Ilanga laboMma
Thelma Mhlari
Khanyisa Masemola
isiNdebele
Read aloud

——


ESewula Afrika ilanga langomhlaka-9 kuRhoboyi yiholideyi yomphakathi. Lilanga laboMma eliZweni loke.
-
Incwadi yendatjana le imayelana nomlando welanga lelo, nokobana kubayini ilangeli lisaqakathekile nanamhlanjesi.
1
Isikolo nasiphumako, uLerato noKhanyisa batjhinga ebulungelweni leencwadi elingekhabo. Bayokwenza imisebenzi yabo yekhaya.
-
“Wenza ini namhlanjesi?” kubuza uKhanyisa.
-
“Kufanele ngifunisise ngeLanga laboMma, kuphendula uLerato. Kuqaleka sengathi yindatjana edondisako le.”
2
“Ingabe uqinisile? Awa, lalela ayidondisi nakancani!” kutjho uKhanyisa.
-
Uragela phambili uthi, “Utitjhere wethu usinikele umtlolo-phenyo lowo ngethemu edlulileko. Ngazitjela bona kungenzeka iyadondisa. Kodwana akhese ngikutjele bona ngifunde ini ngeLanga laboMmma!
-
“Iza nazo ngilalele!” kuphendula uLerato.
3
“Kwabe kungeminyaka yabo-1950 eSewula Afrika, lokha nakuthoma ibandlululo,” kukhuluma uKhanyisa.
-
“Umbuso webandlululo bewufuna bona boke abantu abanzima baphathe amapasa, umtlolo kamazisi.
-
Umbuso wekholoniyali besele ulithomile ihlelo lamapasa. Abantu abanzima bebangakhambakhambi bakhululekile.”
4
“Ukusukela ngabo-1912, abomma bebabhenyogela ihlelo lamapasi eSewula Afrika.
-
Ngomnyaka we-1913, isiqhenyana sabomma, esabe sidoswa phambili nguCharlotte Maxeke, satjhisa amapasa waso ngaphambi kwama-ofisi kamasipala. Balwa babambana phezulu namapholisa!”
5
“Ukusukela embusweni wekholoniyali ukuya embusweni webandllulo, izinto zaya ngokuya zaba zimbi khulu,” kutjho uKhanyisa.
-
“Alo ungarhaba msinya utjho bona kwenzekani ngomhlaka-9 kuRhoboyi ngo-1956?” kutjho uLerato nasele bafika ebulungelweni leencwadi.
-
“Kufanele ubuke ilwazi lami lomlando!” kutjho uKhanyisa.
6
Ebulungelweni leencwadi, bafika bahlala etafuleni esewugwini. UKhanyisa waragela phambili nokuhleba.
-
Ngeminyaka yabo-1950, amandla wemithetho yebandlululo bekenza abantu abanzima badose emhlweni khulu.
-
Ipilo besele iyimbi khulu kibomma babantu abanzima. Babhenyoga!” kutjho uKhanyisa, akhulumela phezulu.
7
“Ngomnyaka we-1956, abomma beSewula Afrika bahlela umtjhagalo omkhulu balwela imithetho emitjha yamapasa ebeyenzelwe abomma.
-
Umtjhagalo wahlelelwa umhlaka-9 kuRhoboyi.
-
Abomma abanzima nabamhlophe ababuya enarheni yoke beza ePitori bazela umTjhagalo waboMma owabe usiya e-Union Buildings.”
8
Kwabe kulilanga elihle! Abomma abangaba pheze ziinkulungwana ezima-20,000 bangenela umtjhagalo.
-
Ebebadosa umtjhagalo lo phambili kwabe kunguLillian Ngoyi, uSophia Williams, uHelen Joseph, uRahima Moosa, noBertha Gxowa. Omunye nomunye umuntu wabe azothile begodu azimisele.
-
Bathatha iingidigidi zeencwadi zeenlilo bazisa embusweni. Iincwadi zeenlilo zabe zingakhambisani nemithetho yamapasa.”
9
“Alo kwalandela ini ngemuva kwalokho?” kubuza uLerato sekafuna ukwazi okunengi.
-
“Bahlala lapho balinda uNgqongqotjhe. Bahlala bathula du! Imizuzu ema-30, balindile.
-
Abomma abaziingidi ezimatjhumi amabili, yo! bekumtjhagalo onamandla! Akhange eze azobahlangabeza,” kuphendula uKhanyisa.
-
“Uligwala!” kuhleba uLerato.
-
“Ngemva kwalokho abomma bathoma bavuma, kwatjha ingoma,” kutjho uKhanyisa.
10
“Ngokujama babumbane baboke, abomma bebazi amandla wamaphimbo wabo, kanye namandla wokuthula kwabo,” kuhlathulula uKhanyisa.
-
“Bavuma besithi, ‘Wathinta abafazi, Wathint’ imbokodo, Uzakufa!’
-
Nawuthinte abafazi, kutjho bona uthinte imbokodo, uzakusilwa!’”
11
“Umtjhagalo waboMma wabe ukubhenyoga okuqakathekileko emlandweni wethu.
-
Ngemuva kwentando yenengi, umhlaka-9 kuRhoboyi waba lilanga leholideyi yomphakathi, lilanga lapha besihlonipha abomma begodu sigidinga indima edlalwe bomma emphakathini.
-
Singagidinga nokuthi abomma sebanamalungelo amanengi kwanjesi kunakade,” kuswaphelisa uKhanyisa.
12
“Wu ngabona wathola i-A kilowo mtlolo-phenyo!” kutjho uLerato.
-
“Iye, ngakhuthazwa bomma abanengi abararako nabanamandla emlandweni wethu. Ukuzinikela nalokho abakuzuzako kuyasikhuthaza!” kuphendula uKhanyisa.
-
“Lerato ngibawa mina nawe sibe bomma labo esikhathini esizako!”
13

——Imibuzo


  1. Kubayini abomma bebabhenyoga ngomnyaka we-1956?
  2. Bebabhenyoga njani?
  3. Bobani ebebadosa phambili umtjhagalo?
  4. Tholisisa okunengi ngabanye babomma laba.
  5. Iyini indima edlalwa bomma emphakathini? Iyini indima edlalwa bobaba? Hlathulula bona kubayini ucabanga njalo.
14

——Iincwadi eziselungelungeni leli


  • Ilanga lokuBuyisana
  • Ilanga leKululeko
  • Ilanga lamaGugu
  • Ilanga lamaLungelo wobuNtu
  • Ilanga laboMma
  • Ilanga labaSebenzi
  • Ilanga leLutjha
15

——


Indatjana le yatlhanywa begodu yatlolwa njengengcenye yephrojekthi yeZenex Ulwazi Lwethu yeencwadi ezifundwa ngo-2020.
16
Attribution CC BY
Your attribution should include the following:
Title: Ilanga laboMma
Author/s: Thelma Mhlari
Translator/s: Sponono Mahlangu
Illustrator/s: Khanyisa Masemola
Assurer/s: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator