“Tsiyo! Tsiyo! Tsiyo!”“Kwa! Kwa! Kwa!”“Kwak! Kwak! Kwak!”Dada naVukutfu bahlangana esitibeni lesiseceleni kwemfula labavame kuhlangana kuso. Bebabangani labakhulu.

Belikhipha umkhovu etjeni.Dada watijika emantini. Vukutfu wacabanga, “Kufanele kutsi kumnandzi kubhukusha.”Nakacedza kufaka inhloko yakhe emantini, Dada watsi, “Uyakufuna yini kubhukusha? Gibela emhlane wami mine ngitokufundzisa.”

Njalo Dada nakangena ngephansi kwemanti ngesikhatsi Vukutfu ahleti emhlane wakhe, Vukutfu bekandiza.Vukutfu wacabanga aphatseke kabi, “Ngeke sekwenteke ngikwati kubhukusha njengaDada.”Dada wasala yedvwa emantini.

“Yini inkinga Vukutfu? Uyangidvumata. Kungani ungishiya ngedvwana emantini?” kubalisa Dada.Vukutfu waphendvula watsi, “Ngesaba kucwila.”“Bengitsi ufuna kufundza kubhukusha njengami,” kusho Dada.

“Tsiyo! Tsiyo! Tsiyo! Dada, kuncono mine ngikufundzise kundiza. Kubhukusha kumatima kakhulu!”Vukutfu waya edvwaleni lelikhulu. Dada walandzela.Masinyane, Vukutfu besekasetulu esihlahleni lesidze. Dada wehluleka kumlandzela.

Dada waphatseka kabi. Wacabanga atfukutsele, “Uyati Vukutfu akangicabangeli.Mine ngilidada angisilo livukutfu. Ngetayele kubhukusha hhayi kundiza.”Vukutfu bekafuna kudvudvuta umngani wakhe.

Bahlala phansi etjeni babindza.Ekugcineni, Vukutfu watsi, “Mngani wami, lamuhla ngifundze kutsi angeke sekwenteke ngikhone kubhukusha njengawe.Nekutsi wena angeke sekwenteke undize njengami. Mine ngiyandiza wena uyabhukusha.” Babese bayagacana.

“Tsine singemadada, nasibhukusha, sifaka ngaphansi kwemanti tinhloko tetfu sitsi, ‘Kwaa kwaa kwaa lidada! Kwaa kwa kwa lidada!’”“Tsine sitinyoni, nasindiza sivula emaphiko etfu sitsi, ‘Tsiyo, tsiyo, tsiyo!’”