Kopano ya lapa
African Storybook
Thulisile Shongwe
Sepedi
First paragraphs
Re na le kopano ya lapa.
-
Go na le Tate, Rakgadi Pula, Malome Chavani, Eddie, Attie, Koko le nna.
-
Ke nna yo monnyane go bona ka moka.
1
Seyalemoya se phela se buletšwe ka gae letšatši ka moka, matšatši a 7. Re phela re theeleditše ditaba.
-
Lehono re kwele pego ya go re dikolo di ilo bulwa gape bekeng ye e tlago.
2
Dikolo di be di tswaletšwe dikgwedi tše mmalwa ka lebaka la kiletšo ya mesepelo.
-
Tate a thoma, “Ba lapa, re swanetše go tšea sephetho mabapi le bana bao ba boelago sekolong.”
3
Rakgadi Pula o tshwenyegile. “Ge dikolo di bulwa, go ra gore batho ba bantši ba tlo swaetšwa.
-
Seemo se ka befela pele,” a realo.
4
Attie a re, “Ke tšhaba go tsenwa ke bolwetši bjo.
-
A re emeng dibeke tše pedi re bone gore dilo di tlo sepela bjang kua sekolong. Go na le kgakanego ye kgolo.”
5
Tate a re, “Ke tšhogela Koko.
-
Ge bana ba ka swaetšwa ke bolwetši bjo gomme ba bo tliša ka gae, go tla ba kotsi go yena.”
-
Koko a dumela ka hlogo.
6
Koko o tšofetše. O na le bolwetši bja swikiri le bja pelo. Ke tshwenyegile kudu. Ke tshwenyegile ka lapa la gešo.
7
Malome Chavani a re, “Ke nagana gore bana ba dule gae, se e le kgato ya temošo. A re leteng re bone ge eba dikolo di itokišeditše go amogela barutwana.”
-
Ka moka ba dumela ntle le Eddie.
8
“Nna ke swanetše go ya sekolong se se phagamego ngwaga wo o tlago.
-
Ga ke tsebe ge eba ke tla kgona go phetha mošomo ka moka.
-
Thuto ya dinthanete ga ke kwane le yona,” Eddie a realo.
9
Ga ke tshwenyege ka taba ya go šalela morago ka mošomo wa sekolo.
-
Ke tshwenyega ka taba ya botho. Na re tlo phedišana bjang mmogo go tloga bjale?
-
Re swanetše go lebana le seemo se mmogo.
10

——Dipotšišo


  1. Ngwala tlhalošo ya mantšu a: swaetšwa, tšofala, temošo, botho.
  2. Hlaloša gore ke go reng go ‘swenyega ka taba ya botho’.
  3. Na o nagana gore lapa le tšere sephetho sefe? Ka lebaka la eng?
11

——


Pukukanegelo ye e theilwe godimo ga dipego tša bana tša Radio RX. Radio RX ke seteišene sa seyalemoya sa inthanete sa bana seo se tšweletšwago le go diragatšwa ke bana, ba direla bana.
-
Seteišene se, se gašwa go tšwa Bookelong bja Bana bja Red Cross War Memorial go la Kapa.
-
Radio RX e thuša bana go anega dikanegelo mabapi le ditaba tšeo di lego bohlokwa mo go bona.
-
Etela RX Radio
12
Attribution CC BY
Your attribution should include the following:
Title: Kopano ya lapa
Author/s: African Storybook
Translator/s: Dikeledi Queen Shai
Illustrator/s: Thulisile Shongwe
Assurer/s: Connie Makgabo
Language: Sepedi

© Zenex Foundation - Saide 2024

CC BY includes the following elements:
 BY   – Credit must be given to the creator