Katse le Mpša ke bagwera ba mmakgonthe.Ba ile ba tšea sephetho sa go yo etela mogwera wa bona, Kgogo ka letšatši la gagwe la matswalo.Kgogo e be e dula motsaneng wo mongwe. Go be go tla tšea Katse le Mpša matšatši a mabedi gore ba fihle mo Kgogo e dulago gona.

Katse le Mpša di be di na le maitshwaro a go fapana.Mpša e be e rata go ja, le go robala gape e be e seleka ka nako ye nngwe.Katse e be e na le botho, e lokile e bile e tshepagala.Di ile tša kopana legaeng la Mpša gore di kgone go beakanyetša leeto la tšona.

“Ke tla tla le dijo tša letšatši la mathomo,” Mpša ya ithaopa e realo.“Nna ke tla lokiša tša letšatši la bobedi,” Katse ya realo.Di ile tša ngwala dilo ka moka fase gore di se ke tša lebala.

“Go tlo ba lethabo le legolo go bona Kgogo e se kgale.Gape ke kgale mola re bonago mogwera wa rena,” Mpša ya realo ge e le gare e felegetša Katse gae.“Ke a lebogela go mphelegetša gae,” Katse ya realo go Mpša.

Di ile tša kopana mesong ya letšatši le le latelago gore di thome ka leeto la tšona.Leetong la tšona di be di eta di opela ebile di bina go bontšha lethabo.Morago ga lebakanyana, tša khutša ka fase ga mohlare wo mogolo. “Ke swerwe ke tlala! A re je,” Katse ya realo.

Mpša ka lebelo, ya solela dijo ka dibjaneng tše pedi. Dijo di be di na le makhura le meetse a mantši.Katse ya re, “Na tše ke tšona dijo tšeo o di lokišeditšego bobedi bja rena?”Katse e be e befetšwe ka lebaka la go re mogwera wa yona ga se a tla le dijo tšeo ba kwanego ka tšona. Katse ga se ya ja dijo tša Mpša.

“Na o emetše eng?” Mpša ya botšiša. E be e nagana gore Katse e tla tlogela go belaela gomme ya ja dijo.Ka go tenega, Katse ya re, “Ke ka lebaka la eng o tlile le dijo tšeo di ratwago ke wena fela?”Mpša e be e eja ka lebelo gomme sebjana sa thedimoga.Dijo ka moka tša Mpša tša tšhologela fase.

“O se ke wa belaela mogwera wa ka,” Katse ya realo.Katse ya napa ya ntšha disangwetši tša go dumiša, ya thoma go ja.Mpša ya lebelela dijo tša Katse ka leihlo la go kgopela.Katse e rile go fetša go ja, ya phutha gomme ya botša Mpša ya re, “Re ka tšwela pele ka leeto la rena?”

Di be di sa boledišane leetong la tšona ka moka. Mala a Mpša a thoma go ipelaetša ka tlala.Mantšiboeng ao, Katse ya itsholela dijo. Ya robala ka lethabo e thabišwa ke go re e swere dijo tšeo di lekanego.Mpša ya robala ka tlala.

Mesong, Katse ya itsholela dijo tše nnyane tša go fihlola. Mpša e be e sa tloše mahlo dijong tša Katse.Katse e ile ya ngwathela Mpša dijo.Mpša ya re, “O ntshwarele. Ke be ke inaganela ke nnoši.”Katse ya araba ka go re, “A re je mmogo.”Di ile tša dula fase gomme tša ja dijo.

Segwera sa tšona sa boela sekeng ge di le gare di tšwela pele ka leeto.Di fihlile motseng wa Kgogo ka nako.“Na leeto la lena le be le le bjang bagwera ba ka?” Kgogo ya botšiša.Katse le Mpša tša lebelelana, tša myemyela, tša araba ka go re, “Leeto le be le le botse.”

Ka nnete e be e le moletlo wo mogolo wa letšatši la matswalo.Di ile tša ja, tša opela tša ba tša bina!