Dikakanyo tse di botlhale tsa ga Mulalo Doyoyo
Arnold Mushwana
Thulisile Shongwe
Setswana
Longer paragraphs

——


E ke kgang ka ga Mulalo Doyoyo, Motlhami le Rasaense wa mo Aforikaborwa.
-
Batlhami ke batho ba ba nagang le go tlhama mefuta yotlhe ya dilo tse dintšhwa.
-
Mulalo o dirisa Saense le Thekenoloji go tlhama ditlhangwa tse di thusang batho le tikologo.
1
“Ke batla go le bolelela ka ga Moenjeniri yo o nnileng motlhami yo o tumileng. O tsaletswe mo motsaneng wa Vondwe,” morutabana Mary a simolola.
-
“Morutabana, Vondwe ke kae?” Lulama a botsa.
-
“E kwa magaeng a Porofense ya Limpopo,” ga araba morutabana.
2
“Mulalo Doyoyo o tsetswe ka 1970. Lona lotlhe ba, le ne le le kae ka 1970?” ga botsa morutabana Mary.
-
“Re ne re se teng ka 1970, morutabana,” ga araba Jack ka setshego.
-
“Mulalo o simolotse sekolo sa poraemari kwa Vodwe ka 1977,” morutabana a tswelela.
3
“Fa a ya sekolong se segolo, o ile a rata Saense le Boenjeniri,” morutabana Mary a tlhalosa.
-
“Boenjeniri ke eng?” a botsa.
-
“Ke Saense le Thekonoloji di kopane,” ga araba Nkoko.
-
“Ke ka go aga metšhini, dikago le tse dingwe,” ga araba Kulani.
4
“Le nepile ka bobedi. Baenjenere ba bopa le go tlhama metšhini, didiriswa, le dikago. Ba dirisa Saense le Thekenoloji,” morutabana a tlhalosa.
-
“Fa a fetsa dithuto kwa Sekolosegolo sa Mbilwi, Mulalo a bona kabo ya thuto go ya go ithutela Boenjeniri kwa Yunibesithing ya Kapa,” morutabana a tswelela.
5
“Fa a le kwa yunibesithing, Mulalo a tlhama mokgatlho o o bidiwang Temescial.
-
Se se emetse ‘Thekenoloji, melemo, le saense ya botlhe’ (Technology, medicine, and science for all).
-
Temescial e rotloetsa bašwa go ithutela Bonetetshi, Thekenoloji, Boenjeniri le Dipalo.
-
Morago, re tla batlisisa go le gontsi ka se.”
6
“Morago ga go falola dikerii ya gagwe ya ntlha, Mulalo a ya kwa Amerika. O ithutile le go ruta kwa diyunibesithing tsa koo.
-
O ithutile Bonetetsi le Dipalo tsa Tiriso. Dipalo ke eng?” morutabana Mary a botsa.
-
“Go ithuta dipalo, dipopego le dipaterone,” ga bua Akani.
7
“Go siame, Akani,” ga bua morutabana.
-
A tswelela ka kgang ya gagwe.
-
“Mulalo o na le maemo a borutegi a bongaka. O fitlheletse dikerii e e kwa godimodimo, ya PhD. Morago ga e, o bidiwa ngaka. Ke mankge mo lephateng la Boenjeniri.”
8
“Pele nka le bolelela ka ga botlhami ba ga Mulalo, nte ke le gakolole ka ga sediriswa sa kago se se bidiwang samente,” ga bua morutabana.
-
“Samente e na le motswako wa matlapana a laeme, e dirisiwa thata mo dikagong tse dintsi.
-
Matlapa a epiwa, a thubiwe go nna boleta, a fisiwe go dira samente.”
9
“Barutwana, Mulalo o tlhamile sediriswa sa go aga se se se nang matlapa. Fela, se dirisa molora le matlakala a mangwe a madirelo.
-
Se se raya gore go a kgonega go dira samente kwa ntle ga matlapa a laeme go tswa mo lefatsheng. Se raya gore tikologo ga e a senngwa.”
10
“Mulalo o tlhamile gape le motšhini wa go dira ditena tsa Ecocast. One o somarela metsi le maatla. Metsi ke sediriswa se se tlhaelang!”
-
“Ga re a tshwanela go tlogela dithepe di bulegile mme metsi a elela,” ga bua Jack.
-
“Ee, mongwe le mongwe o na le maikarabelo a go somarela metsi,” Lulama a tlatsa.
11
“Ke gaufi le go feleletsa kgang ya me ka sethuuthu se se tsamaisiwang ke haeterojene. Sethuuthu seo se bidiwa Ahifambeni. Mulalo o tlhamile serori se, le babatlisisi ba bangwe,” morutabana a tlhalosa.s
-
‘Sethuuthu sa haeterojene, ke botlhale boo!” ga bua Kulani.
-
“Ahifambeni. A re tsamayeng,” ga bua Nkoka.
12
“A re yeng go ithuta Boenjeniri mme re tlhame dilo tse di botlhale!” ga bua Kulani.
-
“A re diriseng Saense le Thekenoloji go rarabolola mathata mme re natefelwe!” ga bua Nkoka.
-
“Ke itsitse gore kgang ya ga Mulalo e tla le rotloetsa!” ga bua morutabana Mary ka monyebo.
13

——Dipotso


  1. O rata go ithutela eng? Ke goreng o batla go ithutela seo?
  2. O nagana gore ke goreng Mulalo a nnile le kgatlhego ya go ithutela Saense le Boenjeniri?
  3. Batlisisa go le gontsi ka mefuta e e farologaneng ya Boenjeniri.
  4. Batlisisa go le gontsi ka Batlhami ba Aforika.
  5. Dilo tse di tlhamilweng ke Mulalo di sireletsa tikologo jang?
  6. STEM ke eng? Tlhalosa gore ke goreng se le botlhokwa?
  7. Ntle le Yunibesithi ya Kapa, batla tshedimosetso ya diyunibesiti tse dingwe tse supa tsa mo Aforikaborwa tse di rutang boenjeneri.
  8. Tlhalosa gore ke goreng metsi e le motswedithuso o o tlhokafalang segolo.
14

——Dibuka tse di mo motseletseleng o


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Kanelo e tlhamilwe le go kwalwa ka Xitsonga ka 2020, e le porojeke ya didiriswa tsa go buisa ya Zenex Ulwazi Lwethu.
16
Attribution CC BY
Your attribution should include the following:
Title: Dikakanyo tse di botlhale tsa ga Mulalo Doyoyo
Author/s: Arnold Mushwana
Translator/s: Dineo Moatshe
Illustrator/s: Thulisile Shongwe
Assurer/s: Opelo hole
Language: Setswana

© Zenex Foundation - Saide 2025

CC BY includes the following elements:
 BY   – Credit must be given to the creator