Phumelele e be e le mosadi wa go tšwa lapeng la bohloki.O be a dula le ba lapa la gabo motseng wa Celani.Go be go na le tsela e tee fela ya go ya le go tšwa Celani.

Go be go na le mohlare kgauswi le tsela ya go ya motseng.Noga ye kgolo e be e dula mohlareng woo.Batho ba be ba feta gona moo ge ba eya tliniking, mabenkeleng le sekolong.

Noga e be e re ge e ekwa dikgato tša batho, e ikwišetše mo tseleng.Noga e be e palediša batho go feta.Batho ba motse ba lekile go e swara, efela ba palelwa.

Ga go na yo a ilego a kgona go swara noga yeo.Kgoši e ile ya tshepiša gore yo a ka swarago noga o tla hwetša moputso.Banna ke bona fela bao ba bego ba dumeletšwe go kgatha tema tabeng ye.

Banna ba mengwaga ka moka ba lekile go swara noga, efela ba palelwa.Ba lekile le go šoma ka dihlopha.Le ge go le bjalo, ba palelwa ke go swara noga.Go be go le kotsi go tsena goba go tšwa ka motseng.

Phumelele o ile a ya go kgoši a re: “Anke o ntumelele gore ke kgathe tema.”Batho ba ile ba mo sega ka ge e be e le mosadi. “O swanetše go ba a dira metlae,” ba realo.Kgoši a nagana ka kgopelo ya Phumelele.

Mafelelong kgoši a ipotša a re, “Banna ba motse ba paletšwe ke go swara noga. E re ke mo dumelele.”O ile a neela Phumelele sebaka le ge a sa kgolwe gore o tla atlega ka ge banna ba paletšwe.

Phumelele o be a na le leano le bohlale.A loga seroto se segolo. A lokela dithapo tša go goga gore seroto se kgone go tswalelega.A rwala seroto hlogong gomme a leba mohlareng.

Bjalo ka mehleng, noga ya kwa mošito wa dikgato tša motho. Ya ikemišetša go ikwiša le go thiba tsela.Phumelele o be a letetše tiragalo yeo.“Lehono ke lehono,” a nagana bjale ge a batamela mohlare.

E rile ge noga e ikwišetša fase, ya wela ka gare ga seroto sa go logwa.Phumelele a phakiša a goga dithapo tšela gore a tswalele seroto. Noga ya kgakgelwa ka gare ga seroto.

Phumelele a rwala seroto sela le noga ka gare a boela motseng.Batho ka moka ba hlalala ka lethabo ge ba bona a tsena kgorong ya mošate.“Phumelele o bohlale ebile o na le sebete. Kgoši o swanetše go phethagatša tshepišo ya gagwe,” batho ba realo.

Kgoši a neela Phumelele moputso wa seripa se segolo sa naga le dikgomo tša go tlala lešaka.A ba moetapele wa naga yeo. Batho ba be ba eya go yena go hwetša maele.Noga e ile ya išwa serapeng sa dinoga, gomme batho ba motse ba kgona go sepela ka tokologo.