Imibono lehlakaniphile yaMulalo Doyoyo
Arnold Mushwana
Thulisile Shongwe
Siswati
Longer paragraphs

——


Lena yindzaba yaMulalo Doyoyo, umsunguli naSosayensi waseNingizimu Afrika.
-
Basunguli bantfu labacabanga ngentfo lensha, bese bayayakha.
-
Mulalo usebentisa iSayensi neThekhnoloji kute asungule tintfo letisita bantfu kanye nemvelo.
1
“Ngifuna kunicocela ngaNjiniyela lowaba ngumsunguli lodvumile. Watalelwa esigodzini saseVondwe,” thishela Mary ucala kukhuluma.
-
“Thishela, ikuphi iVondwe?” kubuta Lulama.
-
“Isendzaweni yasemakhaya esifundzeni saseLimpopo,” kuphendvula thishela.
2
“Mulalo Doyoyo watalwa nga-1970. Benikuphi nine nga-1970?” kubuta thishela Mary.
-
“Besingekho nga-1970, thishela,” kuphendvula Jack ahleka.
-
“Mulalo wacala sikolo Semabanga Laphansi eVondwe nga- 1977,” kuchubeka thishela.
3
“Nasekafundza esikolweni semabanga laphakeme, wacala kutsandza sifundvo seSayensi nesebuNjiniyela,” kusho thishela Mary.
-
“Yini buNjiniyela?” abuta.
-
“YiSayensi lehlangene neThekhnoloji,” kuphendvula Nkoka.
-
“Bumayelana nekwentiwa kwemishini, takhiwo, kanye naletinye tintfo,” kuphendvula Kulani.
4
“Nobabili nicinisile. BoNjiniyela bahlela baphindze bakhe imishini, letinye tintfo kanye netakhiwo. Basebentisa iSayensi neThekhnoloji,” kusho thishela.
-
“Nasekacedze sikolo Semabanga Laphakeme eMbilwi, Mulalo watfola umfundzate wekuyofundzela buNjiniyela eNyuvesi yaseKapa,” uyachubeka.
5
“Nasekasenyuvesi, Mulalo wasungula inhlangano lebitwa ngekutsi yi-Temescial.
-
Leligama limelela kutsi Technology, medicine, and science for all.
-
I-Temescial ikhutsata lusha kutsi lufundzele iSayensi, iThekhnoloji, buNjiniyela kanye neTibalo.
-
Ngekuhamba kwesikhatsi, sitawufundza lokunyenti ngaloko.”
6
“Nasekatfole sicu semfundvo yakhe yekucala, Mulalo waya eMelika. Wafundza waphindze wafundzisa emanyuvesi alapho.
-
Wafundzisa iSayensi neTibalo. Yini Tibalo?” kubuta thishela Mary.
-
“Sifundvo setibalo, sekuma kwetintfo nemaphethini,” kusho Akani.
7
“Uphendvule kahle, Akani,” kusho thishela.
-
Wachubeka nendzaba yakhe.
-
“Mulalo uneticu tebudokotela. Watfola ticu temfundvo lesezingeni lelisetulu, i-PhD. Nasewutfole tona, ubitwa ngadokotela. Unguchwepheshe emkhakheni webuNjiniyela.”
8
“Nyalo, ngembikwekutsi nginicocele ngetintfo letisungulwe nguMulalo, asenginikhumbute ngentfo yekwakha lekutsiwa ngusemende,” kusho thishela.
-
“Semende unelitje lekutsiwa yi-Limestone futsi usetjentiswa ekwakheni.
-
Lelitje ligujwa emayini, liyaphihlitwa libe timvutfu bese liyashiswa kute libe ngusemende.”
9
“Bafundzi, Mulalo wasungula intfo yekwakha lengakhiwa ngalelitje. Kepha yona yakhiwa ngemalahle naletinye tintfo letilahlwe etimbonini.
-
Loku kusho kutsi ungakwati kwenta semende ngaphandle kwekugubha i-Limestone. Ngekwenta kanjalo imvelo iyalondvoloteka.”
10
“Mulalo waphindze wasungula umshini wekwakha titini lokutsiwa yi-Ecocast. Lomshini wonga emanti nagesi. Phela emanti ayindlala!”
-
“Akukafaneli sishiye timpompi tivuliwe tikhipha emanti,” kusho Jack.
-
“Yebo, sonkhe kufanele siwonge emanti,” kuphendvula Lulama.
11
“Sengitocedzela indzaba yami ngekunicocela ngesidududu lesihamba ngehayidrojini! Lesidududu sibitwa ngekutsi Ahifambeni. Mulalo wasungula lencola asebenta nalabanye bacwaningi,” kusho thishela.
-
“Hawu sidududu sehayidrojini!” kumangala Kulani.
-
“Ahifambeni! Asihambeni!” kusho Nkoka.
12
“Yebo! “Asihambeni siyofundzela buNjiniyela sitosungula tintfo letikahle!” kusho Kulani.
-
“Asisebentise iSayensi kanye neThekhnoloji kuze sicatulule tinkinga futsi sitijabulise!” kusho Nkoka.
-
“Bengati kutsi itanikhutsata indzaba yaMulalo!” kusho thishela Mary amoyitela.
13

——Imibuto


  1. Yini lofuna kuyoyifundzela? Yini lekwenta utsandze kuyofundzela loko?
  2. Ucabanga kutsi yini leyenta Mulalo watsandza iSayensi nebuNjiniyela?
  3. Fundza lokwengetiwe ngetinhlobonhlobo tebuNjiniyela.
  4. Fundza lokwengetiwe ngeBasunguli betintfo base-Afrika.
  5. Tintfo letisungulwe nguMulalo tiyivikela njani imvelo?
  6. Siyini STEM ? Chaza kutsi yini lesenta sibaluleke.
  7. Ngaphandle kweNyuvesi yaseKapa, tfola lamanye emanyuvesi lasikhombisa aseNingizimu Afrika lafundzisa buNjiniyela.
  8. Chaza kutsi yini leyenta emanti abengumtfombolusito loyimvela kancane.
14

——Tincwadzi letikuloluchungechunge


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Lendzaba icanjwe yaphindze yabhalwa ngesiTsonga, njengencenye yephrojekthi yetintfo tekufundza te-Zenex Ulwazi Lwethu nga-2020.
16
Attribution CC BY
Your attribution should include the following:
Title: Imibono lehlakaniphile yaMulalo Doyoyo
Author/s: Arnold Mushwana
Translator/s: Simangele Khoza
Illustrator/s: Thulisile Shongwe
Assurer/s: Mduduzi Benjie Shongwe
Language: Siswati

© Zenex Foundation - Saide 2025

CC BY includes the following elements:
 BY   – Credit must be given to the creator