Ḓoroboni ya hashu, ho vha huna mufumakadzi wa mupfumi we a vha a tshi pfi Alina.Alina o vha a tshi dzula nḓuni khulwane ya manakanaka fhethu ho nakaho.O vha o swikelela zwinzhi, fhedzi o vha a songo takala.

Ḽiṅwe ḓuvha Alina o vha a tshi khou monamona dzharaṱani ya hune a dzula hone.A setshelela musi a tshi humbula u ri, “Ndi nga takalela u ṱangana na vhathu vhaswa. Khamusi ndi nga wana khonani ntswa arali nda ya holodeini. Khamusi ndi nga ṱangana na muthu o khetheaho.”

Alina a dzudzanya u ya holodeini fhethu hu re na lwanzhe lwo nakesaho shangoni ḽa hawe.O vha o takala vhukuma musi ḓuvha ḽa lwendo ḽi tshi swika.O ṱavhanya a dzudzanyea hodelani ye a swikela khayo u itela u ḓiphina nga madalo awe henefho fhethu ho nakaho.

Alina o ḓiawetshela o baḓama khunzikhunzini ya lwanzhe. O lavhelesa vhathu vho dalaho henefho.Nga u ṱavhanya a vhona munna a re na vhana vhavhili. Muṱa wonoyo wo vhonala u sa khou ḓiphina.Vho vhonala vha songo takala. Vhana vho vha tshi khou tamba vho sokou duu!

Alina o ḓivhudzisa, “Ndi ngani vho ṱungufhala ngeno vhe fhethu ho nakaho ngaurali.”Nga murahu, o vha a tshi khou bambela bambeloni ḽa hodelani musi vhana vha onouḽa munna vha tshi ḓa u bambela.Alina o vha a tshi ṱoḓa u vha ḓivha, a thoma u amba navho.

Madzina avho ndi Karembo na Kazungu.Vho vhudza Alina uri ndi holodei yavho ya u thoma u bva tshee mme avho vha lovha.Alina a tshi ṱangana na khotsi avho, o vhona vhuṱungu ha u lovhelwa maṱoni avho.Dzina ḽavho ndi Clemens.

Clemens, Alina, na vhana, vho vha vha tshi vho ṱwa vhoṱhe.Karembo na Kazungu vho vha vha tshi takalela u tamba na Alina khunzikhunzini ya lwanzhe.Alina o vha gudisa u luka manngi nga maṱari, na u fhaṱa nnḓu nga muṱavha.

Maḓuvha a pfuka zwavhuḓi vho ora ḓuvha.Alina o vha a sa ṱoḓi u vhuyelela hayani hawe ho no bora.O humbula a ri, “Holodei yanga i khou fhela. Khamusi arali nda dzula maḓuvha o engedzeaho, ndi nga si pfe vhuṱungu?”

Nga eneo madekwana, o pfa u nga hu na muthu ane a khou khokhonya. Musi a tshi vula vothi, Karembo na Kazungu vho vha vho ima henefho.Vha amba mazha vha ri, “Ri khou ṱoḓa uri vha vhe mme ashu!”Alina o vha a sa ḓivhi uri a ri mini.

Musi vho no amba, Alina a ṱuwa na Karembo na Kazungu kamarani yavho.Musi Clemens a tshi vhona vhana vhawe vho takala musi vhe na Alina, a setshelela. Alina a kuvhatedza vhana a ri vha eḓele zwavhuḓi.Alina a humbula a ri, “Ndo ṱangana na vhathu vhararu vho khetheaho.”

Nga matsheloni, Alina a ya zwiḽiwani zwa nga matsheloni na Clemens na vhana vhawe.Karembo na Kazungu vha sedza Alina vhe na fulufhelo musi a tshi dzula fhasi.Clemens a vhudzisa a tshi khou setshelela musi o sedza vhana vhawe, “Naa hu khou itea mini?

Ṅwaha muṅwe na muṅwe, vha ya lwanzheni u pembelela u ṱangana havho lwa u tou thoma.Vha tamba maḓini, vha fhaṱa nnḓu dza muṱavha sa zwe vha ita musi vha tshi ṱangana lwa u tou thoma.