Motseng wa Masoyi, go be go na le mosetsana wa bohlale wa go bitšwa Nomusa.O be a dula le koko wa gagwe yo a bego a lema mafela.Bontši bja batho ba motse ba be ba sa kgone go bala le go ngwala. Ba be ba phela ka go lema.

Nomusa o be a rata go tsena sekolo, ebile koko wa gagwe a ikgantšha ka yena.Koko o be a mo fa mešongwana ya ka gae ka mehla ge a boa sekolong.O be a swanetše go koba ditšhwene le dinonyana tšeo di bego di nyaka go ja dimela.

Go koba ditšhwene le dinonyana mathapama ka moka go be go le boima go Nomusa.Gantši o be a sa kgone go fetša mošomo wa gagwe wa sekolo.Bontši bja bana ba mo motseng ba be ba palelwa ke go dira mošomo wa sekolo gobane ba ehlwa mašemong letšatši ka moka.

Ge nako e eya, Nomusa a ikwa a lapišitšwe ke go koba ditšhwene le dinonyana mašemong.“Ke na le leano le bohlale,” a nagana.

Nomusa a bofantšha dikotana mmogo.A apeša dikotana gempe ya gagwe ya mošomo. A bofelela sekhethe mo dinokeng.A emiša dikotana tšela gomme a di apeša kuane ya gagwe mo godimo.Ya ba setšhoši.

Nomusa a bea setšhoši mo gare ga tšhemo ya mafela.“Se se tla tšea sekgoba sa ka mola ke dira mošomo wa sekolo. Koko o tla nagana gore ke ka tšhemong,” Nomusa a myemyela.

Tšatši le lengwe le le lengwe, o be a tšea mokotla wa gagwe wa sekolo ka sephiring, a leba tšhemong.A dula a apere diaparo tša sekolo mola a apešitše setšhoši diaparo tša gagwe tša mošomo.Gomme a dula moriting a dira mošomo wa sekolo.

Matšatši a ile a feta gomme Nomusa a nagana, “Koko a ka se tsoge a lemogile leano la ka la bohlale.”Nomusa o be a thabile ebile a maketše.Ditšhwene le dinonyana ga di batamele tšhemong ya mafela.

Mathapameng a mangwe, koko wa Nomusa a ya go kga mafela tšhemong.Go be go homotše ka tšhemong. Ditšhwene le dinonyana di be di sa bonale felo.Koko a nagana, “Nomusa o dira mošomo wo mobotse.”

Koko a goelela, “Nomusa! Nomusa! O mo kae? Gwa hloka karabo.A bona setšhoši mo gare ga tšhemo se apere diaparo tša Nomusa!

E rile ge koko a lemoga se Nomusa a se dirilego, a ikgantšha ka motlogolo wa gagwe.A nagana, “Bjo ke bohlale. Ga go hlokege gore motlogolo wa ka a yo koba ditšhwene le dinonyana ka tšhemong.”

Batho ka moka mo motseng ba ratile leano la Nomusa. Ka moka ba ile ba thoma go šomiša ditšhoši ka mašemong a bona.Ditšhoši di ile tša koba ditšhwene le dinonyana ka mašemong.Bana ba motse ka moka ba kgona go ya sekolong.