UGogo Mapula waqala iwobhu lamakhabitjhi abe aseqadi komnyango wakhe ongaphambili. Wasebenza ngamandla ukutlhogomela itoni yakhe.Njenganje, besele kusikhathi sokobana ayokuthengisa koke akuvunileko emarageni.“Ngizokudinga isizo ngokubala nangokupaka amakhabitjhi la,” kucabanga uGogo.

UGogo uthe asajame emnyango uJabu, uDineo, noDimpho badlula eduze kwendlu yakhe. Wathaba khulu nakababonako.“Ngibawa ningene nizongisiza ukupaka koke engikuvunileko sikufake emabhoksini la,” kutjho ugogo abawa abantwana.Bekazi bona bebahlakaniphile begodu bayakuthanda nokusiza.

Abantwana bacoca ngokuthi bayowapaka njani amakhabitjhi.“Asibaleni amakhabitjhi la bese siwapaka ngokweenqhema zakubili,” kutjho uDineo.“Asiwabaleni amakhabitjhi la bese siwapaka ngokweenqhema zakune,” kutjho uJabu.“Asiwabaleni amakhabitjhi la bese siwapaka ngokweenqhema zakuthathu,” kutjho uDimpho.

Abantwana babona bonyana ukubala amakhabitjhi ngokweenqhema zakune kuzakuba ngcono khulu nokobana kuzakuba yindlela emsinya yokupaka amabhoksi.“Amakhabitjhi alitjhumi nambili alingana ebhoksini elinye nelinye”, kutjho uDineo.“Nisebenzile, kube msinya khulu!” kumomotheka uGogo.“Njenganje uBaba uJonas angathatha amakhabitjhi awase emarageni.”

“Ikhabitjhi yinye izakubiza malini?” Kubuza uDineo.“Ngiyazi nina ningabala nibone. Ibhoksi elilodwa libiza amaranda ama-R60,” kutjho uGogo.“Nangabe ibhoksi elilodwa libiza imali engange-R60, begodu kunamakhabitjhi alitjhumi nambili ngebhoksini, kufanele sihlukanise amatjhumi asithandathu ngetjhumi nambili,” kutjho uDineo.

“Ngiyazi kutjho uJabu. “Ikhabitjhi eyodwa izakubiza amaranda ama-R5.”“Iye uqinisile!” kuphendula uDimpho.Abasizi bakagogo bapaka woke amakhabitjhi.UBaba uJonas wabe athabe khulu ngombana bekangasenamsebenzi omnengi. “Ngizakwenza isiqiniseko sokobana woke amakhabitjhi la ayathengwa emarageni,” watjho athabile.

Abantwana bahlala ngaphasi komuthi etonini baphumula. Babona uGogo afihla into ngaphakathi kwefasikoti yakhe.“Khuyini lokho Gogo?” kubuza uDineo.“Awa mntwanomntwanami yinto nje yokunithokoza ngomsebenzi omuhle eniwenzileko. Kodwana kufanele niyabelane ngokulingana,” kutjho uGogo.

Abantwana barhuwelela bathabile. UGogo Mapula wabanikela iwobhu lamahabhula.“Wu! Aqaleka amanandi,” kutjho uDineo lokha nakakhotha iindebe zakhe zomlomo.“Alo woke nje ngewethu Gogo?” kubuza uDimpho ararekile.“Iye, khumbula kufanele niwabe ngokulingana!” kutjho uGogo.

“Asiwabaleni amahabhula la,” kuphakamisa uDimpho.Babala amahabhula ngokweenqhema zakubili.“Kuneenqhema ezibunane zamahabhula amabili, nelinye godu elilodwa. Sekawoke, mahabhula alitjhumi nekhomba,” kutjho uDimpho. “Nakunjalo-ke, kufanele sihlukanise amahabhula alitjhumi nekhomba phakathi kwethu sobathathu,” kutjho uJabu.

Abantwana babala amahabhula amahlanu azakutholwa mumuntu ngamunye, bese kwasala amahabhula amabili.Bebangasazi bona babelane njani amahabhula amabili aseleko.“Kufanele sisike amahabhula amabili abe ziinquntu,” kutjho uDimpho.“Kufanele sisike amahabhula amabili la abe ziinkwere,” kutjho uJabu.

“Kodwana thina sobathathu angeze sabelana ngeenquntu namkha ngeenkwere ngokulinganako,” kunghonghoyila uDineo.“Asithatheni amahabhula aseleko la sinikele uGogo noBaba uJonas,” kuphakamisa uDineo.“Iye, ngombana uGogo utjale amakhabitjhi,” kuvuma uJabu.“Begodu uBaba uJonas uthethe iimvuno wazisa emarageni,” kungezelela uDimpho.

UBaba uJonas wabuya emarageni ngemva kobana athengise woke amakhabitjhi.UDimpho wathatha amahabhula amabili aseleko wawanikela uGogo uMapula banoBaba uJonas.Abasizi abahlakaniphileko bebazikhakhazisa ngalokho abakwenzileko. Basebenzise lokho abakufunde esikolweni ukusiza uGogo begodu nokwabelana ngokulinganako.