Sesi wa ka Lesedi ke sesasedi.O tla dula setulong a itšhikinya, a itira eke ke bere. Ge o kare o leka go mo swara, o khuta godimo ga mohlare gore o se ke wa mmona.

“Fologa mo mohlareng, o tla senya moriri wa gago,” gwa goelela Koko.“Aowa Koko, ke šetše ke le lefaufaung,” Lesedi a araba.Koko o šišinya hlogo ka go se tshepe tše di dirwago ke Lesedi.

Ge pula e ena, ngwanešo Lesedi o kitimela kua puleng.“Lesedi,” Koko a goeletša, “Tsena ka ntlong, o tla senya diaparo tša gago.”

Ge a soletšwe dilalelo, Lesedi o raloka ka tšona, a be a dire dipudula ka teye ya gagwe.

O bethantšha moropa wa gagwe a be a leletše katara ya gagwe ya motlakase godimo.

Ga go makatše ge a sa lemoge tlhakahlakano ye a e dirago ka phapošing ya rena ya borobalelo.

“Lesedi, ka nnete wo ga se mokgwa wo lekgarebe le swanetšego le itshware ka wona,” gwa bolela Koko.

“Ijoo Koko! Ke ka mokgwa wo nna ke dirilwego ka wona,” Lesedi a bolela a edimola.

Bošego ka moka, Lesedi ga a robale le gatee. O lala a fetogafetoga e le ge a lora a nametše sefala a letša katara.

Ge letšatši le hlaba, Lesedi o bonagala a lapile.“Koko wee! Ga se ke robale gabotse le gatee. Ke a tshepiša go re lehono ke tla hlwekiša phapoši ya ka ya borobalelo.” a realo Lesedi.

“Ijoo Lesedi ngwanaka, mohlomongwe o tla ba mosadi wa mmakgonthe!” Koko a myemyela.“Ijoo Koko! Ke a kgona go itshwara sesadi le gona ke be ka mokgwa wo ke hlolegilego ka wona.” Lesedi a myemyela.

“Ke a kgona go ba mosadi wa mmakgonthe gape ka ba se sengwe le se sengwe se ke se ratago,” gwa bolela ngwanešo a gokara Koko.