Muḓanani wa Masoyi, ho vha hu na musidzana wa vhuṱali ane a pfi Nomusa.O vha a tshi dzula na makhulu wawe vha mukegulu vha re mulimi wa mavhele.Vhathu vhanzhi muḓanani vho vha vha sa koni u vhala kana u ṅwala. Vha tshi ḓitshidza nga zwa vhulimi.

Nomusa u funa u ya tshikoloni nahone makhulu wawe vha ḓirwa khana ngae.Ḓuvha na ḓuvha a tshi vhuya tshikoloni, makhulu wawe vha mu fha mishumo ine a tea u ita.U fanela u pandamedza dziṱhoho na zwiṋoni uri zwi si ḽe zwiliṅwa.

Nomusa o wana zwi tshi mu konḓela u pandamedza dziṱhoho na zwiṋoni masiari oṱhe.Kanzhi o vha a sa wani tshifhinga tsha u fhedza mushumo wawe wa tshikolo.Vhana vhanzhi muḓanani a vha yi tshikoloni ngauri vha ya masimuni ḓuvha ḽoṱhe.

Musi tshifhinga tshi tshi ya, Nomusa o netiswa vhukuma nga u pandamedza zwiṋoni na dziṱhoho masimuni.A humbula u ri, “Ndi na maano.”

Nomusa o ṱanganya thanda a dzi vhofhekanya.O ambadza thanda dzenedzo hemmbe yawe ya mushumo nahone fhasinyana a dzi vhofha nga tshikete tshawe.A dzi imisa dza tou thwii a dzi ambadza muṅadzi wawe wa mushumo. Dza vha tshitshuwisa-zwiṋoni!

Nomusa a vhea tshitshuwisa-zwiṋoni vhukati ha tsimu ya mavhele.“Tshitshuwisa- zwiṋoni tshi ḓo linda tsimu musi ndi tshi khou ita mushumo wa tshikolo. Makhulu vha ḓo humbula u nga ndi masimuni,” Nomusa a tshi khou setshelela.

Ḓuvha ḽiṅwe na ḽiṅwe o vha a tshi dzumba mukhwama wawe wa tshikolo musi a tshi ya masimuni.O vha a tshi ambara zwiambaro zwa tshikolo ngeno a tshi ambadza tshitshuwisa-zwiṋoni zwiambaro zwawe zwa u shuma.Nga murahu a dzula fhasi ha murunzi a ita tshuṅwahaya.

Musi maḓuvha a tshi khou ḓi ṱanḓulukana, Nomusa o humbula u ri, “Makhulu vha nga si vhuye vha ḓivha nga puḽane yanga?”Nomusa o vha o takala na u mangala nga tshifhinga tshithihi.Dziṱhoho na zwiṋoni a zwo ngo dzhena masimuni a mavhele.

Ḽiṅwe ḓuvha nga masiari, makhulu a Nomusa vho ya masimuni u kaṋa zwikoli.Hovha ho tou ṅoo masimuni. Hu si na dziṱhoho kana zwiṋoni.Makhulu vha ri, “Nomusa u khou ita mushumo wavhuḓi nga maanḓa.”

Makhulu vha vhidzelela, “Nomusa, Nomusa! U ngafhi?”Ha sa vhe na phindulo.Vha vhona tshitshuwisa-zwiṋoni vhukati ha tsimu, tsho ambara zwiambaro zwa Nomusa!

Musi makhulu vha tshi vhona zwe Nomusa a ita, vho ḓirwa khana nga muḓuhulu wavho.Vha ri, “Hoyu ndi muhumbulo wo tshaho. Muḓuhulu wanga a nga si ye masimuni u pandamedza dziṱhoho na zwiṋoni.”

Vhathu vhoṱhe muḓanani vho funa maano a vhuṱali a Nomusa. Vha thoma u shumisa zwitshuwisa-zwiṋoni masimuni avho.Zwitshuwisa-zwiṋoni zwo vha zwi tshi pandela zwiṋoni na dziṱhoho masimuni.Nahone vhana vhoṱhe muḓanani vho vha vha tshi nga kona u ya tshikoloni.