“Tswii! Tswii! Tswii!”“Kwa! Kwa! Kwa!”“Khwak! Khwak! Khwak!”Lepidibidi le Leeba di kopane sedibeng sa tšona sa ka mehla kgauswi le noka. E be e le bagwera ba mmakgonthe.

Letšatši le be le fiša tšhiritšhiri. Lepidibidi la itahlela ka gare ga meetse. Leeba la nagana la re, “Go swanetše go le bose go rutha.”Morago ga go inela hlogo ya lona ka fase ga meetse, Lepidibidi la re, “Na o ka rata go rutha? Namela mokokotlong wa ka ke tla go ruta.”

Nako le nako ge Lepidibidi le leka go ya ka fase ga meetse le beputše Leeba, Leeba le be le fofela godimo.Leeba la nagana ka manyami, “Nka se tsoge ke kgonne go rutha go swana le Lepidibidi.”Lepidibidi le be le šetše le le noši ka meetseng.

“Molato ke eng Leeba? O a nyamiša.Gobaneng o ntlogela ke le noši ka meetseng?” Lepidibidi la ipelaetša.Leeba la araba, “Ke tšhaba go nwelela.”“Ke be ke nagana go re o nyaka go ithuta go rutha go swana le nna,” Lepidibidi la realo.

“Tswii! Tswii! Tswii! Lepidipidi, e re nna ke go rute go fofa. Go rutha go boima.”Leeba le ile la ya godimo ga leswika le legolo. Lepidibidi la latela.Ka nakwana ye nnyane, ke ge Leeba le le godimo ga mohlare wo motelele. Lepidibidi la se kgone go latela.

Lepidibidi la nyama. La nagana le nnoši ka pefelo, “Leeba ga le kgone go naganela ba bangwe.Ke nna Lepidibidi e sego Leeba. Ke tlwaetše go rutha e sego go fofa.”Leeba le be le nyaka go kgothatša mogwera wa lona.

Di ile tša dula leswikeng ka setu.Mafelelong, Leeba la re, “Mogwera wa ka, lehono ke ithutile gore nka se tsoge ke kgonne go rutha go swana le wena.Gape le wena, o ka se tsoge o kgonne go fofa go swana le nna. Nna ke a fofa, wena o a rutha.”Di ile tša gokarelana ka borutho.

“Ke rena Mapidipidi, ge re rutha, re inela dihlogo tša rena ra re, ‘Kwaa kwaa kwaa kwadada! Kwaa kwa kwa kwadada!’”“Ke rena Maeeba, ge re fofa, re phurolla maphego a rena ra re, ‘Tswiyo, tswiyo, tswiyo!’