Ilanga labaSebenzi
Eric Khorombi
Fezile Twala
isiNdebele
First paragraphs

——


ILanga labaSebenzi eSewula Afrika liyiholideyi yomphakathi eba ngomhlaka-1 kuMrhayili.
-
Incwajana le ikhuluma ngomlando welanga leholideyi yomphakathi, nokobana kubayini liqakathekile.
1
“Kusasa lilanga leholideyi yomphakathi, akukafaneli ngiye esikolweni!” kutjho uMulweli kuyise.
-
“Begodu nami angisebenzi kusasa!” kutjho uyise.
-
“Baba, yini oyenzako ngeLanga labaSebenzi?”
2
“Iye kulungile Mulweli, angikutjele ngelanga leenTjhabatjhaba labaSebenzi,” kutjho uyise.
-
“Koke kwathoma lokha abantu abasebenzako nabalwela ukusebenza ama-iri abunane ngelanga. Bebangafuni ukusebenza ama-iri adlula kwabunane ngelanga.”
3
“Kanti bebasebenza ama-iri amangaki?” kubuza uMulweli. Esikhathini esinengi bebasebenza ama-iri alitjhumi namkha alitjhumi nanye ngelanga!” kuphendula uyise.
-
“Ngomhlaka 1 kuMrhayili ngomnyaka we-1886, abasebenzi e-Amerika babhenyoga ukobana behliselwe isikhathi abasisebenza ngamalanga ukobana kube ma-iri abunane.”
4
“Nabasabhenyogako njalo omunye waphosela ibhomu emapholiseni.”
-
“Hee, alo kwenzekani?” kubuza uMulweli.
-
“Kwabotjhwa abasebenzi abane babekwa umlandu wokuphosa ibhomu. Batholwa banomlandu, bayokulengiswa,” kutjho uyise aphendula kabuthaka.
5
“Magega nephasi, abasebenzi babhenyoga babhenyogela ukuhlongakala kwabasebenzi labo abane. Abantu abasebenzako basikima babumbana.
-
Ukusukela ngelangelo, ilanga lokuthoma lenyangeni kaMrhayili lathathwa njengelanga labasebenzi lokulwela ubujamo obungcono emsebenzini,” kutjho uyise.
6
Abanye abantu balibiza ngokuthi yi-May Day’. Ilanga lokuthoma lenyanga kaMrhayili lijamele amalungelo wabantu abasebenzako. Kulilanga leholideyi yelizwe loke eenarheni ezinengi,” kuhlathulula uyise.
7
“NgeLanga labaSebenzi eSewula Afrika, sihlanganyela neengidigidi zabasebenzi ephasini mazombe siligidinge. Kuba khona imirhwanto nemihlangano ehlelwako.”
-
“Belisoloko liyiholideyi ngaso soke isikhathi eSewula Afrika soloko kwangomnyaka we-1886?” kubuza uMulweli.
8
“Awa akusinjalo!” kuhleka uyise. “Umbuso webandlululo bewungafuni bona sigidinge ilanga lokuthoma enyangeni kaMrhayili.
-
Kodwana amayuniyoni iinhlangano ezijamele amalungelo wabasebenzi zatjela umbuso bona: i-May Day ililanga lethu. Ilanga langomhlaka-1 kuMrhayili lingelethu!”
9
“Ukubhenyoga kweensebenzi kwasiza ekupheliseni ibandlululo. Sinamayuniyoni wethu, sadlala indima ekulu ukulwela amalungelo wethu wentando yenengi,” kutjho uyise.
-
Ubaba uyabuza, “Ungaraya bona ilanga langomhlaka-1 kuMrhayili lathoma nini ukuba yiholideyi lapha?”
10
“Akusikho ngemuva kwebandlululo? Lokha iSewula Afrika nasele iba yinarha yentando yenengi,” kuphendula uMulweli.
-
Uyise uvuma ngehloko, “iye kunjalo. Nalokha sinentando yenengi, inengi labasebenzi nanje lisalwela ubujamo obuhle bokusebenza nokubhadalwa kuhle.”
11
“Indaba yami iphelela lapha okwanje. Ngifuna ukulungiselela ilanga lakusasa. Iyuniyoni yami ihlele imbizo ekulu neenkhulumi zepolotiki,” kutjho uyise.
-
“Begodu kufanele uqede umsebenzi wakho wekhaya ngaphambi kwelanga lakusasa.”
12
“Kulungile baba. Njenganje sengiyazwisisa bona kubayini ilanga lokuthoma enyangeni kaMrhayili liqakatheke kangaka kuwe nakwabanye abasebenzi. Okwanje, umsebenzi wami kumsebenzi wekhaya!” kutjho uMulweli amomotheka.
13

——Imibuzo


  1. Kubayini iLanga labaSebenzi ligidingwa namhlanjesi?
  2. Abasebenzi baligidinga njani iLanga labaSebenzi? Khuthaza abafundi ukobana babuze abasebenzi emiphakathini yabo ngemisebenzi yabo.
14

——Iincwadi eziselungelungeni leli


  • Ilanga lokuBuyisana
  • Ilanga leKululeko
  • Ilanga lamaGugu
  • Ilanga lamaLungelo wobuNtu
  • Ilanga laboMma
  • Ilanga labaSebenzi
  • Ilanga labantu abaTjha
15

——


Indatjana le yatlhanywa begodu yatlolwa ngelimi leTshivenḓa, njengengcenye yephrojekthi yeZenex Ulwazi Lwethu ye-2020 yeencwadi ezingafundwa.
16
Attribution CC BY
Your attribution should include the following:
Title: Ilanga labaSebenzi
Author/s: Eric Khorombi
Translator/s: Sponono Mahlangu
Illustrator/s: Fezile Twala
Assurer/s: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator