Gcina Mhlophe, mugaringeti wo hlawuleka
Eric Khorombi
Vusi Malindi
Xitsonga
Longer paragraphs

——


Xitori lexi i xa Nokugcina Mhlophe.
-
U tswariwile hi 1958, eKwaZulu-Natal. U kurisiwile hi kokwanaxisati wa yena.
-
Kokwanaxisati wa yena a hamba a n’wi rungulele mitsheketo hi Xizulu. U rungulela Gcina mitsheketo yo tala a ha ri lontsongo.
1
Kokwanaxisati wa Gcina u n’wi rungulele mitsheketo ku kondza a kota no vumba swifaniso swa miehleketo.
-
Gcina a ta yingisela kahle loko a karhi a runguleriwa.
-
Loko Gcina a ri na khume wa malembe, kokwanaxisati wa yena u n’wi tekile va ya tshama eKapa-Vuxa.
2
Gcina u kule a nga ri na vuhungasi byo tala na mavonakule. U kule a rhandza ku hlaya tibuku.
-
U sungule ku tsala mitsheketo na switlhokovetselo hi Xiqhoza.
-
Hi le tlhelo a va a karhi a dyondza no pfuneta ekerekeni.
3
Siku rin’wana mufundhisi na nghamu yakwe va n’wi rhambile ekaya ra vona.
-
Hi xa mundzuku nimixo mufundhisi u rhambile Gcina eka nhlengeletano etikweni ra le kusuhi.
-
Nhlengeletano a yi ri ekaya ka Hosi.
4
Nhlengeletano a yi ri mayelana no pfumelela tihomu ku ya emuhwanini.
-
Loko a ri kwale, u vonile wanuna a ambarile xiambalo xa xintu xo vangama.
-
Wanuna loyi a ri muphati. Muphati i munhu loyi a ndhundhuzelaka no yimbelela eka mitlangu ya xintu.
5
Gcina u tsakisiwile hi ndlela leyi muphati a tirhisa vutshila na ririmi hakona. U tivisiwile eka muphati na Hosi.
-
Loko muphati a n’wi qhavula, a titwa a ri muphati na yena.
-
Gcina u tekile xiboho xa ku va muphati.
6
Hi 1979, Gcina u rhurhele eJoni laha a tirheke tani hi mupfuni wa le makaya. A hlayisa vana va mune vo phungela.
-
Siku rin’wana u va miyetile hi ku va hlamusela ntsheketo.
-
Ntsheketo a wu vulavula hi Nanabuhlele, xinghunghumana lexikulu xa mihlovohlovo lexi a xi tshama ematini.
7
A nga swi tivi leswaku vana va ta tsakela migaringeto ya yena ya xi Afrika. Kambe ku nga si hela nkarhi va ku, “Hi byele xitori xin’wana!”
-
U tekile xiboho xa ku sungula ku tsala mitsheketo.
-
A lava ku hlohlotela vana ku tsakela mitsheketo ya kokwanaxisati wa yena.
8
U sungule ku tsala tibuku ta vana, mitlangu, mitsheketo na swiphatu.
-
Wun’wana ntsheketo wa yena wo sungula a ku ri, ‘My Dear Madam.’
-
Ntsheketo lowu i wa vutomi byakwe tanihi mupfuni ekaya.
-
Ntsheketo wun’wana wa nkoka wa nkarhi lowu i ‘Love Child’, xa mayelana na vutomi bya Gcina.
9
Gcina a a lava ku sirhelela vutshila byo rungula mitsheketo.
-
Hikokwalaho ka sweswo u ve a sungula Zanendaba Institute.
-
Zanendaba i rito ra Xizulu leri vulaka ‘tana na mahungu’ kumbe ‘ndzi byele timhaka.’
-
Zanendaba Institute yi letela vanhu lava tsakelaka ku rungula no tsala switori.
10
Gcina u sungule pfhumba ra Nozincwadi Mother of Books Campaign hi 2001.
-
Gcina u hlohlotela ku hlaya na ku hlamusela mitsheketo hambi ku tsala mitsheketo ya vana.
-
U sungule ku endzela matikoxikaya mo hambanahambana eAfrika-Dzonga ku avelana na vanhu hi nkoka wo hlaya.
-
U tlhela a nyikela tibuku eka swikolo leswi a swi endzelaka leswaku va ti veka elayiburari.
11
Gcina u tlangile tanihi mutlanginkulu wa ntlangu lowu kumeke sagwati wa ‘Have you seen Zandile?”
-
Ntlangu lowu i wa nhwana lontsongo loyi a a tshama na kokwanaxisati wa yena eDurban, ivi mana wa Zandile a n’wi rhwala a n’wi yisa ematikoxikaya eKapa-Vuxa.
-
Gcina u tsarile ntsheketo lowu mayelana na vutomi bya yena.
12
Leswi hileswi Nokugcina Mhlophe a swi vuleke hi ntirho wa yena:
-
“Ndzi rungula mitsheketo ku pfuxelela mitsheketo eka vanhu, hikuva ndzi tshemba leswaku munhu un’wana na un’wana u na ntsheketo lowu a nga wu rungulelaka.”
-
U na ntsheketo lowu u nga hi rungulelaka?
13

——Swivutiso


  1. Xana Gcina Mhlophe i mani?
  2. I ncini xi endleke leswaku Gcina a lava ku va muphati?
  3. I ncini xi endleke leswaku Gcina a tsala mitsheketo?
  4. Kuma ntsheketo lowu tsariweke hi Gcina Kutani u wu hlayela ehenhla.
  5. Tsala ntsheketo hileswi nga tshama swi ku humelela evuton’wini.
  6. Hikokwalaho ka yini u ehleketa leswaku ku hlaya i swa nkoka?
  7. Hi yihi mitirho leyi u yi endlaka hi nkarhi wa wena wo wisa?
  8. Xana u lava ku tsundzukiwa hi nyiko yihi?
14

——


Ntsheketo lowu wu endliwile na ku tsariwa hi Xivhenda tanihi xiphemu xa phurojeke ya switirhisiwa swo hlaya swa Zenex Ulwazi Lwethu hi 2021.
15
16
Attribution CC BY
Your attribution should include the following:
Title: Gcina Mhlophe, mugaringeti wo hlawuleka
Author/s: Eric Khorombi
Translator/s: Arnold Mushwana
Illustrator/s: Vusi Malindi
Assurer/s: Hlongwani Hlongwani, Bongani Maluleke
Language: Xitsonga

© Zenex Foundation - Saide 2025

CC BY includes the following elements:
 BY   – Credit must be given to the creator