Lilanga Letisebenti
Eric Khorombi
Fezile Twala
Siswati
First paragraphs

——


ENingizimu Afrika, Lilanga Letisebenti liholide lesive leliba ngemhlaka 1 Inkhwekhweti.
-
Lencwadzi yetindzaba imayelana nemlandvo waleloholide lesive, nekutsi yini lelenta libaluleke.
1
“Kusasa liholide, angiyi esikolweni!” kusho Mulweli kubabe wakhe.
-
“Nami angisebenti kusasa!” kusho babe.
-
“Babe, yini loyentako ngeLilanga Letisebenti?”
2
“Kulungile Mulweli, asengikucocele ngeLilanga Letisebenti lelingumkhosi logujwa emhlabeni wonkhe,” kusho babe.
-
“Konkhe kwacala ngalesikhatsi bantfu labasebentako balwela kusebenta ema-awa lasiphohlongo ngelilanga. Bebangafuni kusebenta ema-awa langetulu kwalasiphohlongo ngelilanga.”
3
“Kantsi bebasebenta ema-awa lamangaki?” kubuta Mulweli. “Bebavame kusebenta ema-awa lalishumi nobe lalishumi nakunye ngelilanga!” kuphendvula babe.
-
“Ngemhlaka 1 Inkhwekhweti 1886, tisebenti taseMelika tatelega tifuna kutsi kuncishiswe sikhatsi letisisebentako ngelilanga, sibe ngema-awa lasiphohlongo.”
4
“Ngesikhatsi tishuca, kunalomunye umuntfu lowajikijela ibhomu emaphoyiseni.” “Kwabese kwentekani?” kubuta Mulweli.
-
“Tisebenti letine taboshwa tabekwa licala lekujikijela ibhomu. Talahlwa ngelicala futsi tabulawa,” kuphendvula babe akhuluma kancane.
5
“Emhlabeni wonkhe, tisebenti tashuca ngenca yekubulawa kwaletisebenti letine. Bantfu labasebentako babambisana babamunye.
-
Kusukela ngalelolanga, umhlaka 1 Inkhwekhweti waba lilanga lelimelela kulwa kwetisebenti tilwela timo letincono emsebentini,” kusho babe.
6
“Labanye bantfu balibita ngekutsi ‘Lilanga LeNkhwekhweti’ (May Day). Umhlaka 1 Inkhwekhweti umelela emalungelo ebantfu labasebentako, kanye nebunye bato tonkhe tisebenti. Uliholide lesive emaveni lamanyenti,” kuchaza babe.
7
“NgeLilanga Letisebenti eNingizimu Afrika, sihlanganyela netigidzi tetisebenti emhlabeni wonkhe ekugubheni umkhosi. Kuhlelwa imibutsano kanye nemishuco.”
-
“Lelilanga belisolo liliholide yini lapha eNingizimu Afrika kusukela nga-1886?” kubuta Mulweli.
8
“Kuphi-la!” kuhleka babe. “Hulumende welubandlululo bewungafuni siwugubhe umhlaka 1 Inkhwekhweti.
-
Kepha tinhlangano tetisebenti tatsi kuhulumende:
-
‘Lilanga leNkhwekhweti ngeletfu. Umhlaka 1 iNkhwekhweti wetfu!’”
9
“Kushuca kwetisebenti kwasita ekucedzeni lubandlululo. Sikanyekanye netinhlangano tetfu tetisebenti, sibe nendzima lenkhulu ekulweleni emalungelo entsandvo yelinyenti,” kusho babe.
-
Kubuta babe, “Ungacombela kutsi umhlaka 1 Inkhwekhweti waba nini liholide lelisemtsetfweni eNingizimu Afrika?”
10
“Ngicabanga kutsi laba nasekuphele lubandlululo? Ngesikhatsi iNingizimu Afrika seyilive lentsandvo yelinyenti,” kuphendvula Mulweli.
-
Babe wakhe avuma ngenhloko, “Ucinisile. Ngisho sesinenkhululeko, tisebenti letinyenti kusafanele tilwele timo letikahle endzaweni yekusebenta kanye nemiholo lekahle.”
11
“Uphela kanjalo-ke umlandvo lebengifuna kukucocela wona. Kufanele ngilungele lilanga lakusasa. Inhlangano yetisebenti lengikuyo ihlele umbutsano lomkhulu lotawube unetikhulumi tepolitiki,” kusho babe.
-
“Nawe kufanele uwucedze lamuhla umsebenti wakho wesikolwa.”
12
“Kulungi babe. Nyalo sengiyabona kutsi yini leyenta lelilanga lemhlaka 1 Inkhwekweti libaluleke kangaka kuwe nakuletinye tisebenti. Kwanyalo, mine umsebenti wami kusengumsebenti wesikolwa!” kusho Mulweli amoyitela.
13

——Imibuto


  1. Yini leyenta kugujwe Lilanga Letisebenti lamuhla?
  2. Tisebenti tiligubha njani Lilanga Letisebenti?
  3. Khutsata bafundzi kutsi babute bantfu labasebentako emphakatsini wabo ngemisebenti labayentako.
14

——Tincwadzi letikuloluchungechunge


  • Lilanga Lekubuyisana
  • Lilanga Lenkhululeko
  • Lilanga Lemagugu
  • Lilanga Lemalungelo Eluntfu
  • Lilanga Labomake
  • Lilanga Letisebenti
  • Lilanga Lalabasha
15

——


Lendzaba icanjwe yaphindze yabhalwa ngesiVenda, njengencenye yephrojekthi yetintfo tekufundza ye-Zenex Ulwazi Lwethu ya-2020.
16
Attribution CC BY
Your attribution should include the following:
Title: Lilanga Letisebenti
Author/s: Eric Khorombi
Translator/s: Simangele Khoza
Illustrator/s: Fezile Twala
Assurer/s: Mduduzi Benjie Shongwe
Language: Siswati

© Zenex Foundation - Saide 2024

CC BY includes the following elements:
 BY   – Credit must be given to the creator