Ho vha hu tshilimo, ḓuvha ḽi tshi khou fhisesa, Khoḓani o vha a tshi khou sokou ya phanḓa na murahu a sa ḓivhi zwine a nga ita.Mme awe vho vha vho ya masimuni vho mu sia e eṱhe.“Ndi nga ita mini?” Khoḓani a tshi khou humbula.

Nga u ṱavhanya Khoḓani a ḓelwa nga muhumbulo.“Mulambo! Ndi ḓo bambela mulamboni, fhedzi ndi ḓo ṱuwa na nnyi ngauri mma vho ri ndi songo ṱuwa ndi ndoṱhe?” Khoḓani u khou humbula.Nga tshenetsho tshifhinga Vho Sophie ndi u fhira vha tshi khou ya mulamboni. Vho vha vha hwala manngi muhulwane wo ḓalaho zwiambaro.

“Khezwo! Ndi ḓo tevhela Vho Sophie mulamboni,” Khoḓani a tshi amba e eṱhe.A gidima murahu ha Vho Sophie. “Ndi khou humbela u ṱuwa navho mulamboni?” Khoḓani a tshi humbela. Vho Sophie vha ṅwethuwa vha tenda nga ṱhoho.Vhe nḓilani, Nozipho a tevhela vho a ṱuwa navho. Nozipho ha funi u bambela fhedzi u takalela u vhona vhaṅwe vha tshi bambela.

“Ṋamusi ndi ḓo bambela vhukatikati, iyoo! A thi tsha vha ṅwana nṋe, ndi ḓo vha mangadza vhoṱhe,” hu amba Khoḓani.A fhufhela maḓini nga u ṱavhanya … a ya fhasi, a ya nṱha a dovha a ya fhasi.Nozipho o vha o sedza e kule musi khonani yawe i tshi khou bambela na vhaṅwe vhana.

Musi Noziphi o sedza, zwi vhonala uri vhana vhoṱhe vha khou ḓiphina.Vho vha vha tshi khou ita phosho musi vha tshi khou bambela.Vho vha vha tshi khou vhidzelelana vho takala vhukuma.

Musi Nozipho a tshi sedza zwavhuḓi, o vhona zwithu zwi songo ḓoweleaho.Khoḓani o vha a tshi khou bambela kule na vhaṅwe vhana.Nozipho a sendela tsini uri a vhone zwavhuḓi. O tshuwa, a shavhela kha vhafumakadzi vhane vha khou kuvha mulamboni.“Thusani wee! Khoḓani u khou nwela khothe,” Nozipho a tshi ṱavha mukosi.

Nga u bonya ha iṱo, Vho Sophie ndi u fhufhela maḓini. Vha thoma u bambela.Vha bambela fhasi ha maḓi, vha imisa ṱhoho, vha vhuya vha swika kha Khoḓani.Vha fara Khoḓani nga tshanḓa vha bva nae maḓini.Vha bva nae vho mu beba muṱanani.

Vha pfuka vhukati ha tshigwada tsha vhana na vhafumakadzi vhe vha vha vha tshi khou lilela Khoḓani.Nozipho o vha e murahu ha Vho Sophie vhe vha vha vho beba Khoḓani vha tshi khou ya kiḽiniki.

Musi vha tshi swika kiḽiniki vha ṱanganedzwa nga muongi Noxolo we a gidimela u thusa Khoḓani.Vhaṅwe vhaongi vho ḓa nga u ṱavhanya uri vha thuse muongi Noxolo.“U ḓo tshila, ri na mashudu ngauri ha ngo vha maḓini lwa tshifhinga tshilapfu!” hu amba muongi.

Vho Sophie vha femuluwa vho vhofholowa.Vhathu vhoṱhe kiḽiniki vha vha livhuha nga tshivhindi tshe vha tshi sumbedza.“Ndi livhuha ndo kona u tshidza vhutshilo,” vha tshi amba nga u ḓiṱukufhadza.

Mafhungo a swika musanda. Vhamusanda vha isa mulaedza wa uri hu vhidzwe Vho Sophie.Vhamusanda vha thetshelesa musi Vho Sophie vha tshi ṱalutshedza nḓila ye vha vha ngayo mubambeli makone.“Musi ndi kha ḓi vha musidzana, khonani yanga yo vha i tshi dzula seli ha mulambo. Mulambo wo vha u tshipiḓa tsha vhutshilo hashu. Ro vha ri tshi ṱangana hone u ka maḓi, u kuvha, na u bambela!” vha tshi khou vhudza vhamusanda.

Vhamusanda vha ita nḓivhadzo ya u livhuha Vho Sophie nga ṅwambo wa tshivhindi tshavho. Vhafumakadzi vha fhululedza, vhanna vha lidza milodzi, vhana vha vhidzelela nga dakalo.U bva nga ḽeneḽo ḓuvha, vhana vho vha vha tshi tevhela Vho Sophie hoṱhe hune vha ya hone.Vho vha vha tshi pfala vha tshi khou imba vha tshi ri, “A huna tshine tsha nga mmbaisa, vha hone Vho Sophie vha re na tshivhindi!