Ugogo uMapula ubuka inqwaba yamaklabishi akhe abekwe eduze komnyango wangaphambili endlini yakhe. Usebenze kanzima esivandeni sakhe.Manje sekuyisikhathi sokuthi ayodayisa isivuno sakhe emakethe.“Ngizodinga abantu abazongisiza ukubala nokupakisha la maklabishi,” kucabanga ugogo.

Esame khona lapho uGogo kwadlula uJabu, uDineo noDimpho. Wajabula kakhulu ukubabona.“Wozani nizongisiza ngokupakisha la maklabishi kula mabhokisi,” kucela ugogo.Wayazi ukuthi bayizingane ezihlakaniphile futhi ezithanda ukusiza abantu.

Baqala babonisana ngokuthi babezowapakisha kanjani amaklabishi.“Asiwabale bese siwapakisha ngamabili,” kusho uDineo.“Asiwabale siwapakishe ngamane,” kusho uJabu.“Mina ngithi asiwabale bese siwapakisha ngamathathu,” kusho uDimpho.

Bagcina bevumelana ngokuthi ukuwabala ngamane yikhona okwakuzoshesha.“Kungena amaklabishi ayishumi nambili ebhokisini ngalinye,” kusho uDineo.“Kwakuhle lokho, futhi kuzoshesha!” kumoyizela uGogo. “Sekudingeka ukuthi uMnumzane Jonas awathathe awase emakethe.”

“Lizobiza malini iklabishi lilinye Gogo?” kubuza uDineo.“Ngiyazi ukuthi ningakubala kalula lokho. Ibhokisi elilodwa libiza uR60,” kusho uGogo.“Uma ibhokisi libiza uR60, libe linamaklabishi ayishumi nambili, kumele sehlukanise amashumi ayisithupha ngeshumi nambili,” kusho uDineo.

“Sengiyazi minai! kusho uJabu. “Iklabishi lilinye lizobiza uR5.”“Nami ngiyavuma!” kuphendula uDimpho.Abasizi bakaGogo baqala bawapakisha onke amaklabishi.Wafika wajabula kakhulu uMnumzane Jonas ngoba wawungasekho umsebenzi omkhulu ayezowenza. “Ngizoqinisekisa ukuthi bawathenga wonke la maklabishi emakethe,” kusho uMnu Jonas.

Izingane zahlala zaphumula ngaphansi kwesihlahla esivandeni sikaGogo. Zabona into ayayifihlwe nguGogo ngaphansi kwephinifa lakhe.“Yini le oyifihle ngaphansi kwephinifa Gogo?” kubuza uDineo.“Engifuna ukunibonga ngakho ngomsebenzi omkhulu eniwenzile. Kuzodingeka ukuthi nikwabelane ngokulingana,” kusho uGogo.

Izingane zamemeza ngokujabula. UGogo uMapula wabanikeza ama-aphula amaningi futhi amnandi.“Abukeka emnandi,” kusho uDineo ekhotha izindebe zakhe.“Ngabe awethu wonke la ma-aphula?” kubuza uDimpho emangele.“Kunjalo, kodwa khumbula ukuthi kufanele niwabelane ngokulingana!” kusho uGogo.

“Asiwabaleni,” uDimpho ubeka umbono.Bawabala ngamabili.“Kunamaqoqo ayisishiyagalombili ama-aphula abekwe ngamabili, ne-aphula elilodwa ngaphezulu, Esewonke ayishumi nesikhombisa,” kusho uDimpho.“Kusho ukuthi kufanele sehlukaniselane ngokulingana thina sobathathu ama-aphula ayishumi nesikhombisa,” kubeka uJabu.

Babala ama-aphula ayisihlanu umuntu emunye, kwasala amabili ngaphezulu.Badideka ukuthi babezowahlukanisa kanjani lawa asele.“Kufanele siwasike abe ngohhafu,” kusho uDimpho.“Kumele siwasike abe amakota,” kubeka uJabu.

“Kodwa ngeke thina sobathathu sikwazi ukwehlukaniselana ohhafu noma amakota,” kukhononda uDineo.“Asiwanikezeni uGogo noMnu Jonas!” ubeka umbono.“Yebo, ngoba uGogo nguyena owatshalile,” kuvuma uJabu.“UMnu Jonas nguyena owahambise emakethe,” kwengeza uDimpho.

UMnu Jonas wabuya emakethe emva kokudayisa amaklabishi.UDimpho wanikeza uGogo noMnu Jonas ama-aphula ayesele.Abasizi bakaGogo abahlakaniphile baziqhenya kakhulu ngesenzo sabo sokusiza uGogo.Basebenzisa ulwazi ababeluthole esikoleni ukusiza uGogo kanjalo nangokwabelana ngokulingana.