UPhumelele kwakumntazanyana osesemutjha obuya emndenini otlhagako.Wabe ahlala nomndenakhe ethresteni elibizwa ngokuthiwa yiCelani.Kwakunendlela eyodwa yokuphuma neyokungena eCelani.

Eduze kwendlela yethreste lelo kwabe kunomuthi.Kwakunenyoka ekulu ehlala emthini lowo.Abantu nabaya emtholapilo, eentolo namkha esikolweni kwakufanele badlule kiwo umuthi lo.

Inyoka le ngaso soke isikhathi nayizwa iinyawo zabantu, beyikhithika etakeni lomuthi iphareke endleleni.Inyoka le beyenza kungabi lula ukobana abantu badlule.Abahlali bazama ukuyibamba kodwana babhalelwa.

Akekho namunye owakghona ukuyibamba inyoka le.Ikosi yamemezela bona loyo ozokukghona ukuyibamba uzakuthola umtlomelo.Madoda kwaphela abe avunyelwe ukungenela iphaliswano leli.

Amadoda weminyaka ngokuhlukana kwawo azama ukubamba inyoka, kodwana abhalelwa.Azama nokusebenza ngeenqhema imbala.Nalapho akhange akghone ukuyibamba inyoka.Kwabe kuyingozi ukungena nokuphuma ethresteni.

UPhumelele waya ekosini wafike wathi, “Ngivumela ngibe yingcenye yephaliswano.”Abantu bamhleka ngombana bekamfazi. Bathi, “Ngabona uyadlala lo.”Ikosi yasicabangisisa isibawo sikaPhumelele.

Ekugcineni yazitjela bona, “Amadoda wethreste leli abhalelwe kuyibamba inyoka. Akunanto engingayiloba nange naye ngimnikela ithuba.”Ikosi yanikela uPhumelele ithuba. Kodwana akhange ikholwe bona angaphumelela entweni ebhalele amadoda.

UPhumelele wabe anamano amahle.Waluka umantji omkhulu kwamanikelela. Wafaka iintambo zokudosa ukuze umantji ukghone ukuvaleka.Wathwala umantji ehloko watjhinga endleleni edlula emthini.

Njengemhleni, inyoka yezwa iinyawo. Yazilungiselela ukuphareka phasi ivale indlela.UPhumelele naye bekakulindele lokho!“Namhlanjesi kunamhlanjesi,” watjho acabanga lokha nakatjhidela emthini.

Lokha inyoka nayiwa emthini, yakhithikela ngemantjini olukiweko.Msinyazana uPhumelele wadosa iintambo wavala umantji. Inyoka yavaleleka ngaphakathi.

UPhumelele waguga umantji onenyoka wakhamba nayo ethresteni.Abantu boke bathaba khulu lokha nakangena emacabazini wesigodlo sekosi.“UPhumelele uhlakaniphile begodu unesibindi. Ikosi kufanele igcine isithembiso sayo,” kwatjho abantu.

Ikosi yatlomelisa uPhumelele ngenarhakazi ekulu nangesibaya esizele iinkomo.Waba mdosiphambili wenarha leyo. Abantu nabafuna iiyeleliso bebatjhinga kuye.Inyoka yathathwa yasiwa endaweni ekuhlala kiyo iinyoka, abahlali besele bakghona ukukhamba bakhululekile.