Ngalelinye lilanga kushisa bhe! Khosi bekehla enyuka atibuta kutsi yini langayenta.Make wakhe wahamba ekhaya waya emasimini.“Yini nje lengingayenta njengobe ngingedvwa?” kusho Khosi akhuluma yedvwana.

Ngekushesha, Khosi wafikelwa licebo.“Ngitawuhamba ngiyobhukusha emfuleni, kodvwa ngubani lengitawuhamba naye? Make akafuni ngihambe ngedvwana,” kucabanga Khosi.Kutsite kusenjalo, kwengca Make Sophie aya emfuleni. Bekaphetse libhavu lelikhulu leligcwele timphahla.

“Aha! Ngitawulandzela Make Sophie njengobe aya emfuleni,” kusho Khosi acabanga. Wagijima walandzela Make Sophie. “Ngicela kuhamba nawe emfuleni,” kucela Khosi. Make Sophie wamoyitela wabese uvuma ngenhloko.Batsite basahamba, kwachamuka Nozipho wahamba nabo. Nozipho abengakutsandzi kubhukusha kepha bekakutsandza kubukela labanye nababhukusha.

Nasebafikile emfuleni, Khosi wacabanga watsi, “Lamuhla, angifuni kubhukusha emantini langashoni njengemntfwana lomncane, ngifuna kubakhombisa bonkhe kutsi mine ngiyakwati kubhukusha lapho kushona khona.”Wagcumela emantini. Wabhukusha, washona avumbuka.Nozipho bekabukela akhashane ngesikhatsi umngani wakhe abhukusha nalabanye bantfwana.

Ngesikhatsi Nozipho abukele, bekabona kutsi bonkhe bantfwana bajabulile njengobe basekhatsi emantini.Bebabhukusha babanga umsindvo.Bebamemetana bajabulile emantini.

Utsite Nozipho nabukisisa kahle, wabona lokutsite lokwehlukile.Khosi besekabhukusha khashane nalabanye bantfwana.Nozipho wasondzela kancane waphindze wabuka. Etfuswe nguloko labekubona, waya kubomake labebawasha timphahla eceleni kwemfula.“Sitani! Khosi uyamita,” kumemeta Nozipho.

Ngekuphatima kweliso, Make Sophie wagcumela emantini. Wabhukusha ngekushesha.Wangena ngephansi kwemanti, waphindze wavumbuka, wangena ngephansi futsi, afuna Khosi. Wabamba Khosi ngemkhono waya naye emantini langashoni.Nabefika lapho, Make Sophie watitimisa Khosi wamkhiphela ngaphandle kwemanti.

Make Sophie washakutela wendlula ecenjini lebantfwana nabomake lebebakhala futsi bamemeta.Nozipho bekagijima emva kwakhe njengobe Make Sophie ameme Khosi amphutfumisa emtfolamphilo wendzawo.

Nakefika emtfolamphilo make wahlangana nemhlengikati Noxolo lowaphutfuma kute asite Khosi.Masinyane umhlengikati watsatsa Khosi wammikisa egunjini lekulashwa kantsi labanye bahlengikati beta batosita uMhlengikati Noxolo.“Ukahle! Sibe nenhlanhla ngobe akazange ahlale sikhatsi lesidze ngephansi kwemanti!” kusho umhlengikati.

Make Sophie waphefumulela etulu akhululeka.Wonkhe umuntfu emtfolamphilo wambonga ngekuba kwakhe nesibindzi.“Ngiyabonga ngekutsi ngikhonile kusindzisa kuphila kwemuntfu,” kusho Make Sophie ngekutfobeka.

Letindzaba tefika etindlebeni tendvuna yase itfumela sitfunywa kutsi siyewubita Make Sophie. Indvuna yalalelisisa ngesikhatsi Make Sophie achaza kutsi waba njani ngumbhukushi lonelikhono.“Ngesikhatsi ngiseyintfombatane, umngani wami bekahlala ngesheya kwemfula. Emanti abeyincenye yekuphila kwetfu. Besiphocelelekile kutsi sikufundze kubhukusha. Umfula bekuyindzawo lebesidlala kuyo, sinatsa, siwasha futsi sidoba kuwo!” kusho Make Sophie.

Indvuna yabita umhlangano wesigodzi yabuye yakhipha sincumo sekutsi ibonge Make Sophie ngesento sakhe sesibindzi. Bafati balilitela, emadvodza ashaya tinkhwela, bantfwana bamemeta ngenjabulo.Kusukela ngalelolanga, bantfwana bebatsandza kulandzela Make Sophie nakaya nobe ngabe ngukuphi. Bewubeva bahlabelela batsi, “Kute lokungangitsintsa, ukhona Make lonesibindzi sibili!”