UNonjana noKatana ngabahlobo abakhulu.Ngaminazana ithile bagqiba ekubeni bandwendwele umhlobo wabo uNkuku, ngosuku lwakhe lokuzalwa.UNkuku wayehlala kwilali ekude lee, kwaye kuthatha iimini ezimbini zohambo ukuya apho.

Aba babini, nangona bebengabahlobo abakhulu nje, babohluke kakhulu. UNonjana wayekuthanda ukulala nokutya, kwaye wayenokungathembeki ngamanye amaxesha.Kanti yena uKatana, wayelungile, enobubele, kwaye engumhlobo onokuthembela kuye.Kungoko abahlobo bagqiba ekubeni balale kwaNonjana ukuze babonisane ngohambo lwabo.

“Mna ndiza kuphatha ukutya esiza kukutya ngosuku lokuqala,” watsho uNonjana.“Mna ndiza kuphatha ukutya kosuku lwesibini,” watsho uKatana evuma.Babhala phantsi yonke into ukuze bangalibali.

“Kwakuba mnandi ukubona uNkuku kungekudala. Samgqibela kudala umhlobo wethu, lide eli thuba singasabonani,” watsho uNonjana ekhapha umhlobo wakhe, ebuyela endlwini yakhe.“Enkosi ngokundikhapha,” watsho uKatana.

Bavuka ekuseni ngosuku olulandelayo baqalisa uhambo lwabo.Endleleni babedlala becula bedanisa.Bathi bakuziva bediniwe baphumla phantsi komthi. “Phaka ndilambile,” watsho uKatana kuNonjana.

UNonjana wakhupha izitya ezibini aza kuphakela kuzo. Waqalisa ukuphaka loo nxavunxavu yokutya ngokungxama.“Kukutya kwethu oku?” wabuza uKatana ukudana kudibene nomsindo.Kwakumcaphukisa ukubona ukuba umhlobo wakhe uzophule izicwangciso zabo. Wadana uKatana yile nto akakutya noko kutya.

“Ulindeni?” wabuza uNonjana. Wayenethemba lokuba uKatana uza kuyeka ukukhalaza, atye.“Kutheni uziphathele ukutya okutyiwa nguwe wedwa?” wabuza uKatana ecaphukiswa ngumhlobo wakhe.Esatya njalo, nangenxa yokuphanga namafutha ayegcwele isandla sakhe, saqubudeka isitya sakhe. Kwachitheka konke oko kutya.

“Kulungile mhlobo wam,” uKatana watsho.UKatana wavula ingxowa yakhe yokutya. Wakhupha amaqebengwana amahle nabonakala emnandi, waza watya.Ngelo xesha uNonjana wayejonge ukutya kukaKatana ngamehlo arhalayo. Akugqiba ukutya uKatana, waqokelela izinto zabo wathi, “Singahamba ke ngoku siqhubeke nohambo lwethu.”

Ukusukela apho baqhubeka nohambo lwabo kungekho uthetha nomnye. Isisu sikaNonjana sasingxola liphango.Ngobo busuku, uKatana waziphakela ukutya kwakhe walala, evuya kuba eziphathele ukutya okwaneleyo.UNonjana walala engatyanga.

Ngosuku olulandelayo, uKatana watya intwana yokutya phambi kokuba bahambe. UNonjana wayenganakuzinceda wayemana ukujonga ukutya kukaKatana.UKatana wanika uNonjana ukutya. “Ndicela uxolo. Ndenze ububi,” watsho uNonjana. UKatana waphendula wathi, “Masitye kunye.”Bahlala phantsi aba bahlobo batya.

Baqhubekeka nohambo lwabo, yangathi khange baxabane.Bafika kulo mhlobo wabo ngorhatya.“Nihambe njani zihlobo zam?” ubuzile uNkuku wakubabona.“Sihambe kakuhle kakhulu,” baphendula ngaxeshanye, bencumelene

Bacula! Badanisa! Batya!Laba mnandi kakhulu elo theko lokuzalwa.