Ka letšatši le lengwe la selemo la go fiša, Khosi o be a emaema a eya godimo le tlase a sa tsebe seo a ka se dirago.Mmagwe o be a ile mašemong a mo tlogetše ka gae.“Na ke itire eng gare ga phišo ye kaaka?” Khosi a ipotšiša.

Ka pelapela, Khosi a tlelwa ke kgopolo.“Ke ya go rutha kua nokeng, efela ke tla ya le mang? Mma ga a rate ge ke sepela ke le noši,” Khosi a nagana.Ka yona nako yeo, Mma Sophie o be a feta a lebile nokeng. O be a rwele sekotlelo se segolo seo se tletšego ka diaparo.

“Aga! Ke ilo šala Mma Sophie morago ge a eya nokeng,” Khosi a ipotša bjalo.O ile a kitima a šala Mma Sophie morago. “Na nka ya le wena kua nokeng?” Khosi a realo ka kgopelo. Mma Sophie a myemyela gomme a dumela ka hlogo.Ge ba le tseleng, Nozipho o ile a ba latela gomme a sepela le bona. Nozipho o be a sa rate go rutha efela o be a rata go bogela ba bangwe ge ba rutha.

Kua nokeng, Khosi a ipotša a re, “Lehono ga ke sa rutha meetseng a mannyane, bjalo ka lesea. Ke yo ba bontšha gore le nna ke kgona go rutha bodibeng.”A phonkgelela ka nokeng. Gašagaša! Meetse a gašagana gohle!Nozipho o bogetše a le kgojana moo a bego a bolokegile.

Ge Nozipho a lebeletše bjalo, o bone eke bana ka moka ba thabetše go ba ka gare ga noka.Ba be ba dira lešata ge ba rutha.Ba be ba goeletšana ka lethabo ba le ka gare ga meetse.

Nozipho o rile ge a lebeledišiša ka meetseng, a makatšwa ke seo a se bonaga.Khosi o be a rutha kgole le bana ba bangwe.Nozipho a batamela gore a bone gabotse. Ka go tšhošwa ke seo a se bonago, a kitimela thokong yela basadi ba go hlatswa diaparo ba lego gona.“Thušang! Khosi o a nwelela!” Nozipho a goeletša.

Ka ponyo ya leihlo, Mma Sophie a a fofela ka meetseng. A sobelela tlasetlase ka nokeng a rutha.O ile a thala ka fase ga meetse, a nyologela godimo, a boela fase gape a nyakana le Khosi.A fihla a swara Khosi ka letsogo a rutha le yena a mo iša fao go nago le meetse a mannyane.Ke moka Mma Sophie a kukela Khosi ka ntle ga meetse.

Mma Sophie o ile a feta sehlopha sa bana le basadi bao ba bego ba hlabile mašata a sello ba llela Khosi.Nozipho a kitima a šala Mma Sophie yo a bego a beputše Khosi morago. O be a lebile tliliniking ya mo motseng.

Kua tliliniking Mma Sophie o ile a hlakanetšwa ke mooki, Noxolo yoo a ilego a thuša Khosi.Mooki o ile a phakišetša Khosi ka phapošing mola baoki ba bangwe ba be ba mo thuša.“O bolokegile! Re na le mahlatse ka lebaka la go re ga se a tšea nako ye telele ka gare ga meetse!” Mooki a realo.

Mma Sophie o ile a buša moya ka go imologa.Yo mongwe le yo mongwe kua tliliniking o ile a mo lebogiša ka bonatla le bogale bja gagwe.“Ke a leboga gore ke kgonne go phološa bophelo bja gagwe,” Mma Sophie a realo ka boikokobetšo.

Ditaba tše tša fihla kgošing. Kgoši a romela moromiwa go yo bitša Mma Sophie.Mma Sophie a hlalošetša kgoši gore o ithutile bjang go ba moruthi wa mmakgonthe.“Ge ke sa le mosetsana, mogwera wa ka o be a dula ka mošola wa noka. Meetse e be e le karolo ya maphelo a rena. Re be re swanetše go ithuta go rutha.

Kgoši a bitša kopano mo motseng a ba tsebiša gore o tšere sephetho sa go putsa Mma Sophie ka baka la bogale bja gagwe.Basadi ba duduetša mekgolokwane, banna ba letša melodi, bana ba hlaba mašata ka lethabo.Go tloga letšatšing leo, bana ba be ba rata go šala Mma Sophie morago, ba opela ba re: “Ga go na seo se ka nkgomago, o gona mosadi wa sebete, Sophie!