U-Asnath Mahapa uyakghona ukuphapha
Sara Lekganyane
Khanyisa Masemola
isiNdebele
Longer paragraphs

——


ULebo uhlunga uKaputeyini u-Asnath Mahapa mayelana nemagazini wakhe wesikolo. Uthabile ukuhlangana nomma wokuthoma eSewula Afrika omtjhayeli wesiphaphamtjhini.
-
“Lotjha Kaputeyini Mahapa! Siyakwamukela kilokhu kuhlungwa kwethu,” kutjho uLebo.
-
“Lotjha begodu ngiyathokoza. Ngibawa ungibize Asnath,” kutjho u-Asnath.
1
“Ngibawa ungitjele ngepilo yakho nawusesemncani,” kutjho uLebo.
-
“Ngabelethwa ngomnyaka we-1979 eLimpopo eSewula Afrika.
-
Lapha sihlala khona kwabe kunganaampompi namkha igezi. Sabe sifunda ngeenkesi,” kuphendula u-Asnath.
2
“Wathoma nini ukuba nekareko leemphaphamtjhini nokuzitjhayela?” kubuza uLebo.
-
“Lokha nangineminyaka eli-13 ngathoma ukuba nekareko leemphaphamtjhini.
-
Esikolweni ngathoma ukufunda abomagazini ngokutjhayela iimphaphamtjhini. Kwabe sengithomile njalo,” kukhumbula u-Asnath.
3
“Alo ithando lokutjhayela leli lakhula njani?” kubuza uLebo atlola amanothi.
-
“Benginande ngizibuza ukobana iimphaphamtjhini ezikulu zihlala njani emmoyeni!
-
Ngangifuna ukwazi okunengi ngokuthi iimphaphamtjhini ziphapha njani,” kuphendula u-Asnath.
4
Umbuzo kaLebo olandelako uthi, “Ngiziphi iimfundo ekufanele sizifunde ukobana sibe batjhayeli beemphaphamtjhini?”
-
U-Asnath uyahlathulula bona iMathemathiksi neSayensi kuziimfundo eziqakathekileko.
-
“Wenza godu nama-iri amanengi uzijayeza ukuphapha ngaphambi kobana uthole ilayisensi yokutjhayela isiphaphamtjhini,” utjho angezelela.
5
ULebo ubuza okunengi mayelana nokufundela ukuba mtjhayeli wesiphaphamtjhini.
-
U-Asnath uyaphendula, uthi, “Ukuba mtjhayeli wesiphaphamtjhini, kufanele wazi kuhle iinomboro nokuzibala.
-
Ukufundela ubuNjiniyera kukufundisa ngokuthi zisebenza njani iimphaphamtjhini. UbuNjiniyera bukhambisana neSayensi neMathemathiksi.”
6
“Yo! Alo wazizwa njani nawuphaphisa isiphaphamtjhini sakho sokuthoma?” kutjho uLebo.
-
U-Asnath uphendula uthi, “Bababe! Ihlokwami yabe ihlangahlangene begodu ngizizwa ngifuna ukuhlanza. Kodwana akhange ngibuyele emva.
-
Njenganje, ngiphaphela eenarheni ezihlukeneko, begodu ngifunda namasiko ahlukeneko.”
7
“Kutjho bona kumnandi khulu lokho! “Ungangitjela ngokuthi ziphapha njani iimphaphamtjhini?”
-
U-Asnath uhlathulula uthi, “Ummoya okhamba hlangana namaphiko ubumba amandla asunduza isiphaphamtjhini siye phambili.
-
Amandla asuka enjinini atjhovela isiphaphamtjhini phambili.”
8
“Kuyakarisa lokho,” kutjho uLebo. “Alo waba nabo ubudisi ekutheni ube mtjhayeli wesiphaphamtjhini?”
-
“Iye khona iintjhijilo zinengi! Ngatjelwa bona ngimfitjhani khulu. Okhunye godu kwathiwa iziqu zami azakaneli.
-
Nokobana ukutjhayela iimphaphamtjhii akusiwo umsebenzi wabantu bengubo.”
9
ULebo uyabuza uthi, “Alo wayirarulula njani imiraro leyo?”
-
“Ngalwa ukobana ngitjhugulule umthetho omayelana nobude bomuntu otjhayela isiphaphamtjhini. Ngabuyela esikolweni esifundisa ukutjhayela ngazuza amamaksi aphezulu.
-
Ngangifuna ukubatjengisa bona abantu bengubo bangawenza umsebenzi lo!” kuphendula u-Asnath.
10
ULebo uvuma ngehloko begodu u-Asnath uragela phambili, “Ngafunda bona nawenza ngokunqopha entweni angeze wabhalelwa.
-
Ngafunda ukungalaleli muntu othi angeze ngakghona ukukwenza. Begodu nokobana abomma bangenza enye nenye into engenziwa madoda.”
-
ULebo uthi, “Liqiniso lelo!”
11
“Yini ozikhakhazisa ngayo khulu?” kubuza uLebo.
-
“Ngabe ngineminyaka ematjhumi amabili kwaphela nangiphumelela ekubeni mtjhayeli wesiphaphamtjhini wokuthoma ongumma eSewula Afrika.
-
Ngabe ngiyingcenye yesiphaphamtjhini sokuthoma esaphaphiswa siqhema sabomma. Ngiyakuthanda ukukhuthaza abantazana ukobana bafunde iSayensi.”
12
ULebo uphetha ngokuthi, “Ngebhadi isikhathi sethu sesiphelile, ngiyathokoza ukuba nawe.
-
Usitjengisile bona umuntu nakanqophako entweni begodu asebenze ngamandla, angaphapha atjhinge phezulu!”
-
U-Asnath uyamomotheka uthi, “Ngiyathokoza Lebo. Kube lithabo elikhulu ukobana ngikhulume nawe!”
13

——Imibuzo


  1. Bobani abantu abasendatjaneni le begodu bakhuluma ngani?
  2. Kubayini uLebo ahlungwa?
  3. Khuyini eyenza u-Asnath afune ukuba mtjhayeli wesiphaphamtjhini?
  4. Dweba isiphaphamtjhini wena ungaphakathi umtjhayeli waso.
14

——Iincwadi eziselungelungeni leli


  • U-Andile Mji
  • U-Asnath Mahapa
  • UBongani Mayosi
  • UCharlotte Maxeke
  • UMmantsane Moche Diale
  • UMulalo Doyoyo
  • UTebello Nyokong
  • UTshilidzi Marwala
15

——


Indatjana le yatlhanywa begodu yatlolwa ngelimi leSepedi, njengengcenye yephrojekthi yeZenex Ulwazi Lwethu ye-2020 yeencwadi ezingafundwa.
16
Attribution CC BY
Your attribution should include the following:
Title: U-Asnath Mahapa uyakghona ukuphapha
Author/s: Sara Lekganyane
Translator/s: Sponono Mahlangu
Illustrator/s: Khanyisa Masemola
Assurer/s: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator