Gogo waGcina bekamcocela tinganekwane kangangekutsi bekakha titfombe emcondvweni wakhe.Gcina bekalalela ngekucophelela ngesikhatsi gogo wakhe amcocela inganekwane.Ngesikhatsi Gcina asaneminyaka lelishumi yebudzala, make wakhe wamtsatsa wayohlala naye eMphumalanga Kapa.

Gcina wakhula anetintfo letincane tekutijabulisa futsi bekute namabonakudze. Wakhula atsandza kufundza tincwadzi.Wacala kubhala tinganekwane netinkondlo ngesiXhosa.Ngesikhatsi lesifanako, bekamatasa ngemsebenti wesikolwa nangekusita esontfweni.

Ngalelinye lilanga, umfundisi wasesontfweni kanye nemfati wakhe wamcela kutsi abavakashele ekhaya labo.Ngakusasa ekuseni ngemuva kwelibhulakifesi, umfundisi wacela Gcina kutsi ahambe naye baye emhlanganweni esigodzini lesisedvute.Umhlangano bewusekhaya lendvuna.

Umhlangano bewumayelana netinkhomo letivunyelwa kutsi tiyodla ummbila.Ngesikhatsi alapho, wabona indvodza labeyigcoke imvunulo legcamile yesintfu.Lendvodza bekuyimbongi. Imbongi ngumhayi wetinkondlo kanye nemaculo esintfu loye akwente loko emicimbini yase-Afrika.

Gcina watsatseka ngendlela imbongi labeyisebentisa ngayo likhono kanye nelulimi lwayo. Bametfula esikhulwini nakuyo imbongi.Ngesikhatsi imbongi imchawula, wativa naye asafana nembongi.Gcina wancuma kutsi abe ngumhayi wetinkondlo.

Nga-1979, Gcina watfutsela eGoli, lapho wafike wasebenta khona njengesisebenti sasendlini. Bekagadza bantfwana labane labahluphako!Ngalelinye lilanga, wancuma kubacocela inganekwane kute ababindzise.Indzaba yakhe beyimayelana naNanabuhlele, silwanekati lesikhulu lesinemibala leminyenti lesihlala emantini.s

Bekangati kutsi bantfwana batotijabulela yini tinganekwane takhe tase-Afrika, kepha ngekushesha nje bese bamemeta, “Sicocele lenye inganekwane!”Wancuma kutsi akwente kube ngumsebenti wakhe kubhala tindzaba.Bekafuna kukhutsata bantfwana kutsi nabo batsandze tindzaba tabogogo wabo.

Wacala kubhala tincwadzi, imidlalo, netindzaba letinyenti kanye netinkondlo tebantfwana.Lenye yetindzaba takhe tekucala bekunguletsi ‘My Dear Madam’.Le ndzaba imayelana nemphilo yakhe njengesisebenti sasendlini.Lenye indzaba lebalulekile yangalesi sikhathi ngulena letsi ‘Love Child’, lemayelana nemphilo yaGcina.

Gcina bekafuna kuvikela buciko bekucoca tindzaba. Analoku engcondvweni, wacalisa iZanendaba Institute.Kutsi Zanendaba kuligama lesiZulu lelisho kutsi ‘wota netindzaba’ nobe ‘ngicocele indzaba.’IZanendaba Institute icecesha bantfu labanenshisekelo yekucoca kanye nekubhala tindzaba.

Gcina wacalisa iNozincwadi Mother of Books Campaign nga-2021. Gcina ukhutsata kufundza ngekutsi acoce tindzaba aphindze abhale tincwadzi tebantfwana.Wacala kuvakashela tindzawo tasemakhaya eNingizimu Afrika kute akhulume ngekubaluleka kwekufundza.Waphindze wanika sikolwa ngasinye lasivakashelako tincwadzi, kute batifake emtapweni wabo.

Gcina wadlala indzima lemcoka emdlalweni lowatfola umklomelo, lonesihloko lesitsi ‘Have you seen Zandile?’Lomdlalo umayelana nentfombatane lencane lehlala nagogo wayo eThekwini, wase make waZandile uyamtsatsa umyisa emakhaya aseMphumalanga Kapa.Gcina wabhala lomdlalo awususela kuloko lokwenteka kuye.

Naku lokushiwo nguNokugcina Mhlophe mayelana nemsebenti wakhe:“Ngicoca tindzaba kute ngivuse tindzaba kulabanye bantfu, ngobe ngikholelwa mbamba ekutseni konkhe lokuphilako kunendzaba lokungayicoca.”Ikhona yini indzaba lonayo longasicocela yona?