Toropong ya gešo, go be go na le mosadi wa mohumi wa go bitšwa Alina.Alina o be a dula ntlong ye kgolo mo motseng wo mobotse.O be a na le dilo ka moka, fela a se na lethabo.

Ka tšatši le lengwe, Alina o be a sepela sepela motseng wo a dulago go wona.A myemyela ge a nagana, “Ke rata go kopana le batho ba baswa. Mohlomongwe ke tla kopana le bona ge nka ya maikhutšong. Mohlomongwe ke tla kopana le yo a kgethegilego.”

Alina o ile a beakanya go ya maikhutšong lebopong la lewatle le lebotse ka mo nageng.O be a thabile kudu ge letšatši la go sepela le fihla.O ile a phakiša a tsena hoteleng gore a ipshine ka leeto la gagwe lefelong leo le le botse.

Alina o be a patlame lebopong la lewatle a iketlile. A lebeletše batho ka tlhokomelo.Ka bjako o ile a lemoga monna a na le bana ba babedi. Ba be ba bonala ba se na lethabo.Ka moka ba be ba bonala ba nyamile. Bana ba be ba raloka ka setu.

Alina a nagana, “Ke ipotšiša gore gobaneng ba nyamile lefelong le lebotse bjale?”Mathapa, ge a be a rutha letamong la hotele, bana ba monna yola ba tla go tlo rutha.Alina a tlelwa ke kgahlego ya go bolela le bona.

Maina a bona e be e le Karembo le Kazungu.Ba boditše Alina gore ke maikhutšo a bona a mathomo mola ba hlokofalelwago ke mmagobona.Alina o rile go kopana le tatagobona, a bona bohloko le tahlegelo sefahlegong sa gagwe.Leina la gagwe e be e le Clemens.

Go se go ye kae, ke ge Clemens, Alina le bana ba ehlwa mmogo.Karembo le Kazungu ba be ba thabela go raloka le Alina lebopong la lewatle.Alina a ba ruta go loga diroto ka matlakala a mopaleme, le go bopa dintlo ka mohlaba.

Matšatši a fetile, ba ipshina letšatšing.Alina o be a sa nyake go boela motseng wa gagwe wa bodutu.“Matšatši a ka a maikhutšo a a fela. Mohlomongwe go ka ba kaone ge nka a oketša,” a kamaka.

Mathapameng ao, Alina a kwa mokokoto lebating. Ge a bula, a hwetša Karembo le Kazungu ba eme mojako.Ba bolela ka nako e tee ba re: “Re nyaka gore o be mma wa rena!”Alina o be a sa tsebe gore a ba arabe bjang.

Morago ga go boledišana, Alina a ya le bona phapošing ya bona.Clemens o be a myemyela ge a bona bana ba thabile, ba na le Alina. Alina o ile a gokara bana a re ba robale gabotse.Alina a gopola a re, “Ke kopane le batho ba bararo ba ba kgethegilego.”

Mesong ye e latelago, Alina a yo dula le Clemens le bana ba gagwe ka nako ya difihlolo.Karembo le Kazungu ba bonagala ba ena le tshepo go Alina ge a dula fase.“Ekaba go na le se se diregago?” gwa botšiša Clemens, a myemyela a lebeletše difahlego tša bana.

Morago ga ngwaga, Alina le Clemens ba be ba nyalane!Ngwaga ka ngwaga, ba be ba etela lebopo la lewatle go keteka kopano ya bona ya mathomo.Ba raloka ka meetseng le go aga dintlo ka mohlaba go swana le mathomong ge ba kopana.