Ethresteni leMasoyi kwakunomntazanyana ohlakaniphe khulu ibizo lakhe kunguNomusa.Wabe ahlala nogogwakhe, owabe amlimi weemphila.Abantu abanengi kilendawo bebangakwazi ukufunda nokutlola. Bebaphila ngokulima.

UNomusa wabe athanda ukuya esikolweni, ugogwakhe wabe azikhakhazisa ngaye.Ngaso soke isikhathi nakabuya esikolweni, ugogwakhe bekamnikela umsebenzi wekhaya ukobana awenze.Wabe afanele athuse iimfene neenyoni ebezifuna ukudla iintjalo.

UNomusa wathola kubudisana ukobana agijimise iimfene neenyoni woke malanga ngantambama.Esikhathini esinengi wabe anganaso isikhathi sokuqeda umsebenzi wakhe wesikolo.Abantwana abanengi ethresteni bebalova bangayi esikolweni ngombana bekufanele bona baye emasimini imini yoke.

Kwathi isikhathi nasikhambako, uNomusa wazizwa adinwa khulu kugijimisana neenyoni kanye neemfene emasimini.“Nginecebo elihlakaniphileko,” watjho acabanga.

UNomusa wabophelela iingodo wazihlanganisa kuhle.Wathatha irhembe yakhe yesikolo wayifaka iingodwezi wathatha isikerde sakhe naso wasibophelela kuhle eengodweni.Wathatha iingodwezi wazijamisa rwe wathatha ingwanakhe wayihloma phezulu.Bekuyinto yokuthusa iinyoni, isithusiinyoni!

UNomusa wabeka isithusiinyoni phakathi kwamasimu.“Lokhu kuzakwenza umsebenzi wami lokha nangenza umsebenzi wami wesikolo. Ugogo uzakucabanga bona ngisemasimini,” kutjho uNomusa amomotheka.

Qobe lilanga, uthatha isikhwama sakhe seencwadi ngobunyenye atjhinge emasimini.Uhlala ngezambatho zakhe zesikolo ambathise isithusiinyoni izembatho zakhe zokusebenza.Ngemva kwalokho, wahlala ngaphasi komthunzi womuthi wenza umsebenzi wakhe wesikolo wekhaya.

Amalanga akhamba uNomusa wacabanga,“Ugogo angeze azi ngecebo lami elihlakaniphileko.” UNomusa wabe athabile begodu ararekile. Iimfene neenyoni akhange zisalibeka emasimini.

Ngelinye ilanga ntambama, ugogo kaNomusa waya emasimini ayokukha isiphila esihlaza.Emasimini bekuthule kuthe du. Iimfene neenyoni bezingekho.Ugogo wazitjela bona uNomusa wenza umsebenzi omuhle tle.”

Ugogo warhuwelela, “Nomusa! Nomusa! Ukuphi mntwanomntwanami?”Akhange kube nependulo.Ngemva kwalokho wabona isithusiinyoni phakathi nendawo emasimini, sembethe izambatho zakaNomusa!

Ugogo nakalemuka lokho uNomusa akwenzileko, wazikhakhazisa khulu ngomzukulu wakhe.Wacabanga, “Leli kulicebo elihlakaniphe khulu. Umzukulwanami akukafaneli aye emasimini ayokuthusana neemfene neenyoni.”

Woke umuntu ethresteni wathanda icebo likaNomusa elihlakaniphileko. Boke abantu bathoma ukusebenzisa iinthusiinyoni emasimini wabo.Iinthusiinyoni zenza bona iimfene neenyoni zibaleke emasimini.Boke abantwana ethresteneli bangakghona ukuya esikolweni.