Bongani Mayosi longudokotela wenhlitiyo
Nozuko Mkizwana
Sibusiso Khumalo
Siswati
Longer paragraphs

——


Lencwadzi yetindzaba ikhuluma ngadokotela waseNingizimu Afrika longuBongani Mawethu Mayosi.
-
BekanguSosayensi lowatfola lwati lolubalulekile ngesifo senhlitiyo.
1
Bongani watalwa nga-1967, eMthatha eMpumalanga Kapa eNingizimu Afrika.
-
Wafundza esikolweni lesisesigodzini saseNgqamakhwe.
-
Make waBongani bekangumhlengikati, kantsi babe wakhe bekangudokotela.
2
Onkhe malanga ekhaya, batali baBongani bebacoca ngemisebenti yabo.
-
Wacala kutsandza tindzaba tetemphilo, kanye nekusita bantfu.
-
Ngenca yekuva ngemisebenti yebatali bakhe, Bongani waba nelutsandvo lweSayensi Yetemphilo.
3
Esikolweni, Bongani bekatsandza Tibalo kanye neSayensi Yekuphila.
-
Bekatikhandla kuletifundvo ngobe bekafuna kuba ngudokotela.
-
Watsi angacedza sikolo, wafundza enyuvesi yaKwaZulu-Natal kanye neyaseKapa. Bekangumfundzi lophumelelako.
4
Bongani watfola umfundzate wekuchubekisela embili tifundvo takhe, eNyuvesi yase-Oxford eNgilandi.
-
Waphindze wafundza eMelika. Wabese ubuyela eNingizimu Afrika kute asebente njengadokotela. Bekangudokotela lokahle nalonemusa, bekatitsandza tigulane takhe.
5
Kutsite kusenjalo Bongani waphindze waya ngesheya kwetilwandle.
-
Bekafuna kufundza kabanti nge-Cardiology.
-
I-Cardiology sifundvo senhlitiyo, kanye netifo letihlasela inhlitiyo.
-
Bongani bekayi-Cardiologist–dokotela wenhlitiyo.
6
Dkt Mayosi wasebenta nalabanye bacwaningi ngesheya kwetilwandle. Batfola intfo letsite lebaluleke kakhulu.
-
Labacwaningi batfola kutsi yini leyenta labanye bantfu babe nesifo senhlitiyo.
-
Labakutfola kwasita nalabanye bodokotela emhlabeni wonkhe.
7
Bongani wabuya eNingizimu Afrika sekanelwati lolukhetsekile kutekwelapha.
-
Wasebenta neNdvuna yeLitiko Letemphilo yelive futsi waniketa teluleko letimayelana netinkinga temphilo letikhungetse sive.
-
Liphupho lakhe bekukubona emave ase-Afrika acatulula tinkinga tawo ngekusebentisa iSayensi.
8
Bongani bekatetsemba njengaSosayensi wase-Afrika. Lakutfola nakenta lucwaningo bekubalulekile emhlabeni wonkhe.
-
INingizimu Afrika iyawuhlonipha umsebenti wakhe kanye naloko lakufeza.
-
Wahlonishwa ngekunikwa umklomelo lomkhulu welive kuteSayensi, lobitwa nge-Order of Mapungubwe.
9
Bongani bekanguPhrofesa weNhlitiyo eNyuvesi yaseKapa (UCT).
-
Nakafundzisa, bekahlanganyela lwati lwakhe titjudeni takhe.
-
Bekabucondza bumatima bebafundzi labanyenti. Wakhutsata bodokotela labasebancane kanye nalabanye labebafundzela iSayensi Yetemphilo.
10
Phrofesa Mayosi wakhushulelwa esikhundleni sekuba yiNhloko YeSayensi Yetemphilo e-UCT.
-
Bekahlala amatasatasa enta umsebenti wakhe. Bekanguthishela, umcwaningi, kanye nemholi.
-
Bongani Mayosi ukhunjulwa bantfu labanyenti njengesibonelo sekulingiswa.
11
Wafundza esikolweni sasemakhaya, wabangumholi kuSayensi Yetemphilo enyuvesi yaseNingizimu Afrika lesembili.
-
Waba nguchwepheshe kuSayensi Yetemphilo yemhlaba wonkhe.
-
Bongani wafinyelela ngalokunyenti kakhulu ekuphileni, kepha bekatfobekile.
12
Nasifundza ngeSayensi, sicabanga ngaDkt Mayosi.
-
Singahlonipha imphumelelo yakhe, kanye nemphumelelo yaboSosayensi labanyenti base-Afrika.
-
Singaphindze sihloniphe nekubaluleka kwelwati lwase-Afrika.
13

——Imibuto


  1. Ngubani lolandzisa lendzaba? Lendzaba ikhuluma ngabani?
  2. Bongani wacala nini kutsandza temphilo kanye neSayensi, futsi kungani?
  3. Iyini i‘cardiology’?
  4. Iyini “iSayensi Yetemphilo”? Tfola lokwengetiwe ngemsebenti lowentiwa kuSayensi Yetemphilo.
  5. NjengaSosayensi Wetemphilo naDokotela Wenhlitiyo, Bongani uwusite njani umphakatsi?
  6. Fundza ngalabanye boSosayensi labatsatfu base-Afrika.
  7. Ngutiphi tinkinga letitsintsa umphakatsi lenikhuluma ngato ekhaya?
  8. Chaza kutsi imfundvo yakho ingakusita njani kutsi ukhone kucatulula letinye taletinkinga.
14

——Tincwadzi letikuloluchungechunge


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Lendzaba icanjwe yaphindze yabhalwa ngesiXhosa, njengencenye yephrojekthi yetintfo tekufundza te-Zenex Ulwazi Lwethu nga-2020.
16
Attribution CC BY
Your attribution should include the following:
Title: Bongani Mayosi longudokotela wenhlitiyo
Author/s: Nozuko Mkizwana
Translator/s: Simangele Khoza
Illustrator/s: Sibusiso Khumalo
Assurer/s: Mduduzi Benjie Shongwe
Language: Siswati

© Zenex Foundation - Saide 2025

CC BY includes the following elements:
 BY   – Credit must be given to the creator