Edolobheni lakitsi, bekunemfati lonjingile lebekutsiwa ngu-Alina.Alina bekahlala endlini lenkhulu lesitsabatsaba lesihle.Bekanako konkhe, kepha bengakajabuli.

Ngalelinye lilanga, Alina bekahamba eceleni kwesitsabatsaba sakhe.Wamoyitela ngesikhatsi acabanga, “Ngifisa kuhlangana nebantfu labasha. Mhlawumbe ngingakwati kutitfolela bangani nangingaya eholidini. Kumbe ngingahlangana nemuntfu lokhetsekile.”

Alina wahlela kutsatsa liholide lekuya ebhishi lenhle kakhulu eveni.Wajabula kakhulu ngesikhatsi kufika lilanga lekutsi atsatse luhambo.Washeshe wafika ehhotela lakhe kute atojabulela kuvakasha kwakhe kule ndzawo lenhle.

Alina walala ebhishi watiphumulela. Bekabukela bantfu labatihambelako eceleni kwakhe.Kusenjalo wabona indvodza labeyinebantfwana lababili. Lomndeni bewubonakala sengatsi awukajabuli.Bonkhe bebabonakala baphatseke kabi. Bantfwana bebadlala babindzile.

Alina wacabanga, “kwentiwa yini kutsi bangajabuli kangaka kulendzawo lenhle kangaka.”Kamuva ngalelolanga, bekabhukusha edamini lasehhotela ngesikhatsi kufika bantfwana balendvodza nabo batobhukusha.Alina waba nelilukuluku lekufuna kwati wase ucala kukhuluma nabo.

Emabito alabantfwana bekuboKarembo kanye naKazungu.Batjela Alina kutsi lolu bekuluhambo lwabo lwekucala lweliholide kusukela kwashona make wabo.Ngesikhatsi Alina ahlangana nababe webantfwana, wabona buhlungu kanye nelusizi lwekulahlekelwa emehlweni akhe.Libito lakhe bekunguClemens.

BoClemens, na-Alina, kanye nebantfwana masinyane baba nesikhatsi lesimnandzi bonkhe ndzawonye.BoKarembo naKazungu bakujabulela kudlala na-Alina ebhishi.Alina wabafundzisa indlela yekweluka bobhasikidi ngemacembe elisundvu, kanye nendlela yekwenta imibhoshongo yesihlabatsi.

Emalanga edlula batidlalela kamnandzi elangeni.Alina bekangasafuni kubuyela esitsabatsabeni semuti wakhe lonesitunge.“Liholide lami selitophela. Mhlawumbe nangingelula sikhatsi sekuhlala kwami lapha, ngeke ngiluve lusizi,” aticabangela.

Ngalelolanga kusihlwa, Alina weva umsindvo lomncane wekunconcotsa emnyango wakhe. Ngesikhatsi avula sivalo, watfola Karembo kanye naKazungu beme emnyango.Bakhuluma kanyekanye batsi, “Sifisa kutsi ube ngumake wetfu!”Alina akazange ati kutsi kufanele abaphendvule atsini.

Ngemuva kwekutsi sebakhulumile, Alina wahamba naKarembo kanye naKazungu waya ekamelweni labo.Clemens wabonakala amoyitela nakabona bantfwana bakhe bajabulele kuba na-Alina. Alina wabagaca labantfwana wase utsi nilale kahle.Alina waticabangela ayedvwa, “Ngihlangene nebantfu labatsatfu labakhetsekile.”

Ekuseni, Alina wahamba wayodla sidlo sasekuseni na-Clemens kanye nebantfwana bakhe.Karembo kanye naKazungu bambuka ngekumetsemba Alina ngesikhatsi ahlala phansi.“Ingabe ikhona yini intfo leyentekako?” kubuta Clemens, amoyitela ngesikhatsi abuka buso bebantfwana bakhe.

Ngemuva kwemnyaka, Alina kanye na-Clemens bashada!Njalo ngemnyaka, lomndeni bewuhamba uyovakashela ebhishi lenhle kute ugubhe kuhlangana kwawo kwekucala.Bebafike badlale emantini bese benta imishoshongo yesihlabatsi, njengoba benta ngesikhatsi bacala kuhlangana.