a re, “Ntumelle ho ba karolo ya phephetso ena.”Batho ba tsheha hobane e le mosadi. “O ya swaswa,” ho rialo batho.Morena a nahana ka kopo ena ya Phumelele.

Qetellong, morena a re, “Banna ba motse ona ba hlolehile ho tshwara noha. Ha ho no senyaha letho ha mosadi a leka.”A neha Phumelele monyetla. O ne a sa kgolwe hore Phumelele a ka phomella moo banna ba hlolehileng.

Phumelele o ne a ena le moralo o bohlale.O ile a loha manki o moholo. O ile a sebedisa le dithapo tse hulwang hore manki o kgone ho kwaleha.O lie a rwala manki mme a leba sefateng.

Jwalo ka tlwaelo, noha ya utlwa diqi. Ya itokisetsa ho tlola e paqama ka tseleng.Phumelele le yena a itokisetsa nako yeo ya bohlokwa!“Kajeno ho tla utlwahala,” ke Phumelele a nahana ha a lebile sefateng.

Ha noha e tlola sefateng, ya wela hantle ka manking o lohilweng.Ka pele-pele Phumelele a hula dithapo ho kwala manki. Noha e ne e tshwasehile ka hare.

Phumelele arwala manki ho o isa motseng.Batho kaofele ba didietsa ha a kena ka kgoro ya lesaka la morena.“Phumelele o bohlale o sebete. Morena a boloke tshepiso ya hae,” ho rialo batho.

Morena a leboha Phumelele ka ho mo fa karolo e kgolo ya naha le lesaka le tletseng dikgomo.Ya eba moetapele wa naha yeo. Batho ba ya ho yena ho batla dikeletso.Noha ya iswa polokelong ya dinoha, mme batho ba kgona ho tsamaya ka bolokolohi.